ຜູ້ຄົນນັບພັນອອກມາເດີນຂະບວນເທິງຖະໜົນໃນກຸງໄນໂຣບີ ເພື່ອປະທ້ວງຕ້ານລັດຖະບານຂອງປະທານາທິບໍດີວິລຽມ ຣູໂຕ ທົ່ວປະເທດເຄນຢາ

ທັງນີ້ ການທີ່ປະທານາທິບໍດີບໍ່ຢູ່ທີ່ທຳນຽບລັດຖະບານ ຊຶ່ງເປັນທີ່ຢູ່ຢ່າງເປັນທາງການຂອງລາວ ຖືເປັນເລື່ອງທີ່ໜ້າຈັບຕາເບິ່ງ ເນື່ອງຈາກຜູ້ປະທ້ວງໄວຮຸ່ນຂູ່ຈະບຸກເຂົ້າໄປ ຕຳຫຼວດໃຊ້ເຄື່ອງກີດຂວາງ ແລະ ລວດໜາມປິດກັ້ນຖະໜົນສາຍຫຼັກ ໂດຍສະເພາະຖະໜົນທີ່ມຸ່ງໄປຫາທຳນຽບລັດຖະບານ ແລະ ລັດສະພາ

ທາງການຍັງບໍ່ໄດ້ເປີດເຜີຍຕົວເລກຜູ້ເສຍຊີວິດຈາກການປະທ້ວງເມື່ອວັນພຸດ (25 ມິຖຸນາ) ແຕ່ສະມາຄົມການແພດແຫ່ງເຄນຢາ ສະມາຄົມກົດໝາຍແຫ່ງເຄນຢາ ແລະ ຄະນະເຮັດວຽກປະຕິຮູບຕຳຫຼວດໄດ້ອອກຖະແຫຼງການຮ່ວມກັນວ່າ ຜູ້ປະທ້ວງຢ່າງໜ້ອຍ 8 ຄົນເສຍຊີວິດ ໂດຍໃນຈຳນວນຜູ້ໄດ້ຮັບບາດເຈັບ 400 ຄົນ 83 ຄົນຕ້ອງໄດ້ຮັບການຮັກສາພິເສດ ແລະ 8 ຄົນໄດ້ຮັບບາດເຈັບຈາກລູກປືນ ຜູ້ໄດ້ຮັບບາດເຈັບລວມເຖິງເຈົ້າໜ້າທີ່ຕຳຫຼວດ 3 ນາຍ

ດ້ານກຸ່ມສິດທິມະນຸດ ແອມເນສຕີ້ ເຄນຢາ ລະບຸວ່າມີຜູ້ເສຍຊີວິດສູງເຖິງ 16 ຄົນ ໂດຍລະບຸສັງເກດເຫັນການສົ່ງກຳລັງຕຳຫຼວດຢ່າງໜັກ ແລະ ການໃຊ້ກຳລັງເກີນກວ່າເຫດ ລວມເຖິງກະສຸນຢາງ, ກະສຸນແທ້ ແລະ ປືນສີດນ້ຳແຮງດັນສູງ ຊຶ່ງສົ່ງຜົນໃຫ້ມີຜູ້ໄດ້ຮັບບາດເຈັບຈຳນວນຫຼາຍ

ຜູ້ປະທ້ວງຄົນໜຶ່ງ ກ່າວວ່າລາວໄດ້ເຂົ້າຮ່ວມການປະທ້ວງ “ເພື່ອຕໍ່ສູ້ເພື່ອອະນາຄົດຂອງລູກໆ ຂອງຂ້ອຍ” ລາວກ່າວວ່າ “ຂ້ອຍຮູ້ສຶກວ່າປະເທດຂອງເຮົາບໍ່ໄດ້ເດີນໄປໃນທິດທາງທີ່ຖືກຕ້ອງ ໂດຍສະເພາະຢ່າງຍິ່ງໃນດ້ານການສຶກສາ ແລະ ທຸກສິ່ງທີ່ເກີດຂຶ້ນ ຂ້ອຍຮູ້ສຶກວ່າເຖິງເວລາແລ້ວທີ່ປະເທດ ແລະ ຜູ້ນຳຈະຕ້ອງຟັງເຮົາ”

