ຫຼັງຈາກການປະຊຸມພິເສດ ທີ່ ເມືອງປຸຕຣາຈາຍາ ປະເທດມາເລເຊຍ ໄທ-ກຳປູເຈຍ ຕົກລົງຢຸດຍິງທັນທີໂດຍບໍ່ມີເງື່ອນໄຂ ມີຜົນຕັ້ງແຕ່ເວລາ 24.00 ໂມງ ວັນທີ່ 28 ກໍລະກົດ 2025ທີ່ຜ່ານມາ

ຫຼ້າສຸດເຊົ້າວັນນີ້ (29 ກໍລະກົດ 2025) ກອງທັບພາກທີ່ 2 ລາຍງານວ່າ ຝ່າຍກຳປູເຈຍລະເມີດຂໍ້ຕົກລົງຢຸດຍິງ ພົບການກໍ່ກວນ ແລະ ການໃຊ້ອາວຸດໂຈມຕີເຂົ້າມາໃນຫຼາຍພື້ນທີ່ ຝ່າຍໄທຕອບໂຕ້ກັບຄືນຕາມສະຖານະການ ດ້ານການພົບປະຜູ້ນຳຫົວໜ່ວຍທະຫານໃນພື້ນທີ່ ໂຄສົກ ກອງທັບພາກ 2 ເປີດເຜີຍຍັງຄົງມີຄວາມພະຍາຍາມດຳເນີນການ

ກອງທັບບົກ ໄດ້ຮັບລາຍງານຈາກກອງທັບພາກທີ່ 2 ເຖິງສະຖານະການຕາມແນວຊາຍແດນໄທ – ກຳປູເຈຍ ໂດຍຫຼັງຈາກຝ່າຍໄທໄດ້ປະຕິບັດຕາມຂໍ້ຕົກລົງຢຸດຍິງຫຼັງເວລາ 24.00 ໂມງ ແລະ ເຝົ້າລະວັງຕິດຕາມສະຖານະການໃນແນວໜ້າຢ່າງໃກ້ຊິດ

ຫົວໜ່ວຍທະຫານໃນພື້ນທີ່ໄດ້ລາຍງານພົບການປະຕິບັດທາງທະຫານຂອງຝ່າຍກຳປູເຈຍໃນຫຼາຍເຫດການຕະຫຼອດຄືນຈົນເຖິງຊ່ວງເຊົ້າ

ໂດຍພົບການກໍ່ກວນແລະໃຊ້ອາວຸດຍິງສະໜັບສະໜູນເຂົ້າມາໃນພື້ນທີ່ຝ່າຍໄທ ໃນຫຼາຍພື້ນທີ່ ໄດ້ແກ່ ພື້ນທີ່ຊ່ອງບົກ, ພື້ນທີ່ຊ່ອງອານມ້າ, ພື້ນທີ່ຊຳແຕ, ພື້ນທີ່ປາສາດຕາຄວາຍ ແລະ ພື້ນທີ່ພູມະເຂືອ ຊຶ່ງຝ່າຍໄທໄດ້ຕອບໂຕ້ຕາມສະຖານະການ ໂດຍໃຊ້ກຳລັງໃນແນວໜ້າແລະອາວຸດຍິງສະໜັບສະໜູນ ເພື່ອຍັບຍັ້ງການປະຕິບັດດັ່ງກ່າວຂອງຝ່າຍກຳປູເຈຍ

ຈາກກໍລະນີດັ່ງກ່າວ ພົນຕີ ວິນໄທ ສຸວາຣີ ໂຄສົກກອງທັບບົກ ໄດ້ອອກຖະແຫຼງການວ່າ “ຕາມທີ່ລັດຖະບານໄທແລະລັດຖະບານກຳປູເຈຍໄດ້ບັນລຸຂໍ້ຕົກລົງຮ່ວມກັນໃນການຢຸດຕິການສູ້ລົບທາງທະຫານບໍລິເວນແນວຊາຍແດນ ໂດຍມີຜົນບັງຄັບໃຊ້ຕັ້ງແຕ່ເວລາ 24.00 ໂມງ ຂອງວັນທີ່ 28 ກໍລະກົດ 2025 ເພື່ອເປີດໂອກາດໃຫ້ເກີດບັນຍາກາດແຫ່ງຄວາມສະຫງົບ ຫຼຸດຄວາມຕຶງຄຽດ ແລະ ສົ່ງເສີມຄວາມຮ່ວມມືລະຫວ່າງປະເທດເພື່ອນບ້ານ

