ເມື່ອບໍ່ດົນມານີ້ປະເທດຈີນໄດ້ມີການອອກ ກົດລະບຽບໃໝ່ທີ່ເຮັດໃຫ້ນັກເດີນທາງຕ້ອງລະວັງຫຼາຍຂຶ້ນ ໂດຍສຳນັກງານການບິນພົນລະເຮືອນຂອງຈີນ (CAAC) ໄດ້ມີຜົນບັງຄັບໃຊ້ຢ່າງເປັນທາງການ ໂດຍສັ່ງ ຫ້າມນຳ Power Bank ທີ່ບໍ່ມີເຄື່ອງໝາຍຮັບຮອງພາກບັງຄັບຂອງຈີນ (China Compulsory Certification – CCC) ຂຶ້ນຍົນໃນທຸກຖ້ຽວບິນພາຍໃນປະເທດ

ຖືເປັນການຍົກລະດັບມາດຕະການຄວາມປອດໄພຄັ້ງສຳຄັນ ຫຼັງເກີດເຫດການທີ່ກ່ຽວຂ້ອງກັບ Power Bank ໄໝ້ກາງອາກາດ ແລະ ບັນຫາດ້ານຄຸນນະພາບທີ່ໜ້າກັງວົນ ໂດຍກົດລະບຽບໃໝ່ທີ່ປະກາດອອກມານີ້ມີຄວາມຊັດເຈນ ແລະ ເຂັ້ມງວດກວ່າເກົ່າຫຼາຍ ໂດຍລະບຸວ່າ Power Bank ທີ່ຈະນຳຂຶ້ນຍົນໃນປະເທດຈີນໄດ້ນັ້ນ ຕ້ອງມີຄຸນສົມບັດນັ້ນຄື:

• ຕ້ອງມີເຄື່ອງໝາຍ CCC ປາກົດຢູ່ເທິງຕົວຜະລິດຕະພັນຢ່າງຊັດເຈນ
• ເຄື່ອງໝາຍ CCC ຫຼື ປ້າຍຂໍ້ມູນຕ່າງໆ ຕ້ອງບໍ່ຈາງ ຫຼື ລົບເລືອນ ຈົນບໍ່ສາມາດອ່ານໄດ້
• ຕ້ອງບໍ່ແມ່ນລຸ້ນທີ່ຢູ່ໃນລາຍການ “ສິນຄ້າທີ່ຖືກເອີ້ນຄືນ” (Product Recall)

CAAC ໃຫ້ເຫດຜົນວ່າ “ເຫດການທີ່ເກີດຂຶ້ນໃນຊ່ວງກ່ອນບົ່ງຊີ້ວ່າ Power Bank ທີ່ຜູ້ໂດຍສານພົກພາຕິດຕົວນັ້ນມີອັນຕະລາຍດ້ານຄວາມປອດໄພ ແລະ ຄຸນນະພາບ ແລະ ຄວາມສ່ຽງຕໍ່ຄວາມປອດໄພການບິນພົນລະເຮືອນກຳລັງເພີ່ມສູງຂຶ້ນ” ເຊິ່ງຫາກຜູ້ໂດຍສານຝ່າຝືນ Power Bank ຈະຖືກຍຶດທີ່ຈຸດກວດຄວາມປອດໄພ ຫຼື ອາດຖືກປະຕິເສດບໍ່ໃຫ້ຂຶ້ນຍົນໄດ້

ເຊິ່ງເຫດຜົນຫຼັກໆ ນັ້ນເກີດຈາກເລື່ອງຂອງບັນຫາພາວເວີແບັງລະເບີດ ຫຼື ເກີດໄຟລຸກເອງຫຼາຍຄັ້ງບໍ່ວ່າຈະເປັນ ເຫດການຈາກ ຖ້ຽວບິນຂອງ China Southern Airlines ທີ່ເກີດບັນຫາ Powerbank ໄຟລຸກຂຶ້ນຈົນເຄື່ອງຈັບຄວັນກວດສອບໄດ້ ແລະ ຖ້ຽວບິນຂອງ Hong Kong Airlines ຕ້ອງປ່ຽນເສັ້ນທາງລົງຈອດສຸກເສີນ ຫຼັງເກີດໄຟໄໝ້ໃນຊ່ອງເກັບເຄື່ອງເທິງບ່ອນນັ່ງຂອງຜູ້ໂດຍສານ ເຊິ່ງຄາດວ່າສາເຫດມາຈາກ Power Bank