ໃນກຸງໄນໂຣບີ ພາບວິດີໂອສະແດງໃຫ້ເຫັນກຸ່ມແກັສນ້ຳຕາສີຂາວກະຈາຍລະຫວ່າງອາຄານ ເຮັດໃຫ້ຜູ້ປະທ້ວງຕ້ອງຊອກຫາທີ່ກຳບັງ, ໄອ ແລະ ເອົາມືປິດຕາ ໃນໃຈກາງເມືອງ ຜູ້ປະທ້ວງເດີນຂະບວນຜ່ານຮ້ານຄ້າທີ່ປິດ ແລະ ຖະໜົນທີ່ວ່າງເປົ່າ

ລາຍງານຂ່າວຈາກສະຖານີໂທລະພາບ NTV ຂອງເຄນຢາລະບຸວ່າ ເກີດການປະທະກັນທີ່ເມືອງທ່າມອມບາຊາ ໂດຍມີການປະທ້ວງໃນເມືອງຄິເຕນເກລາ ຄິຊີ ມາຕູ ແລະ ເນຣີດ້ວຍ

ເຖິງວ່າການປະທ້ວງເມື່ອປີທີ່ແລ້ວຈະຜ່ອນຄາຍລົງຫຼັງຈາກທີ່ປະທານາທິບໍດີວິລຽມ ຣູໂຕ ຖອນຂໍ້ສະເໜີການຂຶ້ນພາສີ ແຕ່ຄວາມໂກດແຄ້ນຂອງປະຊາຊົນທີ່ມີຕໍ່ການໃຊ້ກຳລັງເກີນກວ່າເຫດຂອງຫົວໜ່ວຍງານຄວາມໝັ້ນຄົງຍັງຄົງມີຢູ່

ໂດຍມີການປະທ້ວງຄັ້ງໃໝ່ໃນເດືອນນີ້ ຊຶ່ງຖືເປັນການເປີດປະເດັນໃໝ່ກ່ຽວກັບການເສຍຊີວິດຂອງບລັອກເກີຄົນໜຶ່ງລະຫວ່າງການຖືກຄວບຄຸມຕົວຂອງຕຳຫຼວດ

ມີຜູ້ຕ້ອງສົງໄສ 6 ຄົນ ລວມເຖິງເຈົ້າໜ້າທີ່ຕຳຫຼວດ 3 ນາຍ ຖືກຕັ້ງຂໍ້ຫາຂ້າຕະກຳເມື່ອວັນອັງຄານທີ່ຜ່ານມາ ຈາກການສັງຫານ ອັນເບິດ ໂອຈວັງ ບລັອກເກີ ແລະ ຄູ ອາຍຸ 31 ປີ ໂດຍທັງໝົດໃຫ້ການປະຕິເສດຂໍ້ກ່າວຫາ

ການເສຍຊີວິດຂອງໂອຈວັງກາຍເປັນປະເດັນຮ້ອນສຳລັບຄົນເຄນຢາ ທີ່ຍັງຄົງໄວ້ອາໄລໃຫ້ກັບຜູ້ທີ່ເສຍຊີວິດໃນການຊຸມນຸມເມື່ອປີທີ່ແລ້ວ ຊຶ່ງຖືກກ່າວໂທດວ່າເປັນຄວາມຜິດຂອງກອງກຳລັງຮັກສາຄວາມປອດໄພ ທ່າມກາງເຫດການທີ່ຜູ້ຄົນຈຳນວນຫຼາຍຫາຍຕົວໄປໂດຍບໍ່ຮູ້ສາເຫດ