ນັກວິໄຈຈີນປະສົບຄວາມສຳເລັດໃນການເພາະລ້ຽງໝາກໄຂ່ຫຼັງທຽມຂອງມະນຸດຈາກຫ້ອງແລັບ ຫຼື Kidney Lab Grown ທີ່ໃຊ້ງານໄດ້ແທ້ ສາມາດຕອງເລືອດ ປັບສົມດຸນອິເລັກໂທຣໄລ ແລະ ຜະລິດປັດສາວະໄດ້ ໂດຍບໍ່ຕ້ອງຜ່ານກະບວນການອື່ນໃດໆທັງສິ້ນ

ນັກວິທະຍາສາດບອກວ່າ ໝາກໄຂ່ຫຼັງເພາະລ້ຽງນີ້ໄດ້ຈາກອະໄວຍະວະແທ້ຈິງ ທີ່ຜ່ານການດັດແປງທາງຊີວະວິສະວະກຳ ບໍ່ແມ່ນແບບຈຳລອງ

ເພາະລ້ຽງໃຫ້ຄືໝາກໄຂ່ຫຼັງແທ້

ທີມວິໄຈໃຊ້ອອກແກນອຍດ໌ທີ່ໄດ້ຈາກເຊວຕົ້ນກຳເນີດ ຝັງລົງເທິງໂຄງຍຶດຫຼອດເລືອດທີ່ສ້າງຈາກໄຮໂດຣເຈວທີ່ຍ່ອຍສະຫຼາຍໄດ້ທາງຊີວະພາບ

ຫຼາຍອາທິດຜ່ານໄປ ເນື້ອເຍື່ອຈະຈະເລີນເຕີບໂຕເປັນຫົວໜ່ວຍເຮັດວຽກພື້ນຖານຂອງໝາກໄຂ່ຫຼັງ ທີ່ມີໜ້າທີ່ຕອງຂອງເສຍ ເອີ້ນວ່າ ລະບົບເນຟຣອນ ຊຶ່ງປະກອບດ້ວຍໂກເມີຣູລັດ ທໍ່ໝາກໄຂ່ຫຼັງ ແລະ ໂຄງສ້າງສຳລັບເກັບປັດສາວະ

ຈາກນັ້ນໝາກໄຂ່ຫຼັງເພາະລ້ຽງຈະເຊື່ອມຕໍ່ກັບວົງຈອນໄຫຼວຽນໂລຫິດທຽມ ແລະ ເລີ່ມກອງພລາສມາເລືອດແບບຣຽວໄທມ໌

ນະວັດຕະກຳໝາກໄຂ່ຫຼັງເພາະລ້ຽງນີ້ ຕ່າງຈາກໝາກໄຂ່ຫຼັງທຽມຊີວະພາບຮຸ່ນກ່ອນໆ ທີ່ເຮັດວຽກໄດ້ພຽງບາງສ່ວນ ຫຼື ຕ້ອງອາໄສກະບວນການບາງຢ່າງ ເພື່ອຊ່ວຍໃຫ້ໝາກໄຂ່ຫຼັງທຽມເຮັດວຽກໄດ້ໃກ້ຄຽງກັບອະໄວຍະວະຈິງ

ໝາກໄຂ່ຫຼັງເພາະລ້ຽງນີ້ ສາມາດຕອງຂອງເສຍອອກຈາກເລືອດໄດ້ດົນກວ່າ 60 ຊົ່ວໂມງ ແຍກຂອງເສຍອອກຈາກເລືອດ ແລະ ນຳພລາສມາທີ່ສະອາດກັບມາ ແລະ ຍັງຕອບສະໜອງຕໍ່ສັນຍານຮໍໂມນ ເຊັ່ນ: ADH ແລະ ອັນໂດສເຕີໂຣນ ຊ່ວຍປັບລະດັບການກັກເກັບນ້ຳ ແລະ ເກືອ

ຄວາມຫວັງຊ່ວຍເຫຼືອຄົນເຈັບໝາກໄຂ່ຫຼັງບໍ່ເຮັດວຽກ

ຄວາມກ້າວໜ້າຄັ້ງນີ້ຊ່ວຍແກ້ໄຂວິກິດການຄັ້ງໃຫຍ່ທີ່ສຸດຄັ້ງຫນຶ່ງໃນວົງການແພດ ນັ້ນຄື ໝາກໄຂ່ບໍ່ເຮັດວຽກ ຊຶ່ງສົ່ງຜົນກະທົບຕໍ່ຜູ້ຄົນກວ່າ 850 ລ້ານຄົນທົ່ວໂລກ

ປັນຫາການຂາດແຄນຜູ້ບໍລິຈາກ ການປະຕິເສດການປູກຖ່າຍ ແລະ ການພຶ່ງພາການຟອກໝາກໄຂ່ຫຼັງ ເຮັດໃຫ້ການຮັກສາມີຂໍ້ຈຳກັດມາຫຼາຍທົດສະວັດ

ແຕ່ອະໄວຍະວະທີ່ສ້າງຂຶ້ນໃນຫ້ອງແລັບນີ້ສາມາດກຳຈັດລາຍຊື່ຜູ້ຖ້າຄິວໄດ້ ແລະ ນຳສະເໜີວິທີແກ້ປັນຫາສະເພາະບຸກຄົນໂດຍບໍ່ເກີດການປະຕິເສດ

ຂັ້ນຕອນຕໍ່ໄປ

ຂະນະນີ້ທີມເທັກໂນໂລຢີຊີວະພາບຂອງຈີນກຳລັງດຳເນີນການທົດລອງກັບໝູ ໂດຍຄາດວ່າຈະມີການສຶກສານຳທາງການແພດໃນມະນຸດພາຍໃນສອງປີ

ເປົ້າໝາຍຂອງພວກເຂົາຄືການພັດທະນາໝາກໄຂ່ຫຼັງທີ່ພ້ອມສຳລັບການປູກຖ່າຍ ຊຶ່ງເຮັດຈາກເຊວຂອງຄົນເຈັບເອງ ເພື່ອກຳຈັດການປະຕິເສດທັງໝົດ

ຫາກປະສົບຄວາມສຳເລັດ ໝາກໄຂ່ຫຼັງທຽມນີ້ຈະບໍ່ພຽງແຕ່ປ່ຽນແປງລະບົບໝາກໄຂ່ຫຼັງເທົ່ານັ້ນ

ແຕ່ຍັງຈະເປັນຈຸດເລີ່ມຕົ້ນຂອງການຜະລິດອະໄວຍະວະຕາມຄວາມຕ້ອງການ ຊຶ່ງເປັນເປົ້າໝາຍສູງສຸດຂອງເວດຊະສາດການຟື້ນຟູ

ສະແດງຄຳຄິດເຫັນ