ກະຊວງສາທາລະນະສຸກຂອງຮາມາສທີ່ດູແລເຂດກາຊາເປີດເຜີຍວ່າ ໃນຊ່ວງ 24 ຊົ່ວໂມງທີ່ຜ່ານມາ ມີຜູ້ເສຍຊີວິດຈາກການໂຈມຕີຂອງອິສຣາແອລໃນເຂດກາຊາເພີ່ມຂຶ້ນຢ່າງຫນ້ອຍ 80 ຄົນ ບາດເຈັບອີກ 304 ຄົນ ແລະ ອີກຈຳນວນຫຼາຍອາດຕິດຢູ່ພາຍໃຕ້ຊາກອາຄານເຮືອນທີ່ພັງຖະລົ່ມ ເພີ່ມຍອດຜູ້ເສຍຊີວິດໃນກາຊາເປັນຢ່າງຫນ້ອຍ 57,418 ຄົນ ບາດເຈັບ 136,261 ຄົນ

ດ້ານກອງທັບອິສຣາແອລເປີດເຜີຍວ່າ ໃນຊ່ວງ 24 ຊົ່ວໂມງທີ່ຜ່ານມາ ໄດ້ດຳເນີນການໂຈມຕີເປົ້າໝາຍຕ່າງໆ ທົ່ວເຂດກາຊາກວ່າ 130 ແຫ່ງ

ສ່ວນໃຫຍ່ເປັນສູນບັນຊາການ ແລະ ໂຄງສ້າງພື້ນຖານຂອງກຸ່ມຮາມາສ ສາງອາວຸດ ແທ່ນຍິງລູກຈະຫຼວດ ລວມທັງສັງຫານກຸ່ມຕິດອາວຸດໄດ້ຈຳນວນຫຼາຍໃນເມືອງກາຊາຊິຕີ້ ແລະ ຈາບາເລຍ

ນອກຈາກນີ້ ກອງທັບອິສຣາແອລຍັງໄດ້ປະກາດໃຫ້ຊາວປາເລັສຕາຍໃນເມືອງຂານ ຢູນິສ ທາງພາກໃຕ້ຂອງກາຊາ ເກັບເຄື່ອງອົບພະຍົບອອກຈາກພື້ນທີ່ຕັ້ງແຕ່ຊ່ວງແລງວັນອາທິດທີ່ຜ່ານມາ ເພື່ອກະກຽມກ້າວໄປດຳເນີນການທາງທະຫານຢ່າງໜັກໜ່ວງຮອບໃໝ່ໃນພື້ນທີ່ດັ່ງກ່າວ

ໃນຂະນະທີ່ເຈົ້າໜ້າທີ່ຮັກສາຄວາມປອດໄພລະດັບສູງຂອງກຸ່ມຮາມາສເປີດເຜີຍກັບສຳນັກຂ່າວບີບີຊີວ່າ ຜົນຈາກການໂຈມຕີທາງອາກາດຂອງອິສຣາແອລ ສົ່ງຜົນໃຫ້ກຸ່ມຕິດອາວຸດໃນປາເລັສຕາຍ ສູນເສຍການຄວບຄຸມພື້ນທີ່ໃນເຂດກາຊາໄປແລ້ວກວ່າຮ້ອຍລະ 80

ນອກຈາກນີ້ຍັງເຮັດໃຫ້ລະບົບການບັງຄັບບັນຊາແລະການຄວບຄຸມຂອງກຸ່ມຮາມາສລົ້ມລະລາຍ ໃນເວລານີ້ໂຄງສ້າງດ້ານຄວາມໝັ້ນຄົງຂອງກຸ່ມຮາມາສເກືອບບໍ່ເຫຼືອຫຍັງອີກແລ້ວ ແລະ ຜູ້ນຳແລະເຈົ້າໜ້າທີ່ລະດັບຜູ້ບັນຊາການຂອງກຸ່ມທັງໝົດກໍຖືກສັງຫານໄປດ້ວຍ ຂະນະນີ້ ກຸ່ມຕິດອາວຸດໃນປາເລັສຕາຍເກີດພາວະສູນຍາກາດທາງຄວາມໝັ້ນຄົງ ແລະ ປະຈຸບັນກໍມີກຸ່ມອາຊະຍາກອນຢູ່ທຸກໜທຸກແຫ່ງ

ຄຳໃຫ້ສຳພາດຂອງເຈົ້າໜ້າທີ່ຄົນນີ້ເກີດຂຶ້ນ ຫຼັງຈາກ ໂຢອາຟ ກັລລັນ ອະດີດລັດຖະມົນຕີປ້ອງກັນປະເທດອິສຣາແອລຣະບຸວ່າ ກຸ່ມຮາມາສໃນຮູບແບບກອງກຳລັງທະຫານບໍ່ມີຢູ່ອີກຕໍ່ໄປແລ້ວ ແລະ ຕອນນີ້ກຳລັງໃຊ້ຍຸດທະວິທີ ກອງໂຈນໃນການຕໍ່ສູ້ກັບອິສຣາແອລ

