ຜັກຊີລາວ ເປັນສະໝຸນໄພບ້ານໆ ທີ່ອຸດົມໄປດ້ວຍປະໂຫຍດ ທັງຊ່ວຍຍ່ອຍ ຂັບລົມ ຫຼຸດກິ່ນປາກ ແຖມຍັງມີສານຕ້ານອະນຸມູນອິດສະຫຼະອີກຫຼາຍ ແລ້ວຮູ້ບໍ່ວ່າດຽວນີ້ຄົນຮຸ່ນໃໝ່ຫຼາຍຄົນບໍ່ມັກກິນກັນເພາະ “ເປັນຜັກທີ່ມີກິ່ນສະເພາະຕົວ” ທັງທີ່ຈິງແລ້ວ ມັນດີຕໍ່ຮ່າງກາຍຫຼາຍ

ຜັກຊີລາວແມ່ນຫຍັງ?

ຜັກຊີລາວ (ຊື່ວິທະຍາສາດ: Anethum graveolens) ເປັນພືດລົ້ມລຸກໃນຕະກູນດຽວກັບຜັກຊີ, ແຄຣອດ ຫຼື ຂຶ້ນສ່າຍ ໜ້າຕາຂອງຜັກຊີລາວຄ່ອນຂ້າງເປັນເອກະລັກ ໃບຝອຍລະອຽດ ສີຂຽວອ່ອນ ອອກດອກເປັນຊໍ່ນ້ອຍໆ ສີເຫຼືອງອ່ອນໆ ຄ້າຍຄັນຮົ່ມຄວ່ຳ ເວລາມີດອກບານເຕັມທີ່ກໍງາມໄປອີກແບບ ແລະ ມີກິ່ນຫອມຊຸນເປັນເອກະລັກສະເພາະຕົວ ທີ່ຄ່ອນຂ້າງແຮງ ແລະ ໂດດເດັ່ນ ລົດຊາດອອກໄປທາງຊ່າໆ ຊ່າລີ້ນໜ້ອຍໜຶ່ງ

ນິຍົມໃຊ້ໃນອາຫານຫຼາຍປະເພດເຊັ່ນ: ແກງອ່ອມ, ລາບ, ແກງໜໍ່ໄມ້, ແກງປາ ຫຼື ນຳໄປໃຊ້ຕົກແຕ່ງໃນອາຫານຝຣັ່ງເຊັ່ນ ແກງຄຣີມ, ດອງແຕງກວາ, ຊອດປາແຊລມອນ

ປະໂຫຍດຂອງຜັກຊີລາວ

1.ຊ່ວຍຂັບລົມ ແກ້ທ້ອງອືດ

ນ້ຳມັນຫອມລະເຫີຍໃນຜັກຊີລາວຊ່ວຍຜ່ອນຄາຍລຳໄສ້ ເຮັດໃຫ້ຮູ້ສຶກ ສະບາຍທ້ອງ ແກ້ອາການແໜ້ນ ອຶດອັດຫຼັງມື້ອາຫານ ຊຶ່ງກິ່ນຫອມ ແລະ ສານໃນຜັກຊີລາວຊ່ວຍກະຕຸ້ນການເຮັດວຽກຂອງກະເພາະອາຫານ ແລະ ລຳໄສ້ ຊ່ວຍຂັບລົມ ຫຼຸດອາການແໜ້ນທ້ອງ ທ້ອງອືດ ທ້ອງເຟີ້ ໄດ້ດີ

2.ມີສານຕ້ານອະນຸມູນອິດສະຫຼະສູງ

ຜັກຊີລາວອຸດົມໄປດ້ວຍສານຕ້ານອະນຸມູນອິດສະຫຼະຫຼາຍຊະນິດ ເຊັ່ນ: ຟລາໂວນອຍດ໌, ວິຕາມິນຊີ, ຊຶ່ງຊ່ວຍປົກປ້ອງເຊວໃນຮ່າງກາຍຈາກການຖືກທຳລາຍ ຫຼຸດຄວາມສ່ຽງຂອງໂລກເຣື້ອຣັງຕ່າງໆ ແລະ ຊ່ວຍຊະລໍ້ໄວໄດ້ດ້ວຍ

