ນາຍົກລັດຖະມົນຕີອັນວາ ອິບຣາຮິມ ຂອງມາເລເຊຍ ປະກາດມາດຕະການໃໝ່ ເພື່ອຈັດການກັບຄວາມກັງວົນຂອງປະຊາຊົນກ່ຽວກັບບັນຫາຄ່າຄອງຊີບທີ່ສູງຂຶ້ນ ຊຶ່ງລວມເຖິງການແຈກເງິນຊ່ວຍເຫຼືອປະຊາຊົນຜູ້ໃຫຍ່ທຸກຄົນ ຄົນລະ 100 ຣິງກິດ ແລະ ຄຳໝັ້ນວ່າຈະຫຼຸດລາຄານ້ຳມັນເຊື້ອເພີງ

ການປະກາດດັ່ງກ່າວເກີດຂຶ້ນກ່ອນແຜນການຈັດການປະທ້ວງໃນນະຄອນກົວລາລຳເປີ ໃນວັນເສົານີ້ (26 ກໍລະກົດ) ໂດຍຮຽກຮ້ອງໃຫ້ ທ່ານ ອັນວາ ລາອອກຈາກຕຳແໜ່ງ ເນື່ອງຈາກບັນຫາລາຄາສິນຄ້າທີ່ສູງຂຶ້ນແລະຄວາມລົ້ມເຫຼວໃນການປະຕິຮູບທີ່ສັນຍາໄວ້ ລວມເຖິງຂໍ້ກັງວົນອື່ນໆ.

ລັດຖະບານຂອງອັນວາໄດ້ດຳເນີນມາດຕະການຫຼາຍຢ່າງເພື່ອກະຕຸ້ນລາຍໄດ້ ແລະ ຜົນຜະລິດໃນປີນີ້ ລວມເຖິງການຂຶ້ນຄ່າແຮງຂັ້ນຕ່ຳ, ການຂຶ້ນຄ່າໄຟຟ້າສຳລັບຜູ້ໃຊ້ໄຟຟ້າລາຍໃຫຍ່ ແລະ ພາສີການຂາຍໃໝ່ສຳລັບໝາກໄມ້ນຳເຂົ້າແລະສິນຄ້າຟຸ່ມເຟືອຍບາງລາຍການ.

ທ່ານ ອັນວາ ກ່າວວ່າມາດຕະການເຫຼົ່ານີ້ມຸ່ງເປົ້າໄປທີ່ທຸລະກິດຂະໜາດໃຫຍ່ ແລະ ກຸ່ມຄົນຮັ່ງມີເປັນຫຼັກ ແຕ່ນັກວິຈານໄດ້ສະແດງຄວາມກັງວົນວ່າຕົ້ນທຶນທີ່ສູງຂຶ້ນຈະຖືກສົ່ງຕໍ່ໄປຍັງຜູ້ບໍລິໂພກໃນທີ່ສຸດຊຶ່ງລວມເຖິງຜູ້ມີລາຍໄດ້ນ້ອຍ ແລະ ປານກາງ.

ເມື່ອວັນພຸດທີ່ຜ່ານມາ ທ່ານອັນວາກ່າວວ່າຄົນມາເລເຊຍທີ່ເປັນຜູ້ໃຫຍ່ທຸກຄົນທີ່ມີອາຍຸ 18 ປີຂຶ້ນໄປຈະໄດ້ຮັບເງິນຊ່ວຍເຫຼືອຄັ້ງດຽວ 100 ຣິງກິດ (ປະມານ 508,000 ກີບ) ຊຶ່ງຈະຈ່າຍຕັ້ງແຕ່ວັນທີ 31 ສິງຫາເປັນຕົ້ນໄປ

ໂດຍລັດຖະບານຈະຈັດສັນເງິນຊ່ວຍເຫຼືອລວມ 15,000 ລ້ານຣິງກິດໃນປີ 2025 ເພີ່ມຂຶ້ນຈາກ 13,000 ລ້ານຣິງກິດທີ່ໄດ້ຮັບການຈັດສັນໄວ້ເດີມສຳລັບປີດັ່ງກ່າວ.

ດ້ານຕຳຫຼວດມາເລເຊຍກ່າວວ່າຄາດວ່າຈະມີຜູ້ເຂົ້າຮ່ວມການປະທ້ວງຊຶ່ງຈັດໂດຍພັກຝ່າຍຄ້ານ ໃນວັນເສົານີ້ປະມານ 10,000 ຫາ 15,000 ຄົນ.

