ໝໍເຕືອນ ໃສ່ຄອນແທັກເລນບໍ່ສະອາດ ໃສ່ນອນ ຫຼື ໃສ່ດົນເກີນ 8 ຊົ່ວໂມງ ສ່ຽງເກີດ “ແຜກະຈົກຕາ” ຕິດເຊື້ອຮຸນແຮງຮອດຂັ້ນຕາບອດ ແນະວິທີປ້ອງກັນແລະຮັກສາ

ໂຮງຫມໍເມັຕຕະປະຊາຣັກ (ວັດໄຣ່ຂິງ) ກົມການແພດ ເຕືອນໄພ “ແຜທີ່ກະຈົກຕາ” ພາວະອັນຕະລາຍທີ່ຫຼາຍຄົນເບິ່ງຂ້າມ

ໂດຍສະເພາະໃນກຸ່ມຜູ້ທີ່ໃສ່ຄອນແທັກເລນເປັນປະຈຳທັງເພື່ອຄວາມສວຍງາມຫຼືການແກ້ໄຂບັນຫາສາຍຕາ ເພາະຖ້າໃຊ້ງານຢ່າງບໍ່ຖືກວິທີ ເຊັ່ນ: ໃສ່ເລນດົນເກີນໄປ ບໍ່ຖອດຕອນນອນ ຫຼື ບໍ່ຮັກສາຄວາມສະອາດຢ່າງເໝາະສົມ ອາດນຳໄປສູ່ການອັກເສບ ຕິດເຊື້ອ ແລະ ຮຸນແຮງຮອດຂັ້ນສູນເສຍການເບິ່ງເຫັນຖາວອນ

ນາຍແພດໄພໂຣຈນ໌ ສຸລັດຕະນະວະນິດ ຮອງອະທິບໍດີກົມການແພດ ເປີດເຜີຍວ່າ ປັດຈຸບັນການໃຊ້ຄອນແທັກເລນໄດ້ຮັບຄວາມນິຍົມຫຼາຍຂຶ້ນ ແຕ່ໃນຂະນະດຽວກັນບັນຫາສຸຂະພາບຕາທີ່ເກີດຈາກການໃຊ້ງານບໍ່ເໝາະສົມກໍເພີ່ມຂຶ້ນນຳ ໂດຍສະເພາະ “ແຜທີ່ກະຈົກຕາ” ຊຶ່ງເກີດຈາກຫຼາຍສາເຫດ

ບໍ່ວ່າຈະເປັນການສີຕາແຮງໆ ການໃສ່ເລນຄ້າງຄືນ ຫຼື ການໃຊ້ຄອນແທັກເລນທີ່ບໍ່ສະອາດ ນອກຈາກນີ້ຜູ້ທີ່ມີພາວະຕາແຫ້ງ ຫຼື ພູມແພ້ຍັງມີຄວາມສ່ຽງຫຼາຍກວ່າຄົນທົ່ວໄປ ຖ້າມີອາການຕາແດງ ປວດຕາ ແສບຕາ ນ້ຳຕາໄຫຼ ຫຼື ເບິ່ງເຫັນບໍ່ແຈ້ງມົວ ຄວນຟ້າວພົບແພດໂດຍດ່ວນ

ດ້ານນາຍແພດກິດຕິວັດ ມະໂນຈັນ ຜູ້ອຳນວຍການໂຮງຫມໍເມັຕຕະປະຊາຣັກ ລະບຸວ່າ ກະຈົກຕາເປັນອະໄວຍະວະທີ່ບອບບາງແລະສຳຄັນຢ່າງຍິ່ງ

ເພາະເຮັດໜ້າທີ່ຮັບແສງແລະໂຟກັດພາບເຂົ້າສູ່ຈໍປະສາດຕາ ການເກີດບາດແຜທີ່ກະຈົກຕາພຽງເລັກນ້ອຍ ກໍອາດສົ່ງຜົນກະທົບຕໍ່ການເບິ່ງເຫັນໄດ້ທັນທີ ໂດຍສະເພາະແຜທີ່ເກີດຈາກເຊື້ອແບັກທີເຣຍ ຊຶ່ງມັກມາຈາກການໃຊ້ຄອນແທັກເລນທີ່ບໍ່ສະອາດ ຫຼື ເມື່ອມີສິ່ງແປກປອມ ເຊັ່ນ: ຝຸ່ນ, ຊາຍ ຫຼື ໂລຫະນ້ອຍໆ ເຂົ້າຕາໂດຍບໍ່ໄດ້ຮັບການລ້າງອອກຢ່າງຖືກວິທີ

ນາຍແພດວີຣະພັດ ອຸດົມວົງ ແພດສາຍຕາຜູ້ຊ່ຽວຊານດ້ານກະຈົກຕາ ກ່າວເພີ່ມເຕີມວ່າ ການໃສ່ຄອນແທັກເລນດົນເກີນ 8 ຊົ່ວໂມງ ຫຼື ໃສ່ນອນຂ້າມຄືນ

ເປັນປັດໄຈສ່ຽງທີ່ສຳຄັນ ເພາະກະຈົກຕາຈະຂາດອອກຊີເຈນແລະຄວາມຊື້ນ ເຮັດໃຫ້ເຊລຜິວເສື່ອມສະພາບ ເກີດແຜຖະລອກທີ່ງ່າຍຕໍ່ການຕິດເຊື້ອ ໂດຍສະເພາະເຊື້ອແບັກທີເຣຍ ແລະ ອະມີບາທີ່ມັກພົບໃນນ້ຳປົນເປື້ອນ ຊຶ່ງສາມາດເຮັດໃຫ້ບາດແຜລຸກລາມຢ່າງໄວຮອດຂັ້ນຕາບອດໄດ້ໃນບໍ່ເທົ່າໃດມື້

ສຳຫຼັບແນວທາງການຮັກສາ ຖ້າເປັນແຜຕື້ນ ຫຼື ລະຄາຍເຄືອງເລັກນ້ອຍ ໝໍອາດໃຫ້ຢາຂ້າເຊື້ອຮ່ວມກັບນ້ຳຕາທຽມ ແລະ ແນະນຳໃຫ້ຢຸດໃຊ້ຄອນແທັກເລນຊົ່ວຄາວຈົນກວ່າແຜຈະຫາຍ

ແຕ່ຖ້າແຜເລິກແລະຕິດເຊື້ອ ອາດຕ້ອງກວດເຊື້ອເພື່ອໃຫ້ຢາຫຍອດສະເພາະທາງ ຫຍອດຢາຖີ່ຂຶ້ນ ແລະ ຕິດຕາມອາການໃກ້ຊິດ ຖ້າປ່ອຍໃຫ້ແຜລຸກລາມຈົນກະຈົກຕາມົວຫຼືເປັນຝ້າ ອາດຕ້ອງເຂົ້າຮັບການຜ່າຕັດປູກຖ່າຍກະຈົກຕາ ຊຶ່ງມີຄ່າໃຊ້ຈ່າຍສູງແລະບໍ່ສາມາດຮັບປະກັນຜົນການເບິ່ງເຫັນທີ່ສົມບູນໄດ້

ສະແດງຄຳຄິດເຫັນ