3.ຕ້ານການອັກເສບ ແລະ ເຊື້ອແບັກທີເຣຍ

ກິ່ນແຮງໆ ທີ່ບາງຄົນບໍ່ມັກ ຄວາມຈິງ ແລ້ວເປັນແຫຼ່ງລວມສານຂ້າເຊື້ອຈາກທຳມະຊາດ ຊ່ວຍຫຼຸດໂອກາດການຕິດເຊື້ອໃນລະບົບຍ່ອຍອາຫານ

4.ຫຼຸດກິ່ນປາກແບບທຳມະຊາດ

ພຍງຄ້ຽວໃບສົດເລັກນ້ອຍຫຼັງອາຫານກໍຊ່ວຍໃຫ້ລົມຫາຍໃຈສົດຊື່ນຂຶ້ນໄດ້ ໂດຍບໍ່ຕ້ອງພຶ່ງຢາອົມຫຼຸດກິ່ນປາກ

5.ບຳລຸງກະດູກ

ເຖິງວ່າຈະເປັນຜັກເບົາໆ ແຕ່ກໍມີແຄວຊ້ຽມ, ຟອດຟອຣັດ ແລະ ແມັກນີຊ້ຽມໃນປະລິມານບໍ່ນ້ອຍເລີຍ ຊ່ວຍເສີມຄວາມແຂງແຮງຂອງກະດູກໄດ້ເຊັ່ນກັນ

ຂໍ້ຄວນລະວັງໃນການກິນຜັກຊີລາວ

• ກິ່ນແຮງ ຄົນທີ່ບໍ່ລື້ງອາດຮູ້ສຶກວ່າກິ່ນຊຸນເກີນໄປ ຕ້ອງຝຶກຄ່ອຍໆ ກິນ
• ນ້ຳມັນຫອມລະເຫີຍຫຼາຍ ກິນໃນປະລິມານຫຼາຍອາດເຮັດໃຫ້ຄື່ນໄສ້ ຫຼື ຮູ້ສຶກວຽນຫົວໃນບາງລາຍ ໂດຍສະເພາະຄົນທີ່ໄວຕໍ່ກິ່ນ
• ແມ່ຍິງຖືພາ ບໍ່ຄວນກິນຫຼາຍເກີນໄປ

ສະຫຼຸບ ຜັກຊີລາວ ສະໝຸນໄພຈິ່ວແຕ່ແຈ໋ວທີ່ຕ້ອງມີ!

ຜັກຊີລາວເປັນຫຼາຍກວ່າພຽງຜັກໂຫ່ຍໜ້າ! ມັນຄືສະໝຸນໄພທີ່ມີຄຸນຄ່າທາງໂພຊະນາການ ແລະ ສັນນະຄຸນທາງຢາຫຼາກຫຼາຍ ທັງຊ່ວຍເລື່ອງລະບົບຍ່ອຍອາຫານ, ບຳລຸງກະດູກ, ບຳລຸງສາຍຕາ ແລະ ເປັນແຫຼ່ງສານຕ້ານອະນຸມູນອິດສະຫຼະຊັ້ນດີ

ຖ້າໃຜຍັງບໍ່ເຄີຍລອງຕື່ມຜັກຊີລາວໃນເມນູອາຫານ ລອງເບິ່ງໄດ້ເລີຍ ບໍ່ວ່າຈະເປັນແກງອ່ອມ  ຫຼື ຈະນຳໄປເຮັດທອດໄຂ່ຜັກຊີລາວກໍແຊບ! ພຽງຈື່ໄວ້ວ່າກິນໃນປະລິມານທີ່ພໍເໝາະ ແລະ ປຶກສາຜູ້ຊ່ຽວຊານຫາກມີຂໍ້ສົງໄສ ຫຼື ມີຂໍ້ຈຳກັດດ້ານສຸຂະພາບ

ສະແດງຄຳຄິດເຫັນ