ຄວາມສຳຄັນຂອງການປ່ຽນແປງ ແລະ ການພັດທະນາບັດປະຈຳຕົວປະຊາຊົນ

ປະເທດລາວ ດິນແດນແຫ່ງຄວາມສະຫງົບ ແລະ ສວຍສົດງົດງາມ ກຳລັງກ້າວເຂົ້າສູ່ຍຸກເຕັກໂນໂລຊີທີ່ທັນສະໄໝ, ເຊິ່ງມີບົດບາດສໍາຄັນໃນຊີວິດປະຈໍາວັນຂອງປະຊາຊົນ, ມັນເປັນສິ່ງຈໍາເປັນທີ່ຈະປັບຕົວໃຫ້ທັນກັບການປ່ຽນແປງຢ່າງໄວວາຂອງສັງຄົມ.

ສໍາລັບ ສປປ ລາວ ການພັດທະນາບັດປະຈໍາຕົວ ເພື່ອຫັນເຂົ້າສູ່ຍຸກດິຈິຕ໋ອນ ບໍ່ພຽງແຕ່ເປັນການປ່ຽນແປງທາງດ້ານເຕັກໂນໂລຊີທີ່ທັນສະໄໝ, ແຕ່ມັນເປັນການປ່ຽນແປງທີ່ສຳຄັນທີ່ຈະຫັນປ່ຽນອະນາ ຄົດຂອງປະເທດ.

ບັດປະຈໍາຕົວແບບເກົ່າທີ່ພວກເຮົາເຄີຍນຳໃຊ້ແມ່ນມີຂໍ້ຈໍາກັດຫຼາຍຢ່າງ, ເຊິ່ງຂໍ້ມູນໃນບັດປະຈຳຕົວແບບເກົ່າຍັງບໍ່ສາມາດເຊື່ອມໂຍງກັບຂະແໜງການອື່ນໄດ້ ລວມທັງຄວາມປອດໄພຂອງຂໍ້ມູນ.

ມາຮອດປັດຈຸບັນ, ລັດຖະບານເຫັນໄດ້ຄວາມສໍາຄັນ ຈຶ່ງພັດທະນາຖານຂໍ້ມູນພົນລະເມືອງ ແລະ ບັດປະຈຳຕົວ ໃຫ້ມີຄວາມທັນສະໄໝ ເພື່ອກ້າວເຂົ້າສູ່ຍຸກດິຈິ ຕ໋ອນ ແລະ ເປັນໂອກາດທີ່ດີ ທີ່ຈະເຮັດໃຫ້ພວກເຮົາພັດທະນາລະບົບບັດປະຈຳຕົວໃຫ້ມີປະສິດທິພາບສູງຂຶ້ນກວ່າເກົ່າ.

ບັດປະຈໍາຕົວດິຈິຕອນ ຈະຊ່ວຍໃຫ້ປະຊາຊົນເຂົ້າເຖິງການບໍລິການຕ່າງໆ ຂອງພາກລັດ ແລະ ເອກະຊົນ ຢ່າງສະດວກ, ສະບາຍ ແລະ ວ່ອງໄວ ບໍ່ວ່າຈະເປັນການເຮັດທຸລະກໍາອອນໄລນ໌, ການຮ້ອງຂໍເອກະສານ ຫຼື ຕິດຕໍ່ກັບອົງການຂອງລັດຖະບານ;

ນອກນີ້, ຍັງເປັນພື້ນ ຖານທີ່ສໍາຄັນສໍາລັບການສົ່ງເສີມເສດຖະກິດດິຈິຕ໋ອນ ສ້າງໂອກາດໃຫ້ບັນດາຫົວໜ່ວຍທຸລະກິດເຕີບໂຕ ແລະ ສ້າງລາຍຮັບໃຫ້ແກ່ປະຊາຊົນ.

ສໍາລັບລັດຖະບານ, ມີຖານຂໍ້ມູນພົນລະເມືອງທີ່ຖືກຕ້ອງ ແລະ ທັນສະໄໝ ຈະຊ່ວຍໃຫ້ການຄຸ້ມຄອງລັດ-ຄຸ້ມຄອງສັງຄົມມີປະສິດທິພາບສູງຂຶ້ນ ສາມາດວິເຄາະຂໍ້ມູນ ແລະ ວາງແຜນພັດທະນາເສດຖະກິດ-ສັງຄົມ ໄດ້ຢ່າງຖືກຕ້ອງ ຊັດເຈນ.

ບັດປະຈໍາຕົວປະຊາຊົນແບບດິຈິຕອນແມ່ນມີລະບົບຖານຂໍ້ມູນທີ່ມີຄວາມປອດໄພ ແລະ ແມ່ນບຸລິມະສິດອັນດັບໜຶ່ງຂອງກະຊວງປ້ອງກັນຄວາມສະຫງົບ, ບັດປະຈໍາຕົວປະຊາຊົນແບບດິຈິຕ໋ອນຖືກອອກແບບສະເພາະດ້ວຍລະບົບຄວາມປອດໄພສູງ ທີ່ທັນສະໄໝ, ເພື່ອຮັບປະກັນໃຫ້ພົນລະເມືອງມີຄວາມໝັ້ນໃຈ ຂໍ້ມູນຖືກປ້ອງກັນການປອມແປງ ແລະ ຫຼຸດຜ່ອນຄວາມສ່ຽງຕໍ່ການກໍ່ອາດຊະຍາກຳ.

ການພັດທະນາບັດປະຈໍາຕົວປະຊາຊົນ ແບບດີຈີຕ໋ອນ ຍັງເປັນສ່ວນໜື່ງຂອງການພັດທະນາພື້ນຖານໂຄງລ່າງ ຍຸກດິຈິຕ໋ອນ ສປປ ລາວ ນີ້ຈະຊ່ວຍໃຫ້ພົນລະເມືອງທຸກຄົນມີການເຂົ້າ ເຖິງເຕັກໂນໂລຊີເທົ່າທຽມກັນ.

ການປ່ຽນແປງນີ້ບໍ່ພຽງແຕ່ກ່ຽວກັບເຕັກໂນໂລຢີເທົ່ານັ້ນ ແຕ່ມັນເປັນການປ່ຽນແປງທີ່ຈະສ້າງໂອກາດ ແລະ ຄວາມສະເໝີພາບຂອງປະຊາຊົນລາວ ພວກເຮົາຮ່ວມກັນກ້າວໄປສູ່ອະນາຄົດດີຈີຕອນທີ່ທັນສະໄໝ ແລະ ກ້າວໜ້າຂອງ ສປປ ລາວ.

ຂໍ້ມູນ: ກົມສື່ມວນຊົນ ປກສ

ສະແດງຄຳຄິດເຫັນ