ທີມນັກໂບຮານຄະດີຄົ້ນພົບຫຼັກຖານທີ່ບົ່ງຊີ້ວ່າມະນຸດນີແອນເດີທານໃນຍຸກກ່ອນປະຫວັດສາດເມື່ອປະມານ 125,000 ປີກ່ອນ ມີການແປຮູບໄຂກະດູກຈາກສັດຢ່າງເປັນລະບົບໃນພື້ນທີ່ Neumark-Nord ທາງຕອນໃຕ້ຂອງເມືອງຮັນເລີ ປະເທດເຢຍລະມັນ ການຄົ້ນພົບນີ້ຖືກປຽບທຽບວ່າເປັນ “ໂຮງງານໄຂມັນ” ແຫ່ງທຳອິດຂອງມະນຸດຊາດ

ວິທີການເລືອກເຫຍື່ອ ແລະ ສະກັດໄຂມັນ

ນັກຄົ້ນຄວ້າວິເຄາະຊິ້ນສ່ວນກະດູກກວ່າ 120,000 ຊິ້ນ ແລະ ເຄື່ອງມືຫີນກວ່າ 16,000 ຊິ້ນ ທີ່ພົບຄຽງຄູ່ກັບຫຼັກຖານການໃຊ້ໄຟ ເພື່ອສະກັດໄຂມັນຂອງສັດສຳລັບໃຊ້ເປັນອາຫານ ແລະ ຍຸດທະສາດການຢູ່ລອດຂອງມະນຸດນີແອນເດີທານ

ທີມງານນັກຄົ້ນຄວ້າເຊື່ອວ່າມະນຸດນີແອນເດີທານເລືອກເຫຍື່ອຂະໜາດໃຫຍ່ ເຊັ່ນ: ມ້າ ກວາງ ແລະ ອໍຣອກ (ງົວປ່າໂບຮານທີ່ສູນພັນໄປແລ້ວ) ໂດຍເນັ້ນເລາະເອົາກະດູກຊິ້ນຍາວທີ່ມີໄຂກະດູກສະສົມຢູ່ຫຼາຍທີ່ສຸດ ແລະ ໃຊ້ຄ້ອນຫີນທຸບກະດູກໃຫ້ເປັນຊິ້ນນ້ອຍໆ ກ່ອນນຳຊິ້ນສ່ວນກະດູກໄປຕົ້ມໃນພາຊະນະ (ຄາດວ່າເປັນຫນັງສັດຫຼືເປືອກໄມ້) ເປັນເວລາຫຼາຍຊົ່ວໂມງ ເມື່ອໄຂມັນລອຍຂຶ້ນມາເທິງໜ້ານ້ຳ ກໍຈະລໍຖ້າໃຫ້ເຢັນ ແລະ ຕັກອອກມາເກັບໄວ້

ການແປຮູບໄຂມັນແບບນີ້ສະແດງໃຫ້ເຫັນເຖິງການວາງແຜນ ການຈັດອົງການ ແລະ ຄວາມເຂົ້າໃຈດ້ານໂພຊະນາການຢ່າງເລິກເຊິ່ງ ເພາະໄຂມັນຖືເປັນແຫຼ່ງພະລັງງານສຳຄັນ ໂດຍສະເພາະໃນຊ່ວງລະດູໜາວທີ່ອາຫານຂາດແຄນ ແລະ ຍັງຊ່ວຍຫຼີກລ່ຽງພາວະ “ພິດໂປຣຕີນ” ທີ່ອາດເກີດຈາກການບໍລິໂພກຊີ້ນບໍ່ຕິດມັນຫຼາຍເກີນໄປ

ນອກຈາກນີ້ ການຂຸດຄົ້ນຍັງພົບຫຼັກຖານຂອງພືດເຜົາ ເຊັ່ນ: ລູກໂອກ ເຮເຊນັດ ແລະ ລູກພລັມສະໂລວ໌ ທີ່ອາດຖືກນຳມາໃຊ້ປຸງຮົດ “ນ້ຳແກງໄຂມັນ” ເພື່ອເພີ່ມລົດຊາດ ແລະ ຄຸນຄ່າທາງອາຫານ

ມະນຸດນີແອນເດີທານແມ່ນໃຜ?

