ປະທານາທິບໍດີໂດນັລ ທຣຳ ເປີດເຜີຍມື້ວານນີ້ (7 ກໍລະກົດ) ວ່າ ລາວມີແຜນທີ່ຈະສົ່ງອາວຸດປ້ອງກັນຕົວເພີ່ມເຕີມໃຫ້ຢູເຄຣນ ຫຼັງຈາກທີ່ລັດຖະບານສະຫະລັດ ຢຸດການສົ່ງຄວາມຊ່ວຍເຫຼືອຊົ່ວຄາວເມື່ອອາທິດກ່ອນ

ທຣຳເປີດເຜີຍວ່າກ່ອນທີ່ຈະໄປກິນອາຫານຄ່ຳກັບນາຍົກລັດຖະມົນຕີເບັນຈາມິນ ເນທັນຢາຫູຂອງອິສຣາເອລວ່າ ພວກເຮົາຈະສົ່ງອາວຸດໄປເພີ່ມ ພວກເຂົາຕ້ອງສາມາດປົກປ້ອງຕົນເອງໄດ້ ແລະ ພວກເຂົາກຳລັງຖືກໂຈມຕີໜັກ ສະຫະລັດຕ້ອງສົ່ງອາວຸດໄປເພີ່ມ

ການເປີດເຜີຍຂອງທຣຳມີຂຶ້ນ ຫຼັງເມື່ອອາທິດທີ່ຜ່ານ ມາລັດຖະບານສະຫະລັດພາຍໃຕ້ການນຳຂອງທຣຳ ລະງັບການສົ່ງອາວຸດບາງຊະນິດໄປຍັງຢູເຄຣນ ລວມເຖິງຂີປະນາວຸດປ້ອງກັນໄພທາງອາກາດ

ແອນນາ ເຄລລີ ຜູ້ຊ່ວຍໂຄສົກຂອງທຳນຽບຂາວເປີດເຜີຍວ່າ ໃນຊ່ວງເວລາທີ່ມີການຕັດສິນໃຈລະງັບສົ່ງຄວາມຊ່ວຍເຫຼືອໄປຍັງຢູເຄຣນ ຄືຊ່ວງທີ່ຕ້ອງຜັກດັນຜົນປະໂຫຍດຂອງອະເມຣິກາມາກ່ອນ

ດ້ານເຈົ້າໜ້າທີ່ສະຫະລັດຈຳນວນໜຶ່ງກ່າວເຖິງການທົບທວນຄວາມຊ່ວຍເຫຼືອຂອງຢູເຄຣນວ່າກ່ຽວຂ້ອງກັບຄວາມພະຍາຍາມຂອງກະຊວງປ້ອງກັນປະເທດສະຫະລັດທີ່ຈະຫັນໄປໂຟກັດກັບຈີນຫຼາຍຂຶ້ນ ແລະ ກຽມຄວາມພ້ອມສຳຫຼັບຄວາມເປັນໄປໄດ້ທີ່ຈະເກີດຄວາມຂັດແຍ້ງຂຶ້ນໃນພາກພື້ນ ແປຊິຟິກໃນອະນາຄົດ ຊຶ່ງເປັນປະເດັນທີ່ກະຊວງປ້ອງກັນປະເທດຂອງສະຫະລັດໃຫ້ຄວາມສົນໃຈ

ເອລບຣິດຈ໌ ໂຄລບີ ຫົວໜ້າຝ່າຍນະໂຍບາຍຕ່າງປະເທດຂອງກະຊວງປ້ອງກັນປະເທດສະຫະລັດເປີດເຜີຍວ່າ ກະຊວງປ້ອງກັນປະເທດສະຫະລັດຍັງຄົງຈັດກຽມທາງເລືອກທີ່ຫຼາກຫຼາຍເພື່ອໃຫ້ປະທານາທິບໍດີສາມາດດຳເນີນການສະໜັບສະໜູນທາງທະຫານຕໍ່ຢູເຄຣນໄດ້

