ທຣຳປະກາດທ່າທີແຂງກະດ້າງຕໍ່ລັດເຊຍ ກໍລະນີການເຮັດສົງຄາມໃນຢູເຄຣນ

ພ້ອມໃຫ້ຄຳໝັ້ນຈັດຫາຂີປະນາວຸດ ແລະ ອາວຸດອື່ນໆ ຊຸດໃໝ່ໃຫ້ຢູເຄຣນ ແລະ ໃຫ້ເວລາລັດເຊຍ 50 ວັນ ໃນການບັນລຸຂໍ້ຕົກລົງຢຸດຍິງ ບໍ່ສະນັ້ນຕ້ອງປະເຊີນໜ້າກັບມາດຕະການຄວ່ຳບາດ ຊຶ່ງການຄວ່ຳບາດຈະມຸ່ງເປົ້າໄປທີ່ພັນທະມິດທີ່ເຮັດການຄ້າກັບລັດເຊຍ ຊຶ່ງຈະຖືກຂຶ້ນພາສີ 100% ຖ້າຫາກວ່າລັດເຊຍຍັງບໍ່ບັນລຸຂໍ້ຕົກລົງຢຸດຍິງກັບຢູເຄຣນ ພາຍໃນເວລາ 50 ວັນ

ທຣຳ ຊຶ່ງປະກາດໃນຫ້ອງເຮັດວຽກຮູບໄຂ່ ທຳນຽບຂາວ ພ້ອມກັບມາກ ຣຸດເຕີ ເລຂາທິການອົງການສົນທິສັນຍາແອັດແລນຕິກເໜືອ ຫຼື ນາໂຕ ກ່າວກັບນັກຂ່າວວ່າ ລາວຮູ້ສຶກຜິດຫວັງຢ່າງຫຼາຍກັບປະທານາທິບໍດີວລາດິເມຍ ປູຕິນ ຂອງລັດເຊຍ

ລາວກ່າວວ່າການລົມກັນທາງໂທລະສັບກັບປູຕິນເປັນເລື່ອງທີ່ຍິນດີ ແຕ່ກັບຫັນມາໂຈມຕີຢູເຄຣນຢ່າງຮຸນແຮງອີກ

ການຕັດສິນໃຈຂອງທຣຳທີ່ຈະສົ່ງອາວຸດໃຫ້ຢູເຄຣນນັ້ນ ຖືເປັນຈຸດປ່ຽນສຳລັບປະທານາທິບໍດີຈາກພັກຣີພັບລິກັນຜູ້ນີ້ ຊຶ່ງໃຊ້ເວລາໃນຊ່ວງເດືອນທຳອິດຂອງວາລະການດຳລົງຕຳແໜ່ງ ພະຍາຍາມກ່ອມໃຫ້ປູຕິນບັນລຸຂໍ້ຕົກລົງຢຸດຍິງ ແຕ່ກັບຖືກປະຕິເສດທຸກຄັ້ງ

ພາຍໃຕ້ຂໍ້ຕົກລົງຫຼ້າສຸດນີ້ ທຣຳກ່າວວ່າ ສະຫະລັດຈະສົ່ງອາວຸດທີ່ປະເທດສະມາຊິກນາໂຕເປັນຜູ້ອອກເງິນຄ່າອາວຸດ ຣຸດເຕີກ່າວວ່າ ອາວຸດຈຳນວນຫຼາຍຈະຖືກສົ່ງໃຫ້ຢູເຄຣນ ຊຶ່ງລວມເຖິງຂີປະນາວຸດ ແລະ ລະບົບປ້ອງກັນໄພທາງອາກາດແພັດຣີໂອດ ເປັນສ່ວນໜຶ່ງຂອງການສົ່ງອາວຸດຊຸດທຳອິກ

ປະທານາທິບໍດີໂວໂລດິເມຍ ເຊເລັນສກີ ຂອງຢູເຄຣນ ຮຽກຮ້ອງຫຼາຍຄັ້ງຕໍ່ສະຫະລັດ ແລະ ພັນທະມິດນາໂຕ ໃຫ້ຈັດຫາອາວຸດຊ່ວຍປ້ອງກັນຕົນເອງໃນສົງຄາມທີ່ຮຸນແຮງນີ້

ສະແດງຄຳຄິດເຫັນ