ທີ່ໄຕ້ຫວັນ ມີລາຍງານຜູ້ເສຍຊີວິດ 2 ຄົນ ແລະ ບາດເຈັບກວ່າ 300 ຄົນ ຈາກເຫດພາຍຸ “ດານັສ” ຖະລົ່ມເມື່ອວັນທີ່ 6-7 ກໍລະກົດ

ວັນທີ່ 7 ກໍລະກົດ ຄົວເຮືອນເກືອບ 400,000 ຫຼັງຄາເຮືອນໃນໄຕ້ຫວັນບໍ່ມີໄຟຟ້າໃຊ້ ຫຼັງຈາກພາຍຸໄຕ້ຝຸ່ນ “ດານັສ” ພັດຖະລົ່ມຕາຝັ່ງທາງຕາເວັນຕົກສຽງໃຕ້ຂອງເກາະ ລວມທັງຄ່າຊີວິດຜູ້ຄົນໄປຢ່າງໜ້ອຍ 2 ຄົນ ແລະ ມີຜູ້ບາດເຈັບອີກ ຫຼາຍກວ່າ 300 ຄົນ

ສຳນັກງານອຸຕຸນິຍົມວິທະຍາກາງຂອງໄຕ້ຫວັນລາຍງານວ່າ ພາຍຸໄຕ້ຝຸ່ນດານັສພັດຂຶ້ນຝັ່ງໃນເຂດເຈຍອີ້ມື້ຄືນວັນທີ່ 6 ກໍລະກົດ ດ້ວຍຄວາມຮຸນແຮງທຽບເທົ່າເຮີລິເຄນລະດັບ 1 ພາຍຸນີ້ເຄື່ອນຕົວອອກຈາກຕາຝັ່ງໃນຊ່ວງເຊົ້າຂອງວັນທີ່ 7 ກໍລະກົດ ວັນຈັນ ແລະ ກຳລັງເຂົ້າໃກ້ຈີນແຜ່ນດິນໃຫຍ່ໂດຍອ່ອນກຳລັງລົງເປັນພາຍຸໂຊນຮ້ອນ

ຄວາມເສຍຫາຍໃນໄຕ້ຫວັນຈາກພາຍຸດານັສ

ຕາມລາຍງານ ໃນຊ່ວງບ່າຍວັນທີ່ 7 ກໍລະກົດ ຄົວເຮືອນເກືອບ 400,000 ຫຼັງຄາເຮືອນທົ່ວເກາະບໍ່ມີໄຟຟ້າໃຊ້ ໂຮງຮຽນ ແລະ ທຸລະກິດໃນເມືອງ ຫຼາຍສິບແຫ່ງຕ້ອງປະກາດປິດບໍລິການຊົ່ວຄາວ

ໄຕ້ຝຸ່ນລະດູຮ້ອນເປັນເລື່ອງປົກກະຕິໃນໄຕ້ຫວັນ ແຕ່ໂດຍປົກກະຕິຈະພັດຂຶ້ນຝັ່ງເທິງຕາຝັ່ງຕາເວັນອອກຂອງເກາະທີ່ເປັນພູເຂົາ ແລະ ມີປະຊາກອນເບົາບາງ ສຳນັກງານອຸຕຸນິຍົມວິທະຍາກາງໄຕ້ຫວັນກ່າວວ່າ ພາຍຸດານັສເປັນພາຍຸໄຕ້ຝຸ່ນລູກທຳອິດທີ່ພັດຂຶ້ນຝັ່ງໃນເຂດເຈຍອີ້ ນັບຕັ້ງແຕ່ຫນ່ວຍງານເລີ່ມບັນທຶກຂໍ້ມູນພາຍຸໄຕ້ຝຸ່ນຢ່າງລະອຽດຕັ້ງແຕ່ປີ 1958

ປະທານາທິບໍດີໄຕ້ຫວັນ ໄລ່ ຊິງເຕີ ໂພສຂຶ້ນໂຊຊຽວມີເດຍວ່າ ພາຍຸໄຕ້ຝຸ່ນລູກນີ້ເຄື່ອນຕົວຕາມເສັ້ນທາງທີ່ບໍ່ຄ່ອຍເກີດຂຶ້ນປານໃດ “ທັງໄຕ້ຫວັນໄດ້ຮັບຜົນກະທົບຈາກລົມແລະຝົນຢ່າງຕໍ່ເນື່ອງ”

ຜູ້ເສຍຊີວິດທີ່ໄດ້ຮັບການຢືນຢັນ 2 ຄົນເກີດຂຶ້ນໃນໄຖຫນານ ເມືອງທີ່ເກົ່າແກ່ທີ່ສຸດຂອງເກາະ ແລະ ເປັນອະດີດເມືອງຫຼວງ ໂດຍຊາຍ ອາຍຸ 60 ປີເສຍຊີວິດ ຫຼັງຈາກພາຍຸໄຕ້ຝຸ່ນເຮັດໃຫ້ໄຟຟ້າດັບຈົນເຄື່ອງຊ່ວຍຫາຍໃຈດັບ ແລະ ອີກຄົນເປັນຊາຍອາຍຸ 69 ປີຖືກຕົ້ນໄມ້ລົ້ມທັບເສຍຊີວິດ

ສະແດງຄຳຄິດເຫັນ