ນໍ້າຖ້ວມຢູ່ເມືອງເງິນ ເສຍຫາຍຫລາຍກວ່າ 16 ຕື້ກີບ

ໃນລະຫວ່າງວັນທີ 18 – 20 ກໍລະກົດ 2025ນີ້. ທາງຄະນະກໍາມະການຄຸ້ມຄອງໄພພິບັດຂັ້ນແຂວງໄຊຍະບູລີ ນໍາໂດຍ ທ່ານ ຈັດ ຊະນະເລີດ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ໄດ້ປະສານສົມທົບກັບ ຄະນະກໍາມະການຄຸ້ມຄອງໄພພິບັດຂັ້ນເມືອງ– ເມືອງເງິນ ໄດ້ລົງຕິດຕາມ ຜົນກະທົບເສຍຫາຍຈາກໄພນໍ້າຖ້ວມ ຢູ່ເມືອງເງິນ ແຂວງ ໄຊຍະບູລີ.

ໂອກາດດັ່ງກ່າວ ຕາງໜ້າຄະນະກໍາມະການຄຸ້ມຄອງໄພພິບັດຂັ້ນເມືອງ ກໍໄດ້ລາຍງານສະພາບຜົນເສຍຫາຍຈາກໄພນໍ້າຖ້ວມ.

ເລີ່ມແຕ່ໃນຄໍ່າຄືນ ຂອງວັນທີ 16 ກໍລະກົດ 2025 ໄດ້ເກີດມີຝົນຕົກໜັກໃນຂອບເຂດບໍລິເວນພື້ນທີ່ທົ່ວເມືອງເງິນ ເຊິ່ງໄດ້ກໍໃຫ້ເກີດນ້ຳຖ້ວມຊຸບ້ານເຮືອນ, ໄຮ່ນາຮົ້ວສວນ, ດິນເຊາະເຈື່ອນ ສົ່ງຜົນກະທົບຕໍ່ຊັບສິນຂອງພໍ່ແມ່ປະຊາຊົນຊາວເມືອງເງິນໂດຍສະເພາະ ແມ່ນບ້ານໂຮມໄຊ, ບ້ານປາກແຄນ ແລະ ບ້ານທອງ.

ດ້ານທີ່ຢູ່ອາໄສ ລວມມູນຄ່າເສຍຫາຍ 2,226,200,000 ກີບ, ດ້ານພື້້ນຖານໂຄງລ່າງ ລວມມູນຄ່າເສຍຫາຍ 5,587,000,000 ກີບ, ດ້ານກະສິກໍາ ລວມມູນຄ່າເສຍຫາຍ 8,520,810,000 ກີບ, ດ້ານສາທາລະນະສຸກ ລວມມູນຄ່າເສຍຫາຍ 371,000,000 ກີບ, ລວມມູນຄ່າເສຍຫາຍທັງໝົດ 16,746,510,000 ກີບ.

ຈາກນັ້ນທາງຄະນະກໍາມະການຄຸ້ມຄອງໄພພິບັດຂັ້ນແຂວງໄຊຍະບູລີ ແລະ ຄະນະກໍາມະການຄຸ້ມຄອງໄພພິບັດຂັ້ນເມືອງ ແມ່ນໄດ້ລົງມອບເຄື່ອງຊ່ວຍເຫຼືອສຸກເສີນບັນເທົາທຸກ ໃຫ້ 40 ຄອບຄົວ ທີ່ຖືກຜົນກະທົບ ຈຳນວນ 3 ບ້ານຄື ບ້ານໂຮມໄຊ, ບ້ານປາກແຄນ ແລະ ບ້ານທອງ.

ເປັນຕົ້ນແມ່ນ ເຂົ້າສານຈ້າວ, ເຄື່ອງໃຊ້ຄົວເຮືອນ, ເຄື່ອງນຸ່ງຫົ່ມ, ເຄື່ອງນອນ, ອາຫານແຫ້ງ, ນ້ຳດື່ມ ແລະ ອື່ນໆ ຄິດມູນຄ່າທັງໝົດ 44 ລ້ານ ກວ່າກີບ.

ຂ່າວ: ຖວທ ເມືອງເງິນ.

ສະແດງຄຳຄິດເຫັນ