ເກີດເຫດລັກລອບຍິງສຸດສະເທືອນຂວັນໃນລັດໄອດາໂຮ ສະຫະລັດ ເມື່ອເຈົ້າໜ້າທີ່ດັບເພີງ ທີ່ພະຍາຍາມຄວບຄຸມໄຟປ່າເທິງພູແຄນຟິລ ຖືກມືປືນສະໄນເປີຊຸ່ມຍິງເສຍຊີວິດ 2 ຄົນ ເລັ່ງຕາມຫາຕົວຄົນຮ້າຍ

ເກີດເຫດລັກລອບຍິງເຈົ້າໜ້າທີ່ດັບເພີງ ຂະນະປະຕິບັດໜ້າທີ່ຄວບຄຸມໄຟປ່າເທິງພູເຂົາແຄນຟິລ ໃນຊ່ວງບ່າຍວັນອາທິດ (ຕາມເວລາທ້ອງຖິ່ນ) ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 2 ຄົນ ແລະ ເກີດການຍິງປະທະຕໍ່ເນື່ອງຫຼາຍຊົ່ວໂມງ ສ້າງຄວາມແຕກຕື່ນໃຫ້ກັບປະຊາຊົນ ແລະ ເຈົ້າໜ້າທີ່ໃນພື້ນທີ່

ໂດຍລ່າສຸດ ເຈົ້າໜ້າທີ່ຍັງຄົງເຂົ້າພື້ນທີ່ເພື່ອຄວບຄຸມສະຖານະການ ແລະ ເລັ່ງຊອກຫາຕົວມືປືນ ເຊິ່ງຍັງບໍ່ຊັດເຈນວ່າມີພຽງຄົນດຽວ ຫຼື ຫຼາຍກວ່ານັ້ນ ຂະນະທີ່ຍັງມີປະຊາຊົນບາງສ່ວນຕິດຄ້າງຢູ່ເທິງພູ

ດ້ານຜູ້ວ່າການລັດໄອດາໂຮ ແບຣດ ລິດເທິນ ໄດ້ອອກຖະແຫຼງການໃນແພລັດຟອມ X ປະນາມເຫດການຄັ້ງນີ້ວ່າເປັນ “ການໂຈມຕີຢ່າງໂຫດຮ້າຍຕໍ່ເຈົ້າໜ້າທີ່ດັບເພີງຜູ້ກ້າຫານ” ພ້ອມຂໍໃຫ້ປະຊາຊົນໄອດາໂຮ ຮ່ວມກັນອະທິຖານໃຫ້ກັບຜູ້ເສຍຊີວິດ ແລະ ຄອບຄົວຂອງພວກເຂົາ

ລ່າສຸດ ຈົນເຖິງຕອນນີ້ໄຟປ່າຍັງໄໝ້ຢ່າງຕໍ່ເນື່ອງ ແລະ ເຈົ້າໜ້າທີ່ໄດ້ອອກປະກາດເຕືອນປະຊາຊົນໃຫ້ຫຼີກເວັ້ນບໍລິເວນເສັ້ນທາງເດີນປ່າຂຶ້ນພູແຄນຟິລ ແລະ ເສັ້ນທາງທີ່ຢູ່ທາງເໜືອຂອງຕົວເມືອງ ເພື່ອເປີດທາງໃຫ້ເຈົ້າໜ້າທີ່ໄດ້ປະຕິບັດການຈັບກຸມຄົນຮ້າຍໄດ້ຢ່າງໄວ

ທັງນີ້ ພູເຂົາແຄນຟິລຖືເປັນພື້ນທີ່ທຳມະຊາດສຸດນິຍົມໃນລັດໄອດາໂຮ ໂດຍມີເສັ້ນທາງເດີນປ່າ ແລະ ລົດຈັກຜ່ານພຸ່ມໄມ້ໜາທຶບ ແລະ ປ່າດົງເທິງພູ ທັງຍັງເປັນຈຸດໝາຍຂອງນັກທ່ອງທ່ຽວຈຳນວນຫຼາຍໂດຍສະເພາະໃນລະດູຮ້ອນ.

ສະແດງຄຳຄິດເຫັນ