ຕາມເປົ້າໝາຍຂອງທຣຳທີ່ຕ້ອງການຢຸດສົງຄາມ ແຕ່ຂະນະດຽວກັນ ກະຊວງກໍກຳລັງພິຈາລະນາແລະປັບແນວທາງເພື່ອບັນລຸເປົ້າໝາຍນີ້ຢ່າງເຂັ້ມງວດ ພ້ອມທັງຮັກສາຄວາມພ້ອມຮົບຂອງກອງທັບສະຫະລັດເພື່ອພາລະກິດປ້ອງກັນປະເທດຕາມລຳດັບຄວາມສຳຄັນຂອງລັດຖະບານ

ຢ່າງໃດກໍຕາມ ລັດເຊຍສະແດງຄວາມຍິນດີກັບການຢຸດສົ່ງອາວຸດບາງສ່ວນໃຫ້ຢູເຄຣນ ໂດຍອ້າງວ່າສະຫະລັດເຮັດແບບນັ້ນເພາະອາວຸດບໍ່ພຽງພໍ ແຕ່ກໍບໍ່ໄດ້ສະແດງຫຼັກຖານໃດ

ລັດເຊຍໂຈມຕີຢູເຄຣນໜັກ

ເຈົ້າໜ້າທີ່ກູ້ໄພຢູເຄຣນກຳລັງເຮັດວຽກໃນອາຄານພັກອາໄສທີ່ໄດ້ຮັບຄວາມເສຍຫາຍ ຫຼັງເກີດການໂຈມຕີດ້ວຍໂດຣນແລະຂີປະນາວຸດຄັ້ງໃຫຍ່ຂອງລັດເຊຍໃນນະຄອນຫຼວງເຄຍຟ ເມື່ອວັນທີ່ 4 ກໍລະກົດ ທ່າມກາງການຮຸກຮານຢູເຄຣນຢ່າງຕໍ່ເນື່ອງຂອງລັດເຊຍ

ໂດຍຢູເຄຣນລະບຸວ່າໃນວັນທີ່ 4 ກໍລະກົດ ລັດເຊຍໄດ້ເປີດການໂຈມຕີທາງອາກາດກາງຄືນຄັ້ງໃຫຍ່ທີ່ສຸດນັບຕັ້ງແຕ່ເກີດສົງຄາມມານານກວ່າ 3 ປີ

ຍູຣິ ອິກນັດ ຕົວແທນກອງທັບອາກາດຢູເຄຣນກ່າວວ່າການໂຈມຕີດ້ວຍໂດຣນແລະຂີປະນາວຸດລວມ 550 ລູກນີ້ຖືເປັນສະຖິຕິໃໝ່ ພ້ອມເສີມວ່າ ນີ້ເປັນຈຳນວນຫຼາຍທີ່ສຸດທີ່ສັດຕູໃຊ້ໂຈມຕີພຽງຄັ້ງດຽວ

ທັງນີ້ ສະຫະລັດເປັນຜູ້ບໍລິຈາກລາຍໃຫຍ່ທີ່ສຸດດ້ານການສະໜັບສະໜູນທາງທະຫານໃຫ້ຢູເຄຣນ ນັບຕັ້ງແຕ່ລັດເຊຍເລີ່ມຮຸກຮານເຕັມຮູບແບບໃນປີ 2022

ໂດຍຈັດຫາອາວຸດລະບົບປ້ອງກັນທາງອາກາດ ໂດຣນ ເຄື່ອງຍິງຈະຣວດ ເຣດາ ລົດຖັງ ແລະ ອາວຸດຕ້ານເກາະ ຊຶ່ງເຮັດໃຫ້ຫຼາຍຝ່າຍກັງວົນວ່າ ຄັງແສງຂອງສະຫະລັດຈະຫຼຸດລົງ

ກ່ອນໜ້ານີ້ ທຣຳໄດ້ຢຸດການສົ່ງອາວຸດທັງໝົດໃຫ້ຢູເຄຣນໃນເດືອນມີນາ ຫຼັງມີການໂຕ້ຖຽງກັນຢ່າງດຸເດືອດໃນຫ້ອງເຮັດວຽກຮູບໄຂ່ກັບປະທານາທິບໍດີໂວໂລດີເມຍ ເຊເລັນສກີ ຂອງຢູເຄຣນ ແຕ່ທຣຳກັບມາດຳເນີນການສົ່ງອາວຸດອີກຄັ້ງປະມານໜຶ່ງອາທິດຕໍ່ມາ

ສະແດງຄຳຄິດເຫັນ