ແຈ້ງການ

ເຖິງ: ພໍ່ແມ່ປະຊາຊົນ, ພໍ່ຄ້າຊາວຂາຍ, ພະນັກງານລັດຖະກອນ, ນັກຮຽນ-ນັກສຶກສາ, ທະຫານ ແລະ ຕຳຫຼວດ ໃນຂອບເຂດທົ່ວປະເທດ.

ເລື່ອງ: ຍົກສູງສະຕິກ່ອນຮັບ-ຈ່າຍ ທະນະບັດປະເພດໃບ 100.000 ກີບ ລຸ້ນປີ 2020.

ຫ້ອງການ ທະນາຄານແຫ່ງ ສປປ ລາວ ຂໍຖືເປັນກຽດແຈ້ງມາຍັງບັນດາທ່ານຊາບວ່າ:

ໃນປະຈຸບັນໄດ້ມີກຸ່ມຄົນບໍ່ຫວັງດີ ໄດ້ສ້າງຄວາມປັ່ນປ່ວນ ແລະ ຄວາມບໍ່ສະຫງົບໃນສັງຄົມ ດ້ວຍການປອມແປງ ແລະ ນໍາເອົາທະນະບັດ ສະກຸນເງິນກີບ ປະເພດໃບ 100,000 ກີບ ລຸ້ນປີ 2020 ອອກມາໃຊ້ຈ່າຍໃນສັງຄົມ ໂດຍສະເພາະຢູ່ ທາງພາກເໜືອ ເມືອງຮຸນ ແຂວງ ອຸດົມໄຊ,

ຊຶ່ງທາງເຈົ້າໜ້າທີ່ໄດ້ກວດພົບເຫັນ ຕາມເລກລໍາດັບ (Serial number) AA 0435235.

ຮູບແບບການປອມ ແມ່ນການນໍາເອົາຮູບແບບເງິນແທ້ ໄປອັດສໍາເນົາສີ (Copy) ໃສ່ເຈ້ຍ A4 ທຳມະດາ ແລະ ຕິດເສັ້ນນິລະໄພປອມ ຫຼື ເສັ້ນ ປ້ອງກັນປອມໃສ່ໃນໃບທະນະບັດ, ມີຮູບແບບສີສັນລວດລາຍຄ້າຍຄືທະນະບັດແທ້ ປະເພດໃບ 100,000 ກີບ ລຸ້ນປີ 2020.

ສະນັ້ນ, ກ່ອນຈະຮັບ-ຈ່າຍ ທະນະບັດສະກຸນເງິນກີບ ປະເພດໃບ 100,000 ກີບ ລຸ້ນປີ 2020 ທຸກໆຄັ້ງ ຕ້ອງເປັນ ເຈົ້າການກວດກາເບິ່ງໃຫ້ລະອຽດ ຕາມຄຸນລັກສະນະຂອງວິທີການສັງເກດທະນະບັດແທ້ ໃນເອກະສານຊ້ອນທ້າຍຄັດຕິດ ມາພ້ອມນີ້.

ກໍລະນີພົບເຫັນ ຫຼື ຮູ້ຂໍ້ມູນແຫຼ່ງທີ່ມາຂອງທະນະບັດປອມດັ່ງກ່າວ ກະລຸນາແຈ້ງຕໍ່ເຈົ້າໜ້າທີ່ຕຳຫຼວດ ຫຼື ທະນາຄານ ແຫ່ງ ສປປ ລາວ

(ກົມພິມຈຳໜ່າຍ ເບີໂທ 020 58007361, 020 59999632), ສາຂາທະນາຄານແຫ່ງ ສປປ ລາວ ປະຈຳ ພາກເໜືອ ແຂວງອຸດົມໄຊ (856-81) 260012, ແຂວງຫຼວງພະບາງ (856-71) 260700, ແຂວງຊຽງຂວາງ (856-61) 260030; ພາກກາງ ແຂວງສະຫວັນນະເຂດ (856-41) 260305; ພາກໃຕ້ ແຂວງຈໍາປາສັກ (856-31) 214129 ແລະ ທະນາຄານທຸລະກິດໃນຂອບເຂດທົ່ວປະເທດ.

ດັ່ງນັ້ນ, ຈຶ່ງແຈ້ງມາຍັງທຸກພາກສ່ວນເພື່ອຊາບ ແລະ ຈົ່ງຍົກສູງສະຕິລະວັງຕົວໃນການຮັບ-ຈ່າຍ ທະນະບັດ ສະກຸນເງິນກີບ ປະເພດໃບ 100,000 ກີບ ລຸ້ນປີ 2020 ທຸກໆຄັ້ງ ຕາມທີ່ລະບຸໄວ້.

ທີ່ມາ: ທະນາຄານແຫ່ງ ສປປ ລາວ

ສະແດງຄຳຄິດເຫັນ