ກັກໂຕກຸ່ມນາຍໜ້າຄ້າມະນຸດ (ກໍລະນີແຕ່ງດອງແອບແຝງ)

ວັນທີ 23 ມິຖຸນາ 2025 ຜ່ານມາ, ກົມຕໍາຫຼວດສະກັດກັ້ນ ແລະ ຕ້ານການຄ້າມະນຸດ ໄດ້ຮັບແຈ້ງຈາກເຈົ້າໜ້າທີ່ຕໍາຫຼວດ ກວດຄົນເຂົ້າ-ອອກ ເມືອງ ປະຈຳສະໜາມບິນສາກົນວັດໄຕ

ໄດ້ຊ່ວຍເຫຼືອຍິງສາວລາວ ທີ່ສົງໄສຕົກເປັນຜູ້ຖືກເຄາະຮ້າຍຈາກການຄ້າມະນຸດ ຈຳນວນ 01 ຄົນ ຊື່ ນາງ ແພງ (ນາມສົມມຸດ) ອາຍຸ 21 ປີ ເກີດຢູ່ບ້ານ ສີວິໄລ, ເມືອງຈຳພອນ, ແຂວງ ສະຫວັນນະເຂດ ແລະ ໄດ້ກັກໂຕຜູ້ຖືກສົງໄສເປັນນາຍໜ້າຄ້າມະນຸດ ຈຳນວນ 03 ຄົນ, ເປັນຄົນຕ່າງປະເທດ 02 ຄົນ.

ຜ່ານການສືບສວນ-ສອບສວນ ເບື້ອງຕົ້ນ ສາມາດຮູ້ໄດ້ວ່າ ຜູ້ຖືກເຄາະຮ້າຍ ໄດ້ຖືກຂະບວນການນາຍໜ້າຄົນລາວ ຕົວະຍົວະຊັກຊວນໄປເອົາຜົວຄົນຕ່າງປະເທດ, ຊຶ່ງພວກນາຍໜ້າ ໄດ້ໃຫ້ຜູ້ຖືກເຄາະຮ້າຍສົນທະນາຜ່ານທາງໂທລະສັບພຽງແຕ່ເທື່ອດຽວ, ແລ້ວກໍ່ຈັດພິທີສູ່ຂໍໝັ້ນໝາຍຊຶ່ງມີແຕ່ນາຍໜ້າເບື້ອງລາວ ແລະ ນາຍໜ້າຄົນຕ່າງປະເທດເຂົ້າຮ່ວມເທົ່ານັ້ນ, ສ່ວນຜູ້ບ່າວ ແມ່ນບໍ່ໄດ້ເຂົ້າຮ່ວມ, ໂດຍພວກນາຍໜ້າໄດ້ວາງເງິນຄ່າດອງໃຫ້ຄອບຄົວຜູ້ຖືກເຄາະຮ້າຍ ຈຳນວນ 150.000.000 ກີບ.

ຕໍ່ມາຜູ້ຖືກເຄາະຮ້າຍເກີດປ່ຽນໃຈບໍ່ຢາກເອົາຜົວຄົນຕ່າງປະເທດ ຈຶ່ງຖືກຂະບວນການນາຍໜ້າຂົ່ມຂູ່ໃຫ້ສົ່ງເງິນຄືນຈຳນວນ 190.000.000 ກີບ ແລະ ຄໍາ 2 ບາດ ເຊິ່ງມູນຄ່າຫຼາຍກວ່າທີ່ນາຍໜ້າຈ່າຍໃຫ້ເບື້ອງຕົ້ນ,ຍ້ອນບໍ່ມີທາງສູ້ ຈຶ່ງຈໍາເປັນຕ້ອງໄດ້ເອົາຜົວຄົນຕ່າງປະເທດ.

ມາຮອດວັນທີ 24 ມິຖຸນາ 2025 ຈຶ່ງສາມາດກັກຕົວຜູ້ຖືກສົງໄສເປັນນາຍໜ້າຄ້າມະນຸດ ແລະ ຜູ້ຮ່ວມຂະບວນການຄ້າມະນຸດ ໄດ້ເພີ່ມອີກ 05 ຄົນ, ເປັນຄົນຕ່າງປະເທດ 04 ຄົນ.

ປະຈຸບັນເຈົ້າໜ້າທີ່ກຳລັງສືບຕໍ່ຂະຫຍາຍຜົນນຳເອົາກຸ່ມແກ້ງທີ່ຮ່ວມກັນກະທຳຜິດດັ່ງກ່າວມາດຳເນີນຄະດີຕາມຂັ້ນຕອນຂອງກົດໝາຍ.

ຕໍ່ກັບບັນຫາດັ່ງກ່າວ, ກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ຂໍຮຽກຮ້ອງມາຍັງພໍ່ແມ່ປະຊາຊົນບັນດາເຜົ່າໃຫ້ສຶກສາອົບຮົມລູກຫຼານຂອງຕົນເອງ ເພື່ອບໍ່ໃຫ້ຖືກຕົວະຍົວະ, ຊັກຊວນຈາກພວກນາຍໜ້າ ຫຼື ຄົນບໍ່ດີພາໄປແຕ່ງດອງກັບຄົນຕ່າງປະເທດແບບບໍ່ຖືກຕ້ອງ,

ຖ້າຫາກພົບເຫັນ ຫຼື ສົງໃສວ່າເປັນການຄ້າມະນຸດ ໃນກໍລະນີແຕ່ງດອງແອບແຝງ ໃຫ້ແຈ້ງຂໍ້ມູນມາຫາເຈົ້າໜ້າທີ່ບ່ອນທີ່ໃກ້ທີ່ສຸດ ຫຼື ແຈ້ງທາງເບີສາຍດ່ວນ ກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ 1300 ແລະ ເບີວັອດແອັບ 020 22881300.

ຂ່າວ: ຄວາມສະຫງົບ Lao Security News

ສະແດງຄຳຄິດເຫັນ