ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງບໍ່ແກ້ວ ລາຍງານວ່າ: ໃນຄັ້ງວັນທີ່ 03 ກໍລະກົດ 2025,

ທາງເຈົ້າໜ້າທີ່ປະຈໍາຈຸດກວດການໍ້າທຸງໄດ້ເຮັດວຽກປົກກະຕິ, ຮອດເວລາ ປະມານ 13 ໂມງ, ໄດ້ກວດກາລົດເມ, ສີຂາວ ປ້າຍທະບຽນ ກກ 0513 ອຸດົມໄຊ, ແລ່ນມາແຕ່ທາງຫ້ວຍຊາຍ ຈະໄປ ແຂວງອຸດົມໄຊ. ມີຜູ້ຂັບຂີ່ມານຳລົດ ຈຳນວນ 02 ຄົນຄື:

1. ທ້າວ ນະມີໄຊ ຈະເບ້ຍນີ ອາຍຸ 28 ປີ, ອາຊີບ ຂັບລົດ, ເຊື້ອຊາດ – ສັນຊາດ ລາວ, ຢູ່ ບ້ານ ກູໜຶ່ງ, ເມືອງ ນາໝໍ້, ແຂວງ ອຸດົມໄຊ.
2. ທ້າວ ບີຊົງ ຈົ່ງລື ອາຍຸ 23 ປີ, ອາຊີບ ຂັບລົດ, ເຊື້ອຊາດ- ສັນຊາດ ລາວ, ຢູ່ ບ້ານ ຢ້າວໃຫຍ່, ເມືອງ ໄຊ, ແຂວງ ອຸດົມໄຊ.

ຜ່ານການກວດກາແມ່ນພົບເຫັນລົດມີການດັດແປງສະພາບສຸກເຊື່ອງຢາເສບຕິດຈຶ່ງໄດ້ກັກຜູ້ຂັບຂີ່ທັງ 02 ຄົນ ພ້ອມທັງເອົາລົດຄັນດັ່ງກ່າວມາກວດຄົ້ນຢູ່ກອງບັນຊາການ, ຜ່ານການກວດຄົ້ນແມ່ນພົບເຫັນ ຢາບ້າ ຈໍານວນ277 ມັດ, ເທົ່າກັບ 554,000 ເມັດ, ນ້ຳໜັກ 55,4 ກິໂລກຣາມ,

ຈາກນັ້ນເຈົ້າໜ້າທີ່ຈຶ່ງໄດ້ສົມທົບອຳນາດການປົກຄອງບ້ານທຳການກວດຄົ້ນເຄຫະສະຖານ ບ່ອນທີ່ພວກກ່ຽວມາພັກເຊົາ ຢູ່ບ້ານ ນໍ້າຄຳ, ເມືອງຫ້ວຍຊາຍ,ແຂວງບໍ່ແກ້ວ, ຜ່ານການກວດ (ສາງ ແລະ ເຮືອນ) ແມ່ນບໍ່ພົບສິ່ງຜິດກົດໝາຍແຕ່ຢ່າງໃດ, ເຄື່ອງຂອງກາງ ແລະ ເຄື່ອງຕິດຕົວທີ່ຢຶດໄດ້ມີຄື:

1. ຢາບ້າ ຈໍານວນ 277 ມັດ ເທົ່າກັບ 554,000 ເມັດ, ນ້ຳໜັກ 55,4 ກິໂລກຣາມ.
2. ໂທລະສັບມືຖື ຈຳນວນ 02 ໜ່ວຍ.
3. ລົດເມສີຂາວ ຈຳນວນ 01 ຄັນ ທະບຽນ ກກ 0513 ອຸດົມໄຊ.

ປະຈຸບັນ ທາງເຈົ້າໜ້າທີ່ວິຊາສະເພາະພວມດຳເນີນການສືບສວນ-ສອບສວນ.

ທີ່ມາ: ປກສ ແຂວງບໍ່ແກ້ວ

ສະແດງຄຳຄິດເຫັນ