ດ້ານນາຍົກລັດຖະມົນຕີເບັນຈາມິນ ເນທັນຢາຮູ ເດີນທາງຮອດສະຫະລັດແລ້ວ ກະກຽມປຶກສາຫາລືຮ່ວມກັບປະທານາທິບໍດີທຣຳ ແລະ ລັດຖະມົນຕີຕ່າງປະເທດ ມາໂກ ລູບີໂອ ແລະ ທູດພິເສດສະຫະລັດປະຈຳຕາເວັນອອກກາງ ສຕີຟ ວິດຄອຟຟ໌ໃນມື້ນີ້ດ້ວຍ

ໂດຍຄາດວ່າທັງສອງຈະປຶກສາຫາລືກັນເລື່ອງຄວາມຂັດແຍ້ງລະຫວ່າງອິສຣາແອລ-ອິຫຼ່ານ ລວມທັງອະນາຄົດໂຄງການນິວເຄລຍອິຫຼ່ານ ແລະ ຄວາມເປັນໄປໄດ້ໃນການຢຸດຍິງລະຫວ່າງອິສຣາແອລແລະກຸ່ມຮາມາສດ້ວຍ

ໂດຍໃນຖະແຫລງການຂອງເນທັນຢາຮູ ຣະບຸວ່າ ຂໍຂອບໃຈທຣຳໄວ້ສຳລັບການມີສ່ວນຮ່ວມທີ່ຊົງພະລັງກັບອິສຣາແອລ ລວມທັງການທີ່ທຣຳຕັດສິນໃຈເຂົ້າຮ່ວມໂຈມຕີອິຫຼ່ານເມື່ອເດືອນທີ່ຜ່ານມາ ແລະ ນີ້ຄືໝູ່ທີ່ແທ້ຈິງ ທີ່ຮ່ວມກັນເອົາໄຊຊະນະເຫນືອສັດຕູຮ່ວມ ຄືອິຫຼ່ານ

ໃນຂະນະທີ່ປະທານາທິບໍດີທຣຳ ໄດ້ກ່າວເມື່ອວັນອາທິດ (6 ກໍລະກົດ) ວ່າ ນີ້ຄືໂອກາດທີ່ດີທີ່ອາດສາມາດບັນລຸຂໍ້ຕົກລົງຢຸດຍິງກັບກຸ່ມຮາມາສໄດ້ພາຍໃນອາທິດນີ້ ທີ່ຈະນຳມາສູ່ການປ່ອຍຕົວປະກັນ – ເຊິ່ງເນທັນຢາຮູເຊື່ອວ່າ ການລົມກັບທຣຳຄັ້ງນີ້ ຈະຊ່ວຍໃຫ້ການເຈລະຈາຢຸດຍິງສາມາດບັນລຸຜົນໄດ້ ຫຼັງຈາກທີ່ຜູ້ແທນຂອງອິສຣາແອລໄປປຶກສາຫາລືກັບຕົວແທນກາງຢ່າງກາຕາເມື່ອວັນອາທິດທີ່ຜ່ານມາ

ດ້ານກຸ່ມຮູຕີໃນເຢເມນ ປະກາດຢ້ຳເຖິງຈຸດຢືນຕໍ່ຊາວປາເລັສຕາຍວ່າ ປະຕິບັດການເພື່ອສະໜັບສະໜູນເຂດກາຊາ ຈະບໍ່ມີວັນສິ້ນສຸດລົງ ຈົນກວ່າອິສຣາແອລຈະຢຸດການໂຈມຕີ

ໂດຍເມື່ອວັນອາທິດ ກຸ່ມຮູຕີໄດ້ຍິງລູກຈະຫຼວດໃສ່ສະໜາມບິນເບນ ກູຣີອອນອີກຄັ້ງ ເຮັດໃຫ້ກອງທັບອິສຣາແອລຕອບໂຕ້ກັບດ້ວຍການໂຈມຕີທ່າເຮືອໂຮໄດດາ, ຣາສ ອິຊາ ແລະ ແອສ-ຊາລິຟ ຕາມແນວຕາຝັ່ງທະເລແດງ ລວມທັງໂຈມຕີໂຮງໄຟຟ້າ ຣາສ-ຄານາທິບດ້ວຍ

ນອກຈາກນີ້ຍັງໂຈມຕີລະບົບເຣດາຂອງເຮືອກາແລັກຊີ ລີເດີທີ່ຖືກກຸ່ມຮູຕີຍຶດເອົາໄວ້ ແລະ ຍັງຈອດທຽບທ່າຢູ່ທີ່ໂຮໄດດາດ້ວຍ

ສະແດງຄຳຄິດເຫັນ