ທ່ານ ອັນວາກ່າວວ່າ “ຂ້າພະເຈົ້າຮັບຊາບຂໍ້ຮ້ອງທຸກ ແລະ ຍອມຮັບວ່າຄ່າຄອງຊີບຍັງຄົງເປັນຄວາມທ້າທາຍທີ່ຕ້ອງໄດ້ຮັບການແກ້ໄຂ ເຖິງແມ່ນວ່າພວກເຮົາຈະໄດ້ປະກາດມາດຕະການຕ່າງໆ ໄປແລ້ວກໍຕາມ” ຍັງເສີມວ່າຈະມີການລິເລີ່ມໂຄງການເພີ່ມເຕີມເພື່ອຊ່ວຍເຫຼືອຜູ້ຍາກຈົນໃນວັນພະຫັດນີ້.

ລັດຖະບານຈະປະກາດລາຍລະອຽດກ່ຽວກັບແຜນການຍົກເລີກເງິນອຸດໜຸນແບບເໝົາລວມສຳລັບນ້ຳມັນເຊື້ອເພີງ RON95 ທີ່ໃຊ້ກັນຢ່າງຫຼາຍກ່ອນໝົດເດືອນກັນຍາ

ທ່ານ ອັນວາ ກ່າວວ່າ ເມື່ອມີການປ່ຽນແປງນະໂຍບາຍເງິນອຸດໜຸນແລ້ວ ລາຄານ້ຳມັນຈະຫຼຸດລົງເຫຼືອ 1.99 ຣິງກິດຕໍ່ລິດ ເມື່ອທຽບກັບລາຄາປັດຈຸບັນທີ່ 2.50 ຣິງກິດ

ຢ່າງໃດກໍຕາມ ລາວກ່າວເສີມວ່າ ຄົນຕ່າງປະເທດຈະຕ້ອງຈ່າຍນ້ຳມັນໃນລາຄາຕະຫຼາດທີ່ບໍ່ໄດ້ຮັບການອຸດໜຸນ.

ລາວເຄີຍກ່າວໃນສຸນທະລະພົດກ່ຽວກັບງົບປະມານປີ 2025 ເມື່ອປີທີ່ຜ່ານມາວ່າ ຈະມີການຕັດເງິນອຸດໜຸນ 95 ຣິງກິດ ສຳລັບກຸ່ມຜູ້ມີລາຍໄດ້ສູງສຸດ 15% ຂອງມາເລເຊຍ ຍັງບໍ່ເປັນທີ່ແນ່ນອນວ່ານີ້ເປັນສ່ວນໜຶ່ງຂອງແຜນການປັບໂຄງສ້າງງົບປະມານຫຼືບໍ່.

ປະຊາຊົນມາເລເຊຍຊົນຊັ້ນກາງບາງສ່ວນສະແດງຄວາມກັງວົນວ່າພວກເຂົາອາດຕົກຢູ່ໃນກຸ່ມນີ້ ຊຶ່ງການສຳຫຼວດລາຍໄດ້ໃນປີ 2022 ລະບຸວ່າເປັນຄົວເຮືອນຊົນຊັ້ນກາງມີລາຍໄດ້ລວມຕໍ່ເດືອນຢ່າງໜ້ອຍ 13,500 ຣິງກິດ ເຖິງແມ່ນວ່າຈະປະສົບບັນຫາຄ່າໃຊ້ຈ່າຍທີ່ສູງຂຶ້ນຢູ່ແລ້ວກໍຕາມ.

ທ່ານ ອັນວາຍັງປະກາດການຈັດສັນງົບປະມານເພີ່ມເຕີມສຳລັບໂຄງການຂອງລັດຖະບານທີ່ມຸ່ງເພີ່ມການເຂົ້າເຖິງສິນຄ້າ ແລະ ສິ່ງຈຳເປັນໃນລາຄາທີ່ເຂົ້າເຖິງໄດ້ ແລະ ໃຫ້ຄຳໝັ້ນສັນຍາວ່າຈະປັບປຸງມາດຕະການຊ່ວຍເຫຼືອອື່ນໆ ທີ່ມີຢູ່.

ອັດຕາເງິນເຟີ້ຂອງມາເລເຊຍຫຼຸດລົງໃນປີນີ້ ແຕ່ຍັງຄົງມີຄວາມກັງວົນກ່ຽວກັບລາຄາສິນຄ້າອຸປະໂພກບໍລິໂພກພື້ນຖານ ເຊັ່ນ: ອາຫານ ທີ່ສູງຂຶ້ນ ຂໍ້ມູນທີ່ເຜີຍແຜ່ໃນອາທິດນີ້ສະແດງໃຫ້ເຫັນວ່າລາຄາຜູ້ບໍລິໂພກເພີ່ມຂຶ້ນ 1.1% ຈາກຊ່ວງດຽວກັນຂອງປີກ່ອນໃນເດືອນມິຖຸນາທີ່ຜ່ານມາ ແຕ່ລາຄາອາຫານ ແລະ ເຄື່ອງດື່ມກັບເພີ່ມຂຶ້ນໃນອັດຕາທີ່ໄວກວ່າເຖິງ 2.1%.

ສະແດງຄຳຄິດເຫັນ