ປະທານາທິບໍດີໂດນັລ ທຣຳ ແຫ່ງສະຫະລັດ ໃນວັນອາທິດ (27 ກໍລະກົດ) ເຊື່ອວ່າທັງໄທແລະກຳປູເຈຍ ຕ້ອງການແກ້ໄຂຄວາມເຫັນບໍ່ຕົງກັນ ຫຼັງຈາກໄດ້ລົມທາງໂທລະສັບກັບຜູ້ນຳຂອງທັງ 2 ປະເທດ ຊຶ່ງລະຫວ່າງນັ້ນເພິ່ນໄດ້ຂົ່ມຂູ່ວ່າຈະບໍ່ເຈລະຈາຕົກລົງການຄ້າກັບທັງ 2 ປະເທດ ຈົນກວ່າຈະຢຸດສູ້ຣົບ

“ຂ້ອຍໄດ້ສົນທະນາກັບນາຍົກລັດຖະມົນຕີທັງ 2 ແລະ ຂ້ອຍຄິດວ່າພວກເພິ່ນຕ້ອງການແກ້ໄຂຄວາມຂັດແຍ້ງແລ້ວໃນຕອນນີ້” ທຣຳບອກກັບພວກນັກຂ່າວ ໃນຊ່ວງຕົ້ນຂອງການພົບປະຫາລືທາງການຄ້າກັບ ອົວຊູລາ ຟ໋ອນ ແດຮ໌ ລາຍເອິນ ປະທານຄະນະກຳມະການເອີຣົບ ໃນວັນອາທິດ (27 ກໍລະກົດ)

ທຣຳ ຍັງເຊື່ອວ່າພວກເຈົ້າໜ້າທີ່ໄທ ແລະ ກຳປູເຈຍ ມີກຳນົດພົບປະກັນໃນໄວໆນີ້

ກ່ອນໜ້ານີ້ ໄທແລະກຳປູເຈຍ ໃນວັນອາທິດ (27 ກໍລະກົດ) ສົ່ງສັນຍານວ່າທັງ 2 ປະເທດ ພ້ອມເຈລະຈາຢຸດຕິຂໍ້ຂັດແຍ້ງນອງເລືອດດ້ານຊາຍແດນ  ຕາມຫຼັງມີຄວາມພະຍາຍາມເປັນຄົນກາງໂດຍປະທານາທິບໍດີທຣຳ ເວລານີ້ການສູ້ຣົບທີ່ເຂົ້າສູ່ວັນທີ່ 4 ສັງຫານຜູ້ຄົນໄປແລ້ວຢ່າງໜ້ອຍ 34 ຄົນ ແລະ ປະຊາຊົນຕ້ອງຍົກຍ້າຍຖິ່ນຖານກວ່າ 168,000 ຄົນ

ທຣຳ ໂພສຂໍ້ຄວາມເທິງທຣັດສ໌ໂຊຊຽລໃນວັນເສົາ (26 ກໍລະກົດ) ວ່າເພິ່ນໄດ້ສົນທະນາທາງໂທລະສັບກັບຜູ້ນຳຂອງທັງໄທແລະກຳປູເຈຍ ເຕືອນວ່າຈະບໍ່ເດີນໜ້າຂໍ້ຕົກລົງການຄ້າກັບທັງ 2 ປະເທດ ຖ້າຄວາມເປັນປໍລະປັກບໍ່ຢຸດລົງ ຕໍ່ມາເພິ່ນອ້າງວ່າທັງ 2 ຝ່າຍເຫັນດີພົບປະກັນເພື່ອເຈລະຈາຢຸດຍິງ

ຮຸນ ມາເນັດ ນາຍົກລັດຖະມົນຕີກຳປູເຈຍ ລະບຸໃນວັນອາທິດ (27ກໍລະກົດ) ວ່າປະເທດຂອງເພິ່ນຕົກລົງຫາທາງຢຸດຍິງໃນທັນທີ ແລະ ບໍ່ມີເງື່ອນໄຂ ທຣຳບອກກັບເພິ່ນວ່າ ໄທ ກໍເຫັນເຫັນດີຢຸດຍິງເຊັ່ນກັນ ຫຼັງຈາກ ທຣຳ ສົນທະນາກັບ ທ່ານ ພູມິທຳ ເວຊະຍະໄຊ ຜູ້ຮັກສາການນາຍົກລັດຖະມົນຕີຂອງໄທ “ມັນເປັນຂ່າວໃນແງ່ບວກສຳລັບທະຫານແລະປະຊາຊົນຂອງທັງ 2 ປະເທດ” ຮຸນ ມາເນັດ ລະບຸໃນຖະແຫຼງການ

ເພິ່ນເປີດເຜີຍວ່າໄດ້ມອບໝາຍໃຫ້ ປຣັກ ສຸຄົນ ລັດຖະມົນຕີຕ່າງປະເທດກຳປູເຈຍ ປະສານງານຂັ້ນຕໍ່ໄປກັບ ມາກໂກ ຣູບິໂອ ລັດຖະມົນຕີຕ່າງປະເທດສະຫະລັດ ແລະ ປະສານງານໂດຍກົງກັບລັດຖະມົນຕີຕ່າງປະເທດຂອງໄທ ເພື່ອບັງຄັບໃຊ້ຂໍ້ຕົກລົງຢຸດຍິງ

ໄທ ສະແດງຈຸດຢືນສະໜັບສະໜູນຢ່າງລະມັດລະວັງ ໂດຍ ທ່ານ ພູມິທຳ ຂອບໃຈ ທຣຳ ແລະ ບອກວ່າໄທເຫັນດີໃນຫຼັກການຂອງການຢຸດຍິງ ແຕ່ເນັ້ນຍ້ຳວ່າຈຳເປັນຕ້ອງມີຄວາມຕັ້ງໃຈຈິງຂອງຝ່າຍກຳປູເຈຍ ຈາກຄຳະແຫຼງການຂອງກະຊວງການຕ່າງປະເທດໄທ

ທັ້ງນີ້ລາຍງານຂ່າວຂອງຊີເອັນບີຊີລະບຸວ່າ ທ່ານ ພູມິທຳ ຮຽກຮ້ອງໃຫ້ມີການເຈລະຈາທະວິພາຄີ ໃນທັນທີ ເພື່ອຫາລືກ່ຽວກັບມາດຕະການທີ່ເປັນຮູບປະທຳໃນການຫາທາງອອກຢ່າງສັນຕິ

ຢ່າງໃດກໍຕາມ ກຳປູເຈຍແລະໄທຍັງຄົງຍິງຕອບໂຕ້ຂ້າມຊາຍແດນທີ່ເປັນຂໍ້ຂັດແຍ້ງເປັນວັນທີ່ 4 ໃນວັນອາທິດ (27 ໍລະກົດ) ບໍ່ເທົ່າໃດຊົ່ວໂມງຫຼັງຈາກປະທານາທິບໍດີທຣຳ ເຜີຍວ່າທັງ 2 ຊາດອາຊຽນຕົກລົງເຈລະຈາຢຸດຍິງ ແລະ ຂູ່ວ່າຫາກຍັງເດີນໜ້າສູ້ຣົບກັນຕໍ່ ມັນຈະທຳລາຍຂໍ້ຕົກລົງການຄ້າກັບວໍຊິງຕັນ

ສະແດງຄຳຄິດເຫັນ