ອີລອນ ມັສກ໌ ຊີອີໂອແຫ່ງເທສລາ ລະບຸວ່າລາວກຳລັງກໍ່ຕັ້ງພັກການເມືອງຂຶ້ນມາໃໝ່ ຫຼັງຈາກເກີດຄວາມຂັດແຍ້ງຮຸນແຮງກັບປະທານາທິບໍດີໂດນັລດ໌ ທຣັມ ຂອງສະຫະລັດ ເມື່ອຫຼາຍອາທິດກ່ອນ

ມະຫາເສດຖີຜູ້ນີ້ປະກາດເລື່ອງການຕັ້ງພັກການເມືອງຜ່ານແພລດຟອມ “ເອັກຊ໌” ໂດຍລະບຸວ່າ ເຂົາກຳລັງຕັ້ງພັກທີ່ຊື່ວ່າ “ພັກອະເມຣິກາ” (America Party) ແລະ ບອກວ່າພັກນີ້ຈະເປັນທາງເລືອກທ້າທາຍຕໍ່ລະບົບການເມືອງແບບສອງພັກຂອງສະຫະລັດ ຊຶ່ງໄດ້ແກ່ ພັກຣີພັບລິກັນ ແລະ ພັກເດໂມແຄຣັດ

ຢ່າງໃດກໍຕາມ ຍັງບໍ່ຊັດເຈນວ່າພັກດັ່ງກ່າວໄດ້ຈົດທະບຽນຢ່າງເປັນທາງການ ກັບໜ່ວຍງານການເລືອກຕັ້ງຂອງສະຫະລັດແລ້ວຫຼືບໍ່ ແລະ ມັສກ໌ ກໍຍັງບໍ່ໄດ້ເປີດເຜີຍລາຍລະອຽດວ່າໃຜຈະເປັນຜູ້ນຳພັກ ຫຼື ພັກນີ້ຈະມີຮູບແບບຢ່າງໃດ

ມັສກ໌ ເຄີຍເວົ້າເຖິງຄວາມປາຖະໜາໃນການຕັ້ງພັກການເມືອງເປັນຄັ້ງທຳອິກ ລະຫວ່າງທີ່ລາວກຳລັງມີເຫດການບາດຫມາງກັບໂດນັລດ໌ ທຣັມ ແລະ ມີປາກສຽງກັນຢ່າງດຸເດືອດໃນທີ່ສາທາລະນະກັບອະດີດພັນທະມິດຂອງລາວ

ຊຶ່ງເຮັດໃຫ້ລາວອອກຈາກຕຳແໜ່ງທາງການບໍລິຫານໃນລັດຖະບານທຣັມ ທີ່ລາວເຂົ້າໄປມີສ່ວນຮ່ວມໃນການຕັດຫຼຸດງົບປະມານພາກລັດທີ່ບໍ່ຈຳເປັນ ຫຼື ທີມທີ່ຮູ້ຈັກກັນໃນຊື່ ກະຊວງປະສິດທິພາບຂອງລັດຖະບານ ຫຼື Department of Government Efficiency (Doge)

ລະຫວ່າງທີ່ລາວກຳລັງຂັດແຍ້ງກັບທຣັມ ມັສກ໌ໄດ້ໂພສຕ໌ແບບສຳຫຼວດເທິງ “ເອັກຊ໌” ໂດຍຖາມຜູ້ໃຊ້ງານໃນແພລດຟອມໂຊຊຽລດັ່ງກ່າວວ່າຄວນຈະມີພັກການເມືອງໃໝ່ໃນສະຫະລັດຫຼືບໍ່ ແລະ ເມື່ອອ້າງອີງຜົນສຳຫຼວດນີ້ເມື່ອວັນເສົາ ມັສກ໌ໄດ້ໂພສຕ໌ເພີ່ມເຕີມວ່າ “ດ້ວຍສັດສ່ວນ 2 ຕໍ່ 1 ພວກເຈົ້າຕ້ອງການພັກການເມືອງໃໝ່ ແລະ ເຈົ້າກໍຈະໄດ້ມັນ !”

“ເມື່ອເວົ້າເຖິງການກະທຳໃຫ້ປະເທດຂອງເຮົາລົ້ມລະລາຍດ້ວຍຄວາມສິ້ນເປືອງ ແລະ ການທຸຈລິດ ເຮົາກຳລັງຢູ່ພາຍໃຕ້ລະບົບພັກດຽວ ບໍ່ແມ່ນປະຊາທິປະໄຕ”

“ຕອນນີ້ ພັກອະເມຣິກາໄດ້ຈັດຕັ້ງຂຶ້ນແລ້ວເພື່ອຄືນເສລີພາບໃຫ້ກັບພວກເຈົ້າ”

ຈົນເຖິງວັນເສົາ (5 ກໍລະກົດ.) ຄະນະກຳມະການການເລືອກຕັ້ງຂອງສະຫະລັດ (Federal Electoral Commission) ຍັງບໍ່ໄດ້ເຜີຍແພ່ເອກະສານທີ່ບົ່ງບອກວ່າພັກການເມືອງໃໝ່ຂອງທຣັມໄດ້ຖືກຈົດທະບຽນກັບນາຍທະບຽນການເລືອກຕັ້ງແລ້ວ

ສຳລັບມັສກ໌ ຫຼັງການເລືອກຕັ້ງສະຫະລັດຄັ້ງທີ່ຜ່ານມາ ລາວໄດ້ຮັບການແຕ່ງຕັ້ງໃຫ້ດູແລໜ່ວຍງານງານທີ່ເອີ້ນວ່າ ກະຊວງປະສິດທິພາບຂອງລັດຖະບານ ຫຼື Department of Government Efficiency (Doge) ຊຶ່ງມີໜ້າທີ່ໃນການຕັດຫຼຸດງົບປະມານຂອງປະເທດ

ຄວາມຂັດແຍ້ງບໍ່ລົງຮອຍລະຫວ່າງລາວ ແລະ ທຣັມເລີ່ມຂຶ້ນເມື່ອລາວອອກຈາກກະຊວງນີ້ໃນເດືອນ ພຶດສະພາ ແລະ ເປີດສົງຄາມວິຈານທຣັມຕໍ່ສາທາລະນະເລື່ອງແຜນການໃຊ້ຈ່າຍແລະເກັບພາສີ

ຊຶ່ງກົດໝາຍງົບປະມານສະບັບດັ່ງກ່າວທີ່ທຣັມເອີ້ນວ່າ “big, beautiful bill” (ກົດໝາຍທີ່ໃຫຍ່ແລະສວຍງາມ) ໄດ້ຮັບຄວາມເຫັນຊອບຈາກສະພາຜູ້ແທນລາດສະດອນເກືອບບໍ່ຜ່ານ ແລະ ໄດ້ຮັບການລົງນາມປະກາດໃຊ້ເປັນກົດໝາຍໂດຍປະທານາທິບໍດີໃນອາທິດນີ້

ກົດໝາຍຊຸດໃຫຍ່ສະບັບນີ້ປະກອບດ້ວຍຂໍ້ຜູກພັນດ້ານການໃຊ້ຈ່າຍຈຳນວນມະຫາສານ ແລະ ການປັບຫຼຸດພາສີ ແລະ ຄາດວ່າຈະເພີ່ມການຂາດດຸນຂອງງົບປະມານສະຫະລັດຫຼາຍກວ່າ 3 ລ້ານລ້ານໂດລາສະຫະລັດ ໃນຊ່ວງທົດສະວັດໜ້າ

ສະແດງຄຳຄິດເຫັນ