ພາຍຫຼັງໄດ້ຮັບແຈ້ງຄວາມຈາກນາງ ຢາດຟ້າ ອາຍຸ 23 ປີ ອາຊີບຄ້າຂາຍ ຢູ່ບ້ານດ່ານຄໍາ ເມືອງສີໂຄດຕະບອງ ວ່າ :

ໃນວັນທີ 21 ກໍລະກົດ 2025 ເວລາ 19:45 ໂມງ ຜູ້ກ່ຽວ ແລະ ຫຼານສາວ ໄດ້ໄປຈອດລົດຮຸນໃດສັນຕາເຟ ສີຂາວ ປ້າຍທະບຽນ ກມ 1520 ກໍາແພງນະຄອນ ເພື່ອໄປຊື້ຊີ້ນດາດໂລຢູ່ບ້ານ ສີໄຄທ່າ, ເມືອງ ສີໂຄດຕະບອງ ແລະ ໄດ້ພາກັນລົງຈາກລົດທີ່ຕິດຈັກໄວ້ເວລານັ້ນ ໄດ້ມີຄົນຮ້າຍມາລັກເອົາໄອແພັດຈໍານວນ 1 ໜ່ວຍ ຢູ່ໃນລົດ ແລະ ເອົາຕົວຫຼົບໜີ.

ຈາກນັ້ນ, ເຈົ້າໜ້າທີ່ວິຊາສະເພາະກອງບັນຊາການ ປກສ ເມືອງສີໂຄດຕະບອງ ສົມທົບກັບເຈົ້າໜ້າທີ່ກອງບັນຊາການ ປກສ ເມືອງຈັນທະບູລີ ນະຄອນຫຼວງວຽງຈັນ

ເຂົ້າແກ້ໄຂເປົ້າໝາຍລັກຊັບຢູ່ບ້ານບຸ່ງພ້າວ ເມືອງທຸລະຄົມ ແຂວງວຽງຈັນ ວັນທີ 24 ກໍລະກົດ 2025 ເວລາ 16:44 ໂມງ ສາມາດຈັບຕົວເປົ້າໝາຍໄດ້ຈໍານວນ 1 ຄົນຊື່ທ້າວ ພອນສະຫວັນ ຫຼື ໂຕ້ ອາຍຸ 28 ປີ ປັດຈຸບັນຢູ່ບ້ານໜອງທາເໜືອ ເມືອງຈັນທະບູລີ ນະຄອນຫຼວງວຽງຈັນ ພ້ອມກັບວັດຖຸເຄື່ອງຂອງກາງຈຳນວນຫຼາຍລາຍການ ແລະ ພາຫະນະນໍາໃຊ້ໃນການກໍ່ເຫດ.

ຜ່ານການສືບສວນ–ສອບສວນທ້າວ ພອນສະຫວັນ ຈັນທະວົງ ຫຼື ໂຕ້ ຍອມຮັບສາລະພາບຕໍ່ເຈົ້າໜ້າທີ່ວ່າ : ໃນຊ່ວງປີ 2024 ຫາ 2025 ທ້າວ ພອນສະຫວັນ ຈັນທະວົງ ໄດ້ເຄື່ອນໄຫວລັກຊັບຢູ່ໃນນະຄອນຫຼວງວຽງຈັນທັງໝົດ 21 ຄັ້ງ

ໂດຍນໍາໃຊ້ພາຫະນະກໍ່ເຫດຄື: ລົດຈັກຍີ່ຫໍ້ : PCX (ພີຊີເອັກ) ສີຂາວ ຕິດປ້າຍທະບຽນ ທທ 2499 ກໍາແພງນະຄອນ ແລະ ລົດຈັກຍີ່ຫໍ້ : X-MAX ສີດໍາ ຕິດປ້າຍທະບຽນ ດຫ 4131 ກໍາແພງນະຄອນ ເພື່ອຂັບຂີ່ໄປລັກເອົາເຄື່ອງຂອງ, ຊັບສິນເງິນ–ຄໍາ ແລະ ວັດຖຸທີ່ມີຄ່າ ຢູ່ໃນລົດໃຫຍ່ຂອງບັນດາຄົນທີ່ຈອດແຄມທາງ ແລ້ວລົງໄປຊື້ເຄື່ອງ