ສຳລັບມະນຸດນີແອນເດີທານ (Neanderthal) ຫຼື ມີຊື່ທາງວິທະຍາສາດວ່າ Homo neanderthalensis ຄື ມະນຸດສາຍພັນໜຶ່ງທີ່ສູນພັນໄປແລ້ວ ແລະ ຖືເປັນພີ່ນ້ອງໃກ້ຊິດທີ່ສຸດຂອງມະນຸດຍຸກປັດຈຸບັນ (Homo sapiens) ພວກເຂົາມີຊີວິດຢູ່ໃນຊ່ວງກວ້າງຂອງທະວີບຢູໂຣບ ແລະ ອາຊີຕາເວັນຕົກ ຈົນກະທັ່ງສູນພັນໄປເມື່ອປະມານ 40,000 ປີກ່ອນ

ຮູບຮ່າງເຕີ້ຍ ແລະ ມີຮ່າງກາຍທີ່ແຂງແຮງ ມີກ້າມເນື້ອເປັນມັດ ເໝາະສົມກັບການໃຊ້ຊີວິດໃນສະພາບອາກາດໜາວເຢັນ ກະໂຫຼກຫົວທີ່ຍາວ ແລະ ສ່ວນຫຼັງຍື່ນອອກມາ ມີໂຫນກຄິ້ວທີ່ຫນາ ແລະ ເດັ່ນ ດັງສູງທີ່ກວ້າງ ແລະ ມີຂະໜາດສະໝອງໂດຍສະເລ່ຍໃຫຍ່ເທົ່າກັບ ຫຼື ໃຫຍ່ກວ່າມະນຸດປັດຈຸບັນ ມີກະດູກທີ່ຫນາ ແລະ ຂໍ້ຕໍ່ຂະໜາດໃຫຍ່ ທີ່ບົ່ງບອກເຖິງຄວາມແຂງແຮງທາງຮ່າງກາຍ ກ້າມເນື້ອອາດແຂງແຮງກວ່າມະນຸດຍຸກປັດຈຸບັນ (Homo sapiens)

ມະນຸດນີແອນເດີທານອາດມີປັນຍາຫຼາຍກວ່າທີ່ຄິດ

ສາດສະດາຈານ ວິລ ໂຣບູກສ໌ ຈາກມະຫາວິທະຍາໄລ Leiden ໜຶ່ງໃນຜູ້ຮ່ວມວິໄຈ ກ່າວວ່າ ການຄົ້ນພົບນີ້ຊ່ວຍລຶບພາບຈຳຜິດທີ່ວ່າມະນຸດນີແອນເດີທານເປັນເຜົ່າພັນທີ່ບໍ່ມີທັກສະ ຫຼື ເຊື່ອຍຊາ ແລະ ຢືນຢັນວ່າພວກເຂົາຄືເປັນ “ນັກວາງແຜນຊັ້ນຍອດ” ທີ່ມີຄວາມສາມາດໃນການຈັດການຊັບພະຍາກອນຢ່າງມີປະສິດທິພາບ

ລູໂດວິກ ສະລິມັກ ນັກໂບຮານຄະດີຈາກຝຣັ່ງທີ່ບໍ່ໄດ້ມີສ່ວນຮ່ວມໃນການວິໄຈ ກ່າວເສີມວ່າ ນີ້ຄືຫຼັກຖານທາງໂບຮານຄະດີທີ່ຊັດເຈນຄັ້ງທຳອິດວ່າ ມະນຸດນີແອນເດີທານບໍ່ພຽງແຕ່ເຫັນຄຸນຄ່າຂອງໄຂມັນໃນກະດູກ ແຕ່ຍັງພັດທະນາວິທີການສະເພາະໃນການສະກັດ ແລະ ໃຊ້ໄຂມັນຢ່າງມີລະບົບອີກດ້ວຍ

ສະແດງຄຳຄິດເຫັນ