ເກີດເຫດນ້ຳຖ້ວມຮຸນແຮງບໍລິເວນຊາຍແດນເນປານກັບຈີນ

ກະແສນ້ຳພັດພາເຮືອນບ້ານໄປຫລາຍຫລັງ ແລະ ເຮັດໃຫ້ຫນຶ່ງໃນຂົວເຊື່ອມລະຫວ່າງ 2 ປະເທດຂາດ ພົບຜູ້ເສຍຊີວິດແລ້ວ 8 ຄົນສູນຫາຍອີກ 31 ຄົນ

ສຳນັກຂ່າວຕ່າງປະເທດລາຍງານເມື່ອ 8 ກໍລະກົດ 2025 ວ່າ ຝົນທີ່ຕົກລົງມາຢ່າງໜັກເຮັດໃຫ້ເກີດນ້ຳຖ້ວມບ້ານຕ່າງໆ ບໍລິເວນພູເຂົາຮິມາໄລ ລະຫວ່າງປະເທດເນປານກັບຈີນ ເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 8 ຄົນສູນຫາຍອີກ 31 ຄົນ ໂດຍມວນນ້ຳມະຫາສານຊັດເອົາຂົວຂ້າມແມ່ນ້ຳໂພເຕໂກຊີ (Bhotekoshi) ທີ່ເຊື່ອມລະຫວ່າງເນປານກັບຈີນຈົນຂາດ

ກະແສນ້ຳຍັງພັດພາເຮືອນຫລາຍຫລັງ ກັບລົດບັນທຸກອີກຫລາຍຄັນທີ່ຈອດລໍຖ້າການກວດກາທາງພາສີອາກອນບໍລິເວນດ່ານຊາຍແດນ ລົດໄຟຟ້າຫລາຍຮ້ອຍຄັນທີ່ນຳເຂົ້າຈາກຈີນກໍຈອດຢູ່ບໍລິເວນດ່ານຊາຍແດນດັ່ງກ່າວດ້ວຍ

ຕອນນີ້ປະເທດໃນເອເຊຍໃຕ້ກຳລັງພົບກັບເຫດນ້ຳຖ້ວມ ແລະ ດິນຖະຫຼົ່ມຫລາຍຈຸດ ເນື່ອງຈາກຢູ່ໃນລະດູມໍລະສຸມຊ່ວງເດືອນມິຖຸນາ-ກັນຍາ

ໂຄສົກຕຳຫຼວດເນປານບອກກັບສຳນັກຂ່າວ ເອເອຟພີ ວ່າ ເຈົ້າໜ້າທີ່ກຳລັງມຸ່ງໝັ້ນໃນການປະຕິບັດການຄົ້ນຫາແລະຊ່ວຍເຫຼືອ ໂດຍຈົນເຖິງຕອນນີ້ພວກເຂົາຊ່ວຍເຫຼືອຜູ້ປະສົບໄພໄດ້ແລ້ວ 57 ຄົນ

ດ້ານສະຖານີໂທລະທັດ ຊີຊີທີວີ (CCTV) ຂອງຈີນ ລາຍງານວ່າ ເກີດຫາຍະນະດິນຖະຫຼົ່ມບໍລິເວນຊາຍແດນເມື່ອຕອນເຊົ້າມືດວັນອັງຄານ ເຮັດໃຫ້ມີຜູ້ສູນຫາຍ 11 ຄົນໃນຝັ່ງຈີນ ຂະນະທີ່ໃນຝັ່ງເນປານ ມີຄົນງານກໍ່ສ້າງຊາວຈີນສູນຫາຍໄປ 6 ຄົນ

ຕຳຫຼວດເນປານບອກອີກວ່າ ເຈົ້າໜ້າທີ່ກູ້ໄພລົງພື້ນທີ່ແລ້ວ 95 ຄົນ ແລະ ຄາດວ່າຈະມີນຳມາອີກ ຂະນະທີ່ເຮລິຄອບເຕີຂອງກອງທັບກຳລັງຖືກໃຊ້ເພື່ອຊ່ວຍອົບປະຍົບຜູ້ທີ່ຕິດຄ້າງເພາະນ້ຳຖ້ວມ

ສະແດງຄຳຄິດເຫັນ