ມາຕາ ເອເລນາ ເຟໂຕ-ກາເບຣາ ລັດຖະມົນຕີວ່າການກະຊວງແຮງງານ ແລະ ປະກັນສັງຄົມຂອງຄິວບາ ລາອອກຈາກຕຳແໜ່ງ

ຫຼັງຈາກທີ່ນາງໄດ້ສະແດງຄວາມຄິດເຫັນໃນການປະຊຸມສະພາທີ່ປະຕິເສດວ່າປະເທດຄິວບາບໍ່ມີຂໍທານ

ລັດຖະມົນຕີກະຊວງແຮງງານຄິວບາເຄີຍກ່າວວ່າບໍ່ມີສິ່ງທີ່ເອີ້ນກວ່າ “ຂໍທານ” ໃນຄິວບາ ແລະ ໂດຍພື້ນຖານແລ້ວ ຜູ້ຄົນທີ່ຄົ້ນຂີ້ເຫຍື້ອກໍ່ເຮັດເຊັ່ນນັ້ນເພາະເລືອກທີ່ຈະຫາ “ເງິນງ່າຍໆ”

ຄວາມຄິດເຫັນຂອງນາງຖືກວິພາກວິຈານຢ່າງກວ້າງຂວາງຈາກຄົນຄິວບາທັງໃນ ແລະ ຕ່າງປະເທດ ແລະ ກະຕຸ້ນໃຫ້ປະທານາທິບໍດີມິເກນ ດິອາຊ-ກາເນນຂອງຄິວບາອອກມາຕອບໂຕ້ ນາງຈຶ່ງລາອອກໃນເວລາບໍ່ດົນຫຼັງຈາກນັ້ນ

ລະດັບຄວາມຍາກຈົນ ແລະ ການຂາດແຄນອາຫານໃນຄິວບາທະວີຄວາມຮຸນແຮງຂຶ້ນ ຂະນະທີ່ປະເທດຍັງຄົງພົບກັບວິກິດເສດຖະກິດທີ່ຮຸນແຮງ

ເຟໂຕ-ກາເບຣາ ໄດ້ສະແດງຄວາມຄິດເຫັນດັ່ງກ່າວເມື່ອຕົ້ນອາທິດທີ່ຜ່ານມາໃນການປະຊຸມສະພານິຕິບັນຍັດແຫ່ງຊາດ ຊຶ່ງນາງໄດ້ກ່າວເຖິງຜູ້ຄົນທີ່ຂໍທານ ແລະ ຄົ້ນຂີ້ເຫຍື້ອໃນຖັງຂີ້ເຫຍື້ອໃນຄິວບາ

ນາງເບິ່ງຄືຈະປະຕິເສດການມີຢູ່ຂອງພວກເຂົາ ໂດຍກ່າວວ່າ “ບໍ່ມີຂໍທານໃນຄິວບາ ມີຄົນຕັ້ງເຮັດເປັນຂໍທານເພື່ອຫາເງິນງ່າຍໆ” ຍິ່ງໄປກວ່ານັ້ນ ນາງຍັງກ່າວຫາວ່າຄົນທີ່ຄົ້ນຖັງຂີ້ເຫຍື້ອເປັນ “ຜູ້ມີສ່ວນຮ່ວມໃນບໍລິການລີໄຊເຄີນຢ່າງຜິດກົດໝາຍ”

ແນວໃດກໍ່ຕາມ ເບິ່ງຄືວ່ານາງໄດ້ປະເມີນຄວາມບໍ່ພໍໃຈຂອງປະຊາຊົນຜິດພາດຢ່າງຊັດເຈນ ລວມເຖິງລະດັບທີ່ຄວາມຄິດເຫັນເຫຼົ່ານັ້ນສະແດງໃຫ້ເຫັນວ່າຜູ້ນຳປະເທດໄຮ້ຄວາມຮູ້ສຶກ ຈົມຢູ່ກັບອຳນາດນິຍົມ ແລະ ຕັດຂາດຈາກການຕໍ່ສູ້ທາງເສດຖະກິດອັນຮ້າຍແຮງຂອງຊາວຄິວບາທົ່ວໄປ

ນັກເຄື່ອນໄຫວ ແລະ ປັນຍາຊົນຊາວຄິວບາຈຳນວນໜຶ່ງໄດ້ຕີພິມຈົດໝາຍຮຽກຮ້ອງໃຫ້ນາງອອກຈາກຕຳແໜ່ງ ໂດຍລະບຸວ່າຄວາມຄິດເຫັນເຫຼົ່ານັ້ນເປັນ “ການດູໝິ່ນປະຊາຊົນຄິວບາ”

ຈາກນັ້ນປະທານາທິບໍດີຄິວບາໄດ້ວິພາກວິຈານເຟໂຕ-ກາເບຣາໃນການປະຊຸມລັດຖະສະພາ ເຖິຈະບໍ່ໄດ້ເອີ້ຍຊື່ນາງໂດຍກົງກໍ່ຕາມ ໂດຍກ່າວວ່າຜູ້ນຳບໍ່ສາມາດ “ກະທຳການດ້ວຍຄວາມດູຖືກຫຍຽດຫຍາມ” ຫຼື “ຕັດຂາດຈາກຄວາມເປັນຈິງ” ຂອງປະຊາຊົນໄດ້

ເປໂດຣ ມອນເຣອານ ນັກເສດຖະສາດຄົນຄິວບາ ໂພສຂໍ້ຄວາມຜ່ານX ວ່າ “ມີຜູ້ຄົນປອມຕົວເປັນລັດຖະມົນຕີ” ໃນຄິວບາ ແລະ ພັກຄອມມຸນິສຄິວບາ ແລະ ລັດຖະບານຍອມຮັບການລາອອກຂອງເຟໂຕ-ກາເບຣາ

ເຖິງວ່າລັດຖະບານຄິວບາຈະບໍ່ໄດ້ເຜີຍແຜ່ຕົວເລກຢ່າງເປັນທາງການກ່ຽວກັບຈຳນວນຂໍທານ ແຕ່ຈຳນວນຂໍທານທີ່ເພີ່ມຂຶ້ນເປັນສິ່ງທີ່ຄົນຄິວບາສ່ວນໃຫຍ່ພົບເຫັນໄດ້ທົ່ວໄປ ທ່າມກາງວິກິດເສດຖະກິດຄັ້ງໃຫຍ່ຂອງປະເທດແຫ່ງນີ້

ສະແດງຄຳຄິດເຫັນ