ເຈົ້າໜ້າທີ່ສະຫະລັດເປີດເຜີຍວ່າ ມີຜູ້ສູນຫາຍ 7 ຄົນ ຫຼັງຈາກເກີດໄຟໄໝ້ ແລະ ລະເບີດຮຸນແຮງທີ່ໂຮງງານດອກໄມ້ໄຟທາງດ້ານການຄ້າແຫ່ງໜຶ່ງໃນເຂດຊົນນະບົດທາງຕອນເໜືອຂອງລັດແຄລິຟໍເນຍ

ພາບທາງອາກາດຈາກສະຖານີໂທລະທັດທ້ອງຖິ່ນ ສະແດງໃຫ້ເຫັນອາຄານຂະໜາດໃຫຍ່ທີ່ຄ້າຍຄືໂກດັງລະເບີດເປັນຊິ້ນສ່ວນເລັກຊິ້ນນ້ອຍໆ

ເມື່ອແລງວັນອັງຄານ 1 ກໍລະກົດ 2025 ຕາມເວລາທ້ອງຖິ່ນ ໂດຍມີລູກໄຟຂະໜາດໃຫຍ່ຈາກການລະເບີດດັງສົ່ງແສງສະຫວ່າງໄປທົ່ວບໍລິເວນຊຸມຊົນເອສປາໂຕ ໃນເຂດໂຍໂລເຄົາຕີ້ ເຊິ່ງຢູ່ຫ່າງຈາກເມືອງຊາກາເມນໂຕເມືອງຫຼວງຂອງລັດແຄລິຟໍເນຍ ໄປທາງຕະວັນຕົກປະມານ 64 ກມ.

ການລະເບີດຍັງສົ່ງຜົນໃຫ້ເກີດກຸ່ມຄວັນດຳ ຕາມມາດ້ວຍການລະເບີດນ້ອຍໆ ອີກຫຼາຍສິບຄັ້ງໃນທ້ອງຟ້າເຫນືອພື້ນທີ່ດັ່ງກ່າວ ເຊິ່ງຄາດວ່າເກີດຈາກດອກໄມ້ໄຟທີ່ເກັບໄວ້ໃນໂຮງງານ

ເປວໄຟລຸກລາມຈາກການລະເບີດດັ່ງກ່າວໄດ້ເຜົາພືດໃນບໍລິເວນອ້ອມຮອບ ໂດຍພື້ນທີ່ປະມານ 197 ໄຮ່ ໃນເບື້ອງຕົ້ນພົບຜູ້ໄດ້ຮັບບາດເຈັບ 2 ຄົນ ທີ່ໄດ້ຮັບການຮັກສາ ແລະ ມີຜູ້ສູນຫາຍອີກ 7 ຄົນ

ທ່ານເຄີທິສ ລໍເຣັນສ໌ ຫົວໜ້າສຳນັກງານດັບເພີງຂອງເຂດປ້ອງກັນອັກຄີໄພເອສປາໂຕ ກ່າວວ່າ ສາເຫດຂອງເຫດການເກີດຂຶ້ນສາມວັນກ່ອນການລະເຫຼີມສະຫລອງວັນປະກາດເອກະລາດຂອງສະຫະລັດໃນວັນທີ 4 ກໍລະກົດ ເຊິ່ງໂດຍປົກກະຕິຈະມີການຈຸດດອກໄມ້ໄຟ ຢູ່ລະຫວ່າງການສອບສວນຂອງສຳນັກງານຜູ້ບັງຄັບການດັບເພີງຂອງລັດ

ເຈົ້າໜ້າທີ່ກ່າວວ່າ ນັກດັບເພີງແລະເຈົ້າໜ້າທີ່ຮັບມືເຫດສຸກເສີນອື່ນໆ ກຳລັງຮັກສາໄລຍະຫ່າງທີ່ປອດໄພຈາກສະຖານທີ່ເກີດເຫດ ຂະນະທີ່ທີມງານຍັງຄົງປະເມີນຄວາມສ່ຽງທີ່ເກີດຂຶ້ນຈາກດອກໄມ້ໄຟ ເຊິ່ງຍັງຄົງເກີດການປະທຸຂຶ້ນເປັນລະຍະໆ ຈົນເຖິງແລງວັນພຸດ

ລໍເຣັນສ໌ກ່າວວ່າ ທີມຕ່າງໆ ກຳລັງບິນໂດຣນ ແລະ ເຄື່ອງບິນເໜືອພື້ນທີ່ເພື່ອຄົ້ນຫາຜູ້ສູນຫາຍແລະຕິດຕາມອັນຕະລາຍທີ່ຍັງຄົງຫລົງເຫຼືອຢູ່

ເຈົ້າໜ້າທີ່ປະຕິເສດທີ່ຈະເປີດເຜີຍວ່າຜູ້ສູນຫາຍເປັນພະນັກງານຂອງໂຮງງານ ຫຼື ຜູ້ເຫັນເຫດການ ແຕ່ເຈົ້າຫນ້າທີ່ກ່າວວ່າບໍ່ມີຜູ້ເສຍຊີວິດໃນກຸ່ມນັກດັບເພີງ ຫຼື ເຈົ້າໜ້າທີ່ສຸກເສີນອື່ນໆ

ທ່ານລໍເຣັນສ໌ກ່າວວ່າ ມີການກຳນົດເຂດອົບພະຍົບອ້ອມພື້ນທີ່ດັ່ງກ່າວ ແລະ ບ້ານເຮືອນ ແລະ ຟາມປະມານ 150 ແຫ່ງບໍ່ມີໄຟຟ້າໃຊ້ເນື່ອງມາຈາກເຫດການດັ່ງກ່າວ

ລາວອະທິບາຍວ່າໂຮງງານທີ່ຖືກທຳລາຍດັ່ງກ່າວເປັນທຸລະກິດການຜະລິດດອກໄມ້ໄຟ ທີ່ໄດ້ຮັບໃບອະນຸຍາດ ເຊິ່ງກ່ຽວຂ້ອງກັບການຂາຍດອກໄມ້ໄຟທາງດ້ານການຄ້າ ເພື່ອຈັດສະແດງຕໍ່ສາທາລະນະ ແຕ່ຍັງບໍ່ຊັດເຈນວ່າດອກໄມ້ໄຟ ຖືກເກັບໄວ້ໃນພື້ນທີ່ນັ້ນເທົ່ານັ້ນ ຫຼື ຜະລິດຂຶ້ນໃນພື້ນທີ່ນັ້ນດ້ວຍ

ສະແດງຄຳຄິດເຫັນ