ເຈົ້າໜ້າທີ່ກູ້ໄພໃນລັດເທັກຊັສກຳລັງເຮັດວຽກແຂ່ງກັບເວລາ ເພື່ອຕາມຫາຜູ້ສູນຫາຍຫຼາຍສິບຄົນ ໃນເຫດການນ້ຳຖ້ວມກະທັນຫັນທີ່ເກີດຂຶ້ນຫຼາຍຈຸດໃນພາກກາງຂອງລັດເທັກຊັສ

ລວມທັງເດັກນ້ອຍຈາກຄ່າຍລະດູຮ້ອນທີ່ຖືກກະແສນ້ຳພັດພາໄປ ໃນຂະນະທີ່ຈຳນວນຜູ້ເສຍຊີວິດເພີ່ມຂຶ້ນເປັນ 78 ຄົນ ແລະ ສູນຫາຍ 41 ຄົນ

ເຫດການນ້ຳຖ້ວມກະທັນຫັນເລີ່ມຂຶ້ນໃນຊ່ວງເຊົ້າວັນສຸກທີ່ຜ່ານມາ ຕາມເວລາທ້ອງຖິ່ນ ໃນຈຸດທີ່ຫ່າງຈາກເມືອງຊານອັນໂຕນິໂອໄປທາງຕາເວັນຕົກສຽງເໜືອ 65 ໄມລ໌ ຫຼັງຈາກຝົນຕົກໜັກຈົນເຮັດໃຫ້ນ້ຳໃນແມ່ນ້ຳກົວດາລູເປ (Guadalupe) ລົ້ນ

ໜຶ່ງໃນສະຖານທີ່ທີ່ໄດ້ຮັບຜົນກະທົບແມ່ນ “ແຄມປ໌ ມິສຕິກ” (Camp Mystic) ຄ່າຍລະດູຮ້ອນສຳລັບເດັກຍິງ ທີ່ຕັ້ງຢູ່ໃກ້ກັບແມ່ນ້ຳກົວດາລູເປ ໂດຍກະແສນ້ຳເພີ່ມສູງຂຶ້ນເຖິງ 8 ແມັດ ພາຍໃນເວລາ 45 ນາທີ ແລະ ພັດພາເດັກນ້ອຍໄປຈຳນວນໜຶ່ງ

ດ້ານທ່ານ ແດນ ແພທິຣິກ ຮອງຜູ້ວ່າການລັດເທັກຊັສແຈງວ່າ ອາດເກີດນ້ຳຖ້ວມເພີ່ມອີກ ໂດຍສຳນັກງານບໍລິການສະພາບອາກາດແຫ່ງຊາດ (NWS) ເຕືອນວ່າ ພາຍຸຝົນຟ້າຄະນອງເຄື່ອນຕົວຊ້າ ອາດເຮັດໃຫ້ເກີດນ້ຳຖ້ວມກະທັນຫັນໃນພາກກາງຂອງເທັກຊັສເພີ່ມເຕີມ // ສ່ວນທ່ານ ເກຣັກ ແອບບ໌ອັດ ຜູ້ວ່າການລັດເທັກຊັສໃຫ້ຄຳໝັ້ນວ່າ ພວກເຂົາຈະບໍ່ຢຸດຊອກຫາຈົນກວ່າຈະພົບເດັກທີ່ຫາຍໄປຄົບທຸກຄົນ

ທັງນີ້ ຊາວເທັກຊັສຫຼາຍຄົນເດີນທາງໄປຍັງເຂດເຄີ ເຄົາຕີ້ ເພື່ອອາສາເຂົ້າຮ່ວມປະຕິບັດການຊອກຫາຜູ້ສູນຫາຍຂອງເຈົ້າໜ້າທີ່ ໂດຍບາງຄົນໃຊ້ໂດຣນສ່ວນຕົວອອກຊອກຫາ ແຕ່ທາງການເທັກຊັສຮຽກຮ້ອງໃຫ້ພວກເຂົາຢຸດເຮັດ ເນື່ອງຈາກອາດເປັນອັນຕະລາຍຕໍ່ເຄື່ອງບິນກູ້ໄພ

ປະທານາທິບໍດີໂດນັລດ໌ ທຣັມ ຂອງສະຫະລັດ ລົງນາມໃນກົດໝາຍປະກາດໄພພິບັດໃຫຍ່ສຳລັບເທດສະມົນຊາຍເຄີ ລັດເທັກຊັສແລ້ວ ເມື່ອວານນີ້ (6 ກໍລະກົດ) ຕາມເວລາທ້ອງຖິ່ນ ເພື່ອລະດົມຄວາມຊ່ວຍເຫຼືອ ແລະ ຊັບພະຍາກອນຈາກສ່ວນກາງ ລົງໄປຊ່ວຍປະຕິບັດການກູ້ໄພ ແລະ ຟື້ນຟູຄວາມເສຍຫາຍຈາກເຫດການນ້ຳຖ້ວມກະທັນຫັນຄັ້ງໃຫຍ່ໃນພື້ນທີ່

ຕໍ່ມາ ທຣັມ ໂພສຂໍ້ຄວາມໃນສື່ມວນຊົນສັງຄົມອອນລາຍ ທູດ ໂຊຊຽວ ລະບຸວ່າ ການປະກາດໄພພິບັດເປັນການສ້າງຫຼັກປະກັນວ່າ ທີມກູ້ໄພທີ່ກ້າຫານໄດ້ມີຊັບພະຍາກອນທີ່ພວກເຂົາຕ້ອງການໂດຍທັນທີ ຄອບຄົວຜູ້ປະສົບໄພກຳລັງພົບກັບເລື່ອງທີ່ໜ້າເສົ້າທີ່ຈິນຕະນາການບໍ່ອອກ ຫຼາຍຄົນສູນເສຍຊີວິດ ແລະ ຫຼາຍຄົນຍັງສູນຫາຍ

ສະແດງຄຳຄິດເຫັນ