ທີ່ໜ້າສົນໃຈໄປກວ່ານັ້ນຄື ບັນຫາບໍ່ໄດ້ເກີດຈາກ Power Bank ທີ່ບໍ່ມີຍີ່ຫໍ້ພຽງຢ່າງດຽວ ແຕ່ຍັງລາມມາເຖິງແບຣນອີເລັກໂທຣນິກລາຍໃຫຍ່ທີ່ຮູ້ຈັກກັນດີ

• Anker ແລະ Romoss: ສອງຜູ້ຜະລິດລາຍໃຫຍ່ເພີ່ງປະກາດ ເອີ້ນຄືນ (Recall) Power Bank ລຸ້ນທີ່ມີບັນຫາລວມກັນກວ່າ 1.2 ລ້ານຊິ້ນທົ່ວໂລກ ເນື່ອງຈາກສ່ຽງຕໍ່ການເກີດອັກຄີໄພ
• Baseus ແລະ Ugreen: ມີລາຍງານວ່າ Power Bank ບາງລຸ້ນຂອງທັງສອງແບຣນນີ້ ຖືກລະງັບ ຫຼື ຖອນໃບຮັບຮອງ CCC ໃນປະເທດຈີນ ເນື່ອງຈາກບັນຫາດ້ານຄວາມປອດໄພ

ຜົນກະທົບທີ່ເກີດຂຶ້ນ

ແນ່ນອນວ່າກົດລະບຽບໃໝ່ນີ້ສົ່ງຜົນກະທົບໂດຍກົງຕໍ່ຜູ້ໂດຍສານທຸກຄົນທີ່ເດີນທາງໃນຖ້ຽວບິນພາຍໃນປະເທດຈີນ ເຊິ່ງລວມເຖິງນັກທ່ອງທ່ຽວຊາວຕ່າງປະເທດທີ່ຕ້ອງເດີນທາງຕໍ່ໄປຍັງເມືອງອື່ນໆ ໃນຈີນເຊັ່ນດຽວກັນ

ສິ່ງທີ່ເຮົາຈະເຮັດໄດ້ນັ້ນຄືການກວດສອບ Power Bank ວ່າມີເຄື່ອງໝາຍນີ້ບໍ່ເຊິ່ງຄວາມຈິງ ແລ້ວການອອກກົດລະບຽບແບບໄວວາ ແບບນີ້ເຮັດໃຫ້ອາດຈະຍັງບໍ່ມີເຄື່ອງໝາຍນີ້ຫຼາຍລວມເຖິງ Powerbank ທີ່ມີການເອີ້ນຄືນໃນບາງຍີ່ຫໍ້

ແລະ ເຖິງວ່າກ່ອນໜ້ານີ້ Power Bank ຈາກແບຣນສາກົນທີ່ໜ້າເຊື່ອຖືເຊິ່ງມີຂໍ້ມູນຄວາມຈຸຊັດເຈນວ່າສາມາດນຳຂຶ້ນຍົນໄດ້ ແຕ່ດ້ວຍກົດລະບຽບໃໝ່ທີ່ລະບຸ “CCC” ຢ່າງຊັດເຈນ ເຮັດໃຫ້ການໃຊ້ Power Bank ທີ່ບໍ່ມີເຄື່ອງໝາຍນີ້ມີຄວາມສ່ຽງທີ່ຈະຖືກເຈົ້າໜ້າທີ່ຍຶດໄວ້ສູງກວ່າເກົ່າຫຼາຍ

ດັ່ງນັ້ນເລື່ອງນີ້ ເປັນສັນຍານຊັດເຈນວ່າມາດຕະຖານຄວາມປອດໄພຂອງອຸປະກອນອີເລັກໂທຣນິກ ໂດຍສະເພາະອຸປະກອນທີ່ມີແບັດເຕີຣີລິທຽມໄອອອນກຳລັງຖືກເອົາໃຈໃສ່ ຢ່າງເຂັ້ມຂົ້ນ ແລະ ສຳລັບຜູ້ບໍລິໂພກ ການເລືອກຊື້ຜະລິດຕະພັນທີ່ຜ່ານການຮັບຮອງມາດຕະຖານທີ່ຊັດເຈນ ບໍ່ແມ່ນພຍງແຕ່ເລື່ອງຂອງຄຸນນະພາບ ແຕ່ຄືເລື່ອງຂອງຄວາມປອດໄພໂດຍກົງ

ສະແດງຄຳຄິດເຫັນ