ຜູ້ປົກຄອງໃນຈີນຈະໄດ້ຮັບເງິນອຸດໜູນ 3,600 ຫຍວນ ຕໍ່ປີສຳລັບລູກແຕ່ລະຄົນທີ່ມີອາຍຸຕ່ຳກວ່າ 3 ປີ ຊຶ່ງຖືເປັນເງິນອຸດໜູນຄັ້ງທຳອິດຂອງລັດຖະບານຈີນ ທີ່ຫວັງກະຕຸ້ນອັດຕາການເກີດ

ລັດຖະບານຈີນໄດ້ປະກາດມາດຕະການອຸດໜູນທາງການເງິນແກ່ຜູ້ປົກຄອງເປັນຄັ້ງທຳອິດທົ່ວປະເທດ ເພື່ອເປົ້າໝາຍໃນການກະຕຸ້ນອັດຕາການເກີດທີ່ຫຼຸດລົງ ຜູ້ປົກຄອງຈະໄດ້ຮັບເງິນສະໜັບສະໜູນ 3,600 ຫຍວນຕໍ່ປີ ສຳລັບລູກແຕ່ລະຄົນທີ່ອາຍຸຕ່ຳກວ່າ 3 ປີ ມາດຕະການນີ້ເກີດຂຶ້ນເຖິງວ່າພັກຄອມມິວນິສຈີນຈະຍົກເລີກນະໂຍບາຍລູກຄົນດຽວ ມາເກືອບ 10 ປີແລ້ວ ແຕ່ຈຳນວນປະຊາກອນເກີດໃໝ່ຂອງປະເທດກໍຍັງຄົງຫຼຸດລົງຢ່າງຕໍ່ເນື່ອງ

ສື່ຂອງລັດຖະບານຈີນລະບຸວ່າ ເງິນຊ່ວຍເຫຼືອນີ້ຈະຊ່ວຍບັນເທົາພາລະຄ່າໃຊ້ຈ່າຍໃນການລ້ຽງດູລູກແກ່ຄອບຄົວປະມານ 20 ລ້ານຄົວເຮືອນ ໂຄງການນີ້ຊຶ່ງປະກາດເມື່ອ ວັນທີ່ 28 ກໍລະກົດ 2025 ທີ່ຜ່ານມາ

ຈະມອບເງິນລວມສູງສຸດ 10,800 ຫຍວນ ຕໍ່ລູກໜຶ່ງຄົນ ແລະ ຈະມີການຍ້ອນຫລັງການບັງຄັບໃຊ້ໄປຕັ້ງແຕ່ຕົ້ນປີນີ້ ຕາມການລາຍງານຂອງສະຖານີໂທລະທັດຊີຊີທີວີ ຄອບຄົວທີ່ມີລູກທີ່ເກີດລະຫວ່າງປີ 2022 ເຖິງ 2024 ກໍສາມາດຍື່ນຂໍຮັບເງິນອຸດໜູນບາງສ່ວນໄດ້ເຊັ່ນກັນ

ກ່ອນໜ້ານີ້ ຫຼາຍແຂວງທົ່ວປະເທດຈີນໄດ້ລອງການຈ່າຍເງິນເພື່ອສົ່ງເສີມໃຫ້ປະຊາຊົນມີລູກຫຼາຍຂຶ້ນ ເນື່ອງຈາກຈີນກຳລັງປະເຊີນກັບວິກິດການດ້ານປະຊາກອນສາດທີ່ກຳລັງຈະມາເຖິງ ເຊັ່ນໃນເດືອນມີນາທີ່ຜ່ານມາ ເມືອງຮູຮອດ ທາງຕອນເໜືອຂອງຈີນ ເລີ່ມສະເໜີເງິນສູງສຸດ 100,000 ຫຍວນຕໍ່ທາລົກໜຶ່ງຄົນ

ສຳລັບຄູ່ຮັກທີ່ມີລູກຢ່າງໜ້ອຍ 3 ຄົນ ສ່ວນເມືອງເສີ່ນຫຍາງ ທາງຕາເວັນອອກສຽງເໜືອຂອງປັກກິ່ງ ສະເໜີເງິນ 500 ຫຍວນຕໍ່ເດືອນ ໃຫ້ກັບຄອບຄົວໃນທ້ອງຖິ່ນທີ່ມີລູກຄົນທີ່ສາມທີ່ອາຍຸຕ່ຳກວ່າ 3 ປີ ນອກຈາກນີ້ ເມື່ອອາທິດທີ່ຜ່ານມາ ກຸງປັກກິ່ງຍັງໄດ້ກະຕຸ້ນໃຫ້ລັດຖະບານທ້ອງຖິ່ນຮ່າງແຜນການດຳເນີນງານສຳລັບການສຶກສາປະຖົມໄວຟຣີອີກດ້ວຍ

ຈາກຜົນການສຶກສາຂອງ YuWa Population Research Institute ຊຶ່ງຕັ້ງຢູ່ໃນຈີນ ລະບຸວ່າປະເທດຈີນເປັນໜຶ່ງໃນປະເທດທີ່ມີຄ່າໃຊ້ຈ່າຍໃນການລ້ຽງລູກສູງທີ່ສຸດໃນໂລກເມື່ອທຽບກັບລາຍໄດ້ ໂດຍສະເລ່ຍແລ້ວ ການລ້ຽງລູກໜຶ່ງຄົນຈົນເຖິງອາຍຸ 17 ປີໃນຈີນມີຄ່າໃຊ້ຈ່າຍປະມານ 75,700 ດອນລາສະຫະລັດ

ໃນເດືອນມັງກອນທີ່ຜ່ານມາ ຕົວເລກທາງການສະແດງໃຫ້ເຫັນວ່າຈຳນວນປະຊາກອນຂອງຈີນຫຼຸດລົງເປັນປີທີ່ສາມຕິດຕໍ່ກັນໃນປີ 2024 ຕາມຂໍ້ມູນຈາກສຳນັກງານສະຖິຕິແຫ່ງຊາດ

ຈີນມີທາລົກເກີດໃໝ່ 9.54 ລ້ານຄົນໃນປີ 2024 ຊຶ່ງເພີ່ມຂຶ້ນເລັກນ້ອຍຈາກປີກ່ອນໜ້າ ແຕ່ຈຳນວນປະຊາກອນໂດຍລວມຂອງປະເທດຍັງຄົງຫຼຸດລົງ ນອກຈາກນີ້ ປະຊາກອນ 1.4 ພັນລ້ານຄົນຂອງປະເທດກໍກຳລັງເຂົ້າສູ່ສັງຄົມສູງອາຍຸຢ່າງໄວຊຶ່ງຍິ່ງເພີ່ມຄວາມກັງວົນດ້ານປະຊາກອນສາດໃຫ້ແກ່ລັດຖະບານປັກກິ່ງ.

ສະແດງຄຳຄິດເຫັນ