ກອງທັບບົກຂໍຮຽນວ່າ ຝ່າຍໄທໄດ້ປະຕິບັດຕາມຂໍ້ຕົກລົງດັ່ງກ່າວຢ່າງເຄັ່ງຄັດ ໂດຍໄດ້ທຳການຢຸດຍິງ ບໍລິເວນພື້ນທີ່ແນວຊາຍແດນ ໄທ-ກຳປູເຈຍ ທັນທີທີ່ເຖິງກຳນົດເວລາ ດ້ວຍຄວາມຕັ້ງໃຈຈິງ ແລະ ຍຶດໝັ້ນຕໍ່ພັນທະທີ່ໄດ້ຕົກລົງຮ່ວມກັນຂອງລັດຖະບານທັງສອງປະເທດ

ແຕ່ເປັນທີ່ໜ້າເສຍດາຍຢ່າງຍິ່ງເມື່ອເຖິງ ກຳນົດເວລາດັ່ງກ່າວ ຝ່າຍໄທຍັງຄົງກວດພົບວ່າຝ່າຍກຳປູເຈຍໄດ້ມີການໃຊ້ອາວຸດໂຈມຕີເຂົ້າມາໃນເຂດແດນຂອງປະເທດໄທຢູ່ຫຼາຍຈຸດ ຊຶ່ງຖືເປັນການລະເມີດຂໍ້ຕົກລົງຢ່າງຈົງໃຈ ເຈດຕະນາທຳລາຍລະບົບຄວາມໄວ້ເນື້ອເຊື່ອໃຈລະຫວ່າງກັນ ກອງທັບບົກຈຶ່ງຂໍປະນາມຕໍ່ການກະທຳດັ່ງກ່າວ

ຝ່າຍໄທຈຳເປັນຈະຕ້ອງໃຊ້ມາດຕະການໂຕ້ກັບຢ່າງເໝາະສົມ ພາຍໃຕ້ສິດທິອັນຊອບທຳໃນການປ້ອງກັນຕົນເອງ ຢືນຢັນຝ່າຍໄທບໍ່ໄດ້ໃຊ້ກຳລັງທະຫານເພື່ອລຸກລານ ແຕ່ເພື່ອປ້ອງກັນການລຸກລ້ຳແລະຮັກສາອະທິປະໄຕຂອງຊາດ ພາຍໃຕ້ກົດກະຕິກາສາກົນ”

ນອກຈາກນີ້ໂຄສົກກອງທັບບົກ ຍັງໄດ້ເປີດເຜີຍເຖິງກຳໜົດການພົບປະຜູ້ນຳຫົວໜ່ວຍທະຫານໃນພື້ນທີ່ຂອງທັງສອງຝ່າຍທີ່ມີແຜນພົບກັນໃນຊ່ວງເຊົ້າຂອງມື້ນີ້ວ່າ “ຍັງຄົງມີຄວາມພະຍາຍາມໃນການເດີນໜ້າພົບປະໂອ້ລົມກັນຂອງຜູ້ນຳທາງທະຫານທັງສອງປະເທດ ໂດຍໃນຂະນະນີ້ຮູ້ວ່າມີການປັບເວລາເປັນ 10.00 ໂມງ ສ່ວນລາຍລະອຽດອື່ນໆ ຈະໄດ້ມີການເປີດເຜີຍໃຫ້ຊາບອີກຄັ້ງ”

ລາຍງານຂ່າວຈາກກອງທັບພາກທີ່ 2 ພື້ນທີ່ປາສາດຕາຄວາຍ ອຳເພີພະນົມດົງຣັກ ຈັງຫວັດສີສະເກດ ມີສຽງລະເບີດ ໃນຊ່ວງເວລາ 03.00 ໂມງເຊົ້າ ແລະ 05.00 ໂມງເຊົ້າ

ພື້ນທີ່ ພູມະເຂືອ ຈັງຫວັດສີສະເກດ ທະຫານກຳປູເຈຍກໍ່ກວນທະຫານໄທໝົດຄືນ ມີການຍິງຕອບໂຕ້ລະຫວ່າງທະຫານໄທກັບທະຫານກຳປູເຈຍຕໍ່ເນື່ອງ ພື້ນທີ່ຊຳແຕ ມີການຍິງຕອບໂຕ້ກັນຈົນເຖິງເວລາ 05.30 ໂມງເຊົ້າ ນອກຈາກນີ້ທະຫານກຳປູເຈຍໃຊ້ລະເບີດເປີດສາກຍິງຕະຫຼອດທັງຄືນ

ຢ່າງໃດກໍຕາມ ຫຼ້າສຸດເວລາ 08.40 ໂມງ “ວາສະນາ ນານ່ວມ” ຜູ້ສື່ຂ່າວອາວຸໂສສາຍທະຫານ ມີລາຍງານວ່າ ກຳປູເຈຍລະເມີດຂໍ້ຕົກລົງຢຸດຍິງ ເປີດເຜີຍທະຫານກຳປູເຈຍຍິງປືນໃຫຍ່ໃສ່ທະຫານໄທ ເນີນໂນເນມ ພື້ນທີ່ຊ່ອງບົກ ຈັງຫວັດອຸບົນລາຊະທານີ

ສະແດງຄຳຄິດເຫັນ