ໃນນັ້ນເຈົ້າໜ້າທີ່ໄດ້ເກັບກູ້ວັດຖຸເຄື່ອງຂອງກາງ, ພາຫະນະນໍາໃຊ້ ເຂົ້າໃນການກະທໍາຜິດມີຄື:

1/ ໂທລະສັບໄອໂຟນຈໍານວນ 2 ໜ່ວຍ ແລະ ໂທລະສັບຊໍາຊຸງ 1 ໜ່ວຍ

2/ ສາຍຄໍສີເຫຼືອງຄ້າຍຄືຄໍາຈໍານວນ 1 ເສັ້ນ

3/ ສາຍແຂນສີເຫຼືອງຄ້າຍຄືຄໍາຈໍານວນ 1 ເສັ້ນ

4/ ຕຸ້ມຫູສີເຫຼືອຄ້າຄືຄໍາຈໍານວນ 1 ຄູ່

5/ ລົດຈິບຍີ່ຫໍ້ : ຮຸນໃດວີແລັດເຕີ່ ສີແດງ ເລກທະບຽນ ກວ 3637 ກໍາແພງນະຄອນ 1 ຄັນ

6/ ຜົງສີຂາວບໍ່ຮູ້ນໍ້າໜັກໃນຖົງຢາງນ້ອຍຈໍານວນ 1 ຖົງ

7/ ລູກກຸນແຈລົດໃຫຍ່ຈໍານວນ 14 ລູກ

8/ ຢາບ້າຈໍານວນ 1 ເມັດ

9/ ກະເປົາຫິ້ວ ແລະ ກະເປົາພາຍຈໍານວນ 56 ໜ່ວຍ

10/ ໝວກກັນນັອກຈໍານວນ 3 ໜ່ວຍ (ໃສ່ນໍາໃຊ້ກໍ່ເຫດ)

11/ ເສື້ອກັນລົມ ແລະ ເສື້ອວອມແຂນຍາວຈໍານວນ 6 ຜືນ (ນຸ່ງນໍາໃຊ້ກໍ່ເຫດ)

12/ ອຸປະກອນນິລະໄພ 1 ອັນ

13/ ລູກປືນອັດລົມຈໍານວນ 39 ລູກ

14/ ປ້າຍທະບຽນລົດຈັກ ທທ 2499 ກໍາແພງນະຄອນ ແລະ ທທ 2346 ກໍາແພງນະຄອນ 2 ປ້າຍ

15/ ລົດຈັກຮອນດ້າ PCX ສີຂາວ ຕິດປ້າຍທະບຽນ ດຫ 4131 ຈໍານວນ 1 ຄັນ (ລົດນໍາໃຊ້ກໍ່ເຫດ)

16/ ໂທລະສັບມືຖື ແລະ ໂນດບຸກຈໍານວນໜື່ງ (ສະພາບເປ່ເພໃຊ້ການບໍ່ໄດ້).

ຕໍ່ກັບເປົ້າໝາຍດັ່ງກ່າວ ເຈົ້າໜ້າທີ່ວິຊາສະເພາະ ປກສ ເມືອງ ສີໂຄດຕະບອງ ຍັງຈະສືບຕໍ່ສືບສວນ–ສອບສວນ ຂະຫຍາຍຜົນໃນຄັ້ງຕໍ່ໄປ ເພື່ອຊອກຫາແຮງຈູງໃຈໃນການກໍ່ເຫດ, ຊອກຫາກຸ່ມແກ້ງ ແລະ ນໍາຊອກ–ນໍາຈັບມາດໍາເນີນຄະດີຕາມກົດໝາຍ.

ທີ່ມາ: ຄວາມສະຫງົບ

ສະແດງຄຳຄິດເຫັນ