ພົບສົບ ນັກທ່ອງທ່ຽວສາວ ຄົນບຣາຊິວ ເສຍຊີວິດແລ້ວ ຫຼັງຕົກພູເຂົາໄຟຣິນຈານີໃນອິນໂດເນເຊຍ ແລະ ຄົ້ນຫານານ 4 ມື້ 

 

ເມື່ອວັນພຸດທີ່ 25 ມິຖຸນາ 2025 ສຳນັກຂ່າວ NBC News ລາຍງານວ່າ ຄວາມຫວັງຂອງຄົນບຣາຊິວນັບລ້ານໄດ້ສິ້ນສຸດລົງພ້ອມກັບເຫດການໂສກເສົ້າ  ເມື່ອປະຕິບັດການຄົ້ນຫາ ນາງ ຈູເລຍນາ ມາຣິນສ໌ ນັກທ່ອງທ່ຽວສາວຄົນບຣາຊິວອາຍຸ 26 ປີ ຕະຫຼອດ 4 ວັນເຕັມ ໄດ້ຢຸດຕິລົງຫຼັງທີມຄົ້ນພົບສົບຂອງນາງທີ່ບໍ່ມີຊີວິດຢູ່ໃກ້ກັບປາກປ່ອງພູເຂົາໄຟຣິນຈານີ ປະເທດອິນໂດເນເຊຍ

 

ເຫດການທີ່ ຈູເລຍນາ ພະລາດຕົກບໍລິເວນປາກປ່ອງພູເຂົາໄຟໃນອິນໂດເນເຊຍ ເກີດຂຶ້ນເມື່ອວັນເສົາທີ່ຜ່ານມາ (21 ມິຖຸນາ 2025) ຂະນະທີ່ຈູເລຍນາພ້ອມເພື່ອນຄົນຕ່າງປະເທດອີກ 5 ຄົນ ແລະ ໄກ້ນຳທາງ ກຳລັງປີນພູເຂົາໄຟຣິນຈານີທີ່ຍັງຄົງຄຸກຮຸ່ນຢູ່ເທິງເກາະລອມບອກ ປະເທດອິນໂດເນເຊຍ

 

 

ກ່ອນທີ່ລາວຈະປະສົບອຸບັດຕິເຫດຕົກລົງໄປ ທີມຄົ້ນຫາ ແລະ ກູ້ໄພແຫ່ງຊາດຂອງອິນໂດເນເຊຍໄດ້ລະດົມກຳລັງຄົ້ນຫາຢ່າງໜັກຕະຫຼອດ 4 ມື້ ທ່າມກາງສະພາບອາກາດ ແລະ ພູມິປະເທດທີ່ຮ້າຍແຮງຢ່າງຍິ່ງ ຈົນກະທັ້ງໂດຣນກວດຈັບຄວາມຮ້ອນສາມາດຄົ້ນພົບສົບຂອງນາງໃນທີ່ສຸດ

 

 

ແຕ່ທ່າມກາງຄວາມໂສກເສົ້າ ກັບມີປະເດັນຮ້ອນທາງການທູດປະທຸຂຶ້ນ ເມື່ອສະຖານທູດບຣາຊິວໃນກຸງຈາກາຕາໄດ້ອອກມາເປີດໂປງວ່າ ລັດຖະບານອິນໂດເນເຊຍໄດ້ໃຫ້ຂໍ້ມູນທີ່ບໍ່ເປັນຄວາມຈິງ ກັບຄອບຄົວຂອງຈູເລຍນາໃນຊ່ວງທຳອິດຂອງການຄົ້ນຫາ ໂດຍອ້າງວ່າໄດ້ພົບໂຕນາງແລ້ວ ແລະ ກຳລັງໃຫ້ຄວາມຊ່ວຍເຫຼືອທັງນ້ຳ ແລະ ອາຫານ ຊຶ່ງເປັນການສ້າງຄວາມຫວັງລົມໆ ແລ້ງໆ ໃຫ້ກັບຄອບຄົວທີ່ກຳລັງທຸກໃຈຢ່າງແສນສາຫັດ

 

 

ສຳລັບຈູເລຍນາ ນາງແມ່ນນັກເຕັ້ນສາວຜູ້ມີຄວາມຝັນ ແລະ ອອກເດີນທາງທ່ອງທ່ຽວພຽງລຳພັງທົ່ວເອເຊຍ ຕັ້ງແຕ່ເດືອນກຸມພາທີ່ຜ່ານມາ ໂດຍນາງໄດ້ເດີນທາງມາແລ້ວທັງຟິລິບປິນ, ຫວຽດນາມ ແລະ ປະເທດໄທ ກ່ອນທີ່ການເດີນທາງຂອງນາງຈະສິ້ນສຸດລົງຢ່າງໜ້າເສົ້າທີ່ອິນໂດເນເຊຍ ຊຶ່ງກາຍເປັນຈຸດໝາຍສຸດທ້າຍໃນຊີວິດຂອງນາງ

 

ແນວໃດກໍຕາມ ຂະນະນີ້ທາງລັດຖະບານອິນໂດເນເຊຍຍັງບໍ່ໄດ້ອອກມາຕອບໂຕ້ຂໍ້ກ່າວຫາດັ່ງກ່າວຈາກສະຖານທູດບຣາຊິວແຕ່ຢ່າງໃດ

ສະແດງຄຳຄິດເຫັນ