ໂຮຊອນ ນິວ ເອເນີຍີ ອອໂຕ້ໂມບິລ (Hozon New Energy Automobile) ເຈົ້າຂອງແບຣນ ລົດຍົນໄຟຟ້າເນຕ້າ (Neta) ໄດ້ເລີ່ມຂະບວນການຊອກຫາຜູ້ລົງທຶນທີ່ມີສະມັດຖະພາບ ໂດຍມີຈຸດປະສົງເພື່ອກັບມາດຳເນີນສາຍການຜະລິດໄດ້ອີກຄັ້ງ ໃນຂະນະທີ່ບໍລິສັດຢູ່ລະຫວ່າງການປັບໂຄງສ້າງອົງກອນເພື່ອແກ້ໄຂບັນຫາໜີ້ສິນ

ໂຮຊອນ ອອໂຕ້ ຖະແຫຼງວ່າ ບໍລິສັດຈະໃຫ້ສິດແກ່ຜູ້ລົງທຶນທີ່ພ້ອມສະໜັບສະໜູນທາງການເງິນເພື່ອໃຫ້ໂຮງງານຜະລິດຂອງບໍລິສັດກັບມາເປີດດຳເນີນການຫຼັງຈາກຢຸດຊະງັກໄປຕັ້ງແຕ່ເດືອນພະຈິກທີ່ຜ່ານມາ ພ້ອມລະບຸເພີ່ມເຕີມວ່າ ຜູ້ລົງທຶນທີ່ພ້ອມສະໜັບສະໜູນເງິນທຶນເພື່ອໃຊ້ໃນການປັບໂຄງສ້າງອົງກອນ ຈະໄດ້ຮັບການພິຈາລະນາເປັນພິເສດ

ທັງນີ້ ບໍລິສັດຜູ້ຜະລິດລົດຈາກຊຽງໄຮ້ລາຍນີ້ຍັງລະບຸອີກດ້ວຍວ່າ ຜູ້ລົງທຶນທີ່ສົນໃຈຈະຕ້ອງນຳສະເໜີແຜນການລົງທຶນ ແຜນການກັບມາດຳເນີນສາຍການຜະລິດ ແຜນການຈັດສັນພະນັກງານ ແຜນການດຳເນີນງານຂອງບໍລິສັດຫຼັງການປັບໂຄງສ້າງ ແລະ ລາຍລະອຽດອື່ນໆ ໃນຂໍ້ສະເໜີການລົງທຶນ

ໂຮຊອນ ອໍໂຕ້ ຊີ້ແຈງວ່າ ອຸປະກອນການຜະລິດຂອງ Neta ຍັງຄົງເຮັດວຽກໄດ້ຕາມປົກກະຕິ ພ້ອມເສີມວ່າ ແບຣນຍັງມີພະນັກງານຫຼາຍກວ່າ 400 ຄົນ ລວມເຖິງທີມຜູ້ບໍລິຫານ ແລະ ເຈົ້າໜ້າທີ່ດ້ານເທັກນິກ ຊຶ່ງເຮັດໃຫ້ບໍລິສັດມີຄວາມພ້ອມທີ່ຈະກັບມາດຳເນີນງານໄດ້ອີກຄັ້ງ

ນອກຈາກນີ້ Neta ເປີດໂຕລົດລຸ້ນແລກທີ່ຜະລິດເພື່ອຈຳໜ່າຍໃນເດືອນກໍລະກົດ 2018 ແລະ ມີຍອດສົ່ງມອບສູງເຖິງ 152,000 ຄັນໃນປີ 2022

ຊຶ່ງຄອບຄອງອັນດັບຫນຶ່ງໃນບັນດາສະຕາດອັບລົດ EV ຈີນ, ເຖິງຢ່າງໃດກໍ່ຕາມ ຍອດຂາຍຂອງ Neta ຫຼຸດລົງຢ່າງຕໍ່ເນື່ອງ ເຫຼືອພຽງ 85,900 ຄັນໃນຊ່ວງ 10 ເດືອນທຳອິດຂອງປີທີ່ຜ່ານມາ ກ່ອນທີ່ຈະມີການລະງັບການຜະລິດ ແລະ ບໍລິສັດແມ່ຄືໂຮຊອນ ອອໂຕ້ ໄດ້ເຂົ້າສູ່ຂະບວນການລົ້ມລະລາຍຢ່າງເປັນທາງການເມື່ອວັນທີ 19 ມິຖຸນາ 2025 ທີ່ຜ່ານມາ

ສະແດງຄຳຄິດເຫັນ