ກອງກຳລັງປ້ອງກັນຕົນເອງອິສຣາເອນ (IDF) ຫຼື ກອງທັບອິສຣາເອນ ອອກມາລະບຸວ່າ ໂຈມຕີໃສ່ກຸ່ມກະບົດຮູຕີໃນດິນແດນເຢເມນ ເມື່ອກາງເດິກທີ່ຜ່ານມາຈົນເຖິງຊ່ວງເຊົ້າມື້ນີ້ (7 ກໍລະກົດ) ຕາມເວລາທ້ອງຖິ່ນ ໂດຍນັບເປັນການໂຈມຕີໃສ່ກຸ່ມກະບົດຮູຕີ ເປັນຄັ້ງທຳອິດຂອງອິສຣາເອນ ນັບຕັ້ງແຕ່ທີ່ບັນລຸຂໍ້ຕົກລົງຢຸດຍິງກັບອີຣ່ານ

ກອງທັບອິສຣາເອນ ລະບຸວ່າ ກ່ອນຫນ້ານີ້ ຮູຕີຍິງຂີປະນາວຸດໃສ່ດິນແດນອິສຣາເອນ ຢ່າງຫນ້ອຍ 3 ລູກ ນັບຕັ້ງແຕ່ທີ່ອິສຣາເອນຢຸດຍິງກັບອີຣ່ານ ໂດຍໜຶ່ງໃນນັ້ນຖືກຍິງສະກັດເອົາໄວ້ໄດ້ເມື່ອວັນເສົາ (5 ກໍລະກົດ) ທີ່ຜ່ານມາ

ສ່ວນເປົ້າຫມາຍການໂຈມຕີຂອງກອງທັບອິສຣາເອນ ຄື ເມືອງສຳຄັນໃນເຢເມນ ແລະ ໂຮງງານໄຟຟ້າທີ່ຢູ່ໃກ້ກັບທະເລແດງ ລວມເຖິງເຮືອບັນທຸກສິນຄ້າ “ແກແລັກຊີ່ ລີດເດີ”

ທີ່ຖືກກຸ່ມກະບົດຮູຕີ ຍຶດເອົາໄວ້ຕັ້ງແຕ່ເມື່ອເດືອນພະຈິກ ປີ 2023 ໂດຍອິສຣາເອນໃຫ້ເຫດຜົນໃນການໂຈມຕີວ່າ ຮູຕີ ໃຊ້ປະໂຫຍດຈາກການຕິດຕັ້ງລະບົບເຣດາເອົາໄວ້ເທິງເຮືອລຳດັ່ງກ່າວ ເພື່ອຕິດຕາມເສັ້ນທາງເດີນເຮືອນາໆຊາດ ຊຶ່ງຈະຊ່ວຍໃຫ້ງ່າຍໃນປະຕິບັດການກໍ່ການຮ້າຍ

ອິສຣາເອນ ແຄັດຊ໌ ລັດຖະມົນຕີກະຊວງປ້ອງກັນປະເທດອິສຣາເອນ ລະບຸວ່າ ປະຕິບັດການໂຈມຕີກຸ່ມກະບົດຮູຕີໃນເຢເມນຄັ້ງນີ້ ຢູ່ພາຍໃຕ້ປະຕິບັດການໃໝ່ທີ່ມີຊື່ວ່າ “ແບລັກ ແຟລັກ” ຫຼື ປະຕິບັດການທຸງດຳ ພ້ອມກັບລະບຸວ່າ ຮູຕີຈະຕ້ອງຊົດໃຊ້ຕໍ່ການກະທຳຂອງພວກເຂົາ ແລະ ເຕືອນອີກດ້ວຍວ່າ ຈະຍົກລະດັບການໂຈມຕີຂຶ້ນອີກຫາກຮູຕີຍັງຄົງໂຈມຕີໃສ່ອິສຣາເອນຕໍ່

ສ່ວນດ້ານກຸ່ມກະບົດຮູຕີ ກໍອອກມາຍອມຮັບເລື່ອງທີ່ຖືກກອງທັບອິສຣາເອນໂຈມຕີ ແຕ່ກໍຍືນຢັນວ່າ ລະບົບຕໍ່ຕ້ານອາກາດຍານຂອງເຢເມນ ສາມາດຮັບມືການໂຈມຕີຂອງອິສຣາເອນໄດ້ຢ່າງມີປະສິດຕິພາບ ແລະ ຍັງບໍ່ມີການສູນເສຍເກີດຂຶ້ນຈາກການໂຈມຕີຂອງອິສຣາເອນ

ຂະນະທີ່ຕົວແທນຝ່າຍການເມືອງຂອງກຸ່ມຮູຕີ ກໍອອກມາປະນາມການໂຈມຕີຂອງອິສຣາເອນ ທີ່ມຸ່ງເປົ້າໄປຍັງທ່າເຮືອສຳຄັນ ແລະ ໂຮງໄຟຟ້າ ລວມເຖິງລະບົບໂຄງສ້າງພື້ນຖານອື່ນໆ ຂອງພົນລະເຮືອນ ແຕ່ທາງອິສຣາເອນກໍໂຕ້ວ່າ ກ່ອນຫນ້າທີ່ຈະໂຈມຕີ ພວກເຂົາມີການປະກາດເຕືອນໃຫ້ປະຊາຊົນອົບພະຍົບອອກຈາກພື້ນທີ່ທີ່ຈະໂຈມຕີທັງຫມົດແລ້ວ

ສະແດງຄຳຄິດເຫັນ