ປະທານາທິບໍດີສີ ຈິ້ນຜິງຂອງຈີນເປີດເຜີຍວ່າ ປະເທດກຳລັງປະເຊີນໜ້າ “ຄວາມສູນເສຍຢ່າງໜັກ” ຈາກອຸທົກໄພທີ່ເກີດຂຶ້ນຢ່າງທັນທີທັນໃດໃນນະຄອນຫຼວງປັກກິ່ງ ແລະອີກ 3 ແຂວງ ໄດ້ແກ່: ເຫີ່ເປ້ຍ, ຈີ່ຫຼິນ ແລະ ຊານຕົງ ພ້ອມສັ່ງການໃຫ້ເຈົ້າໜ້າທີ່ທຸກລະດັບເລັ່ງປະຕິບັດພາລະກິດຄົ້ນຫາ ແລະ ຊ່ວຍເຫຼືອປະຊາຊົນຢ່າງເຕັມກຳລັງ

ສະຖານີໂທລະທັດຊີຊີທີວີຂອງຈີນລາຍງານວ່າ ຍອດຜູ້ເສຍຊີວິດຈາກເຫດອຸທົກໄພໃນນະຄອນຫຼວງປັກກິ່ງເພີ່ມຂຶ້ນເປັນຢ່າງໜ້ອຍ 30 ຄົນ ແລ້ວ ແລະ ມີປະຊາຊົນອົບພະຍົບອອກຈາກພື້ນທີ່ແລ້ວກວ່າ 80,000 ຄົນ

ຫຼັງປະເຊີນໜ້າຝົນຕົກໜັກສະສົມຕໍ່ເນື່ອງໃນຊ່ວງນີ້  ໂດຍໃນວັນຈັນ (28 ກໍລະກົດ) ພຽງມື້ດຽວ ປັກກິ່ງມີປະລິມານຝົນສູງສຸດເຖິງ 543.4 ມິນລິແມັດ ຊຶ່ງເກືອບເທົ່າກັບຄ່າສະເລ່ຍປະລິມານຝົນທັງປີຂອງນະຄອນຫຼວງຈີນທີ່ຢູ່ທີ່ປະມານ 600 ມິນລິແມັດ

ນະຄອນຫຼວງປັກກິ່ງໄດ້ປະກາດເຕືອນໄພຝົນຕົກໜັກ ແລະ ນ້ຳຖ້ວມລະດັບສູງສຸດ ເມື່ອວັນທີ່ 28 ກໍລະກົດ ທີ່ຜ່ານມາ ໂດຍຝົນເລີ່ມຕົກຕັ້ງແຕ່ວັນພຸດທີ່ແລ້ວ (23 ກໍລະກົດ) ແລະ ຮຸນແຮງຫຼາຍຂຶ້ນໃນຊ່ວງທ້າຍອາທິດ ສົ່ງຜົນໃຫ້ເກີດນ້ຳຖ້ວມທັນທີທັນໃດ ດິນເຈື່ອນ ແລະ ຄວາມເສຍຫາຍຕໍ່ໂຄງສ້າງພື້ນຖານຈຳນວນຫຼາຍ

ໜຶ່ງໃນເຫດການທີ່ເປັນຕາຍ້ານທີ່ສຸດເກີດຂຶ້ນທີ່ ເມືອງມີ່ຫຍວິນ (Miyun) ຊານນະຄອນຫຼວງປັກກິ່ງ ເມື່ອເກີດດິນເຈື່ອນໂຖມໃສ່ບ້ານ 2 ຊັ້ນຈົນເກີດຮູໃຫຍ່ເທິງຊັ້ນ 2 ດິນປະລິມານກວ່າ 3 ແມັດກ້ອນ ພຸ່ງເຂົ້າບ້ານ ຈົນຝັງຕຽງໃນຫ້ອງນອນໄວ້ໃຕ້ກອງໂຄນຕົມ ແລະ ຫີນຈຳນວນຫຼາຍ ໂຊກດີບໍ່ມີລາຍງານຜູ້ເສຍຊີວິດຈາກເຫດການນີ້ ແຕ່ກໍສະທ້ອນຄວາມຮຸນແຮງຂອງໄພພິບັດຄັ້ງນີ້ໄດ້ຢ່າງຊັດເຈນ

ທາງການມີ່ຫຍວິນເປີດເຜີຍວ່າ ໄດ້ອົບພະຍົບປະຊາຊົນຫຼາຍກວ່າ 4,400 ຄົນອອກຈາກໝູ່ບ້ານຕ່າງໆ ທີ່ໄດ້ຮັບຜົນກະທົບຈາກນ້ຳຖ້ວມ ແລະ ດິນເຈື່ອນແລ້ວ ໂດຍແມ່ນ້ຳເຈົ້າ (Chao River) ທີ່ໄຫຼຜ່ານພື້ນທີ່ໄດ້ລົ້ນຝັ່ງເຂົ້າຖ້ວມຖະໜົນຫົນທາງ ແລະ ພື້ນທີ່ການກະເສດ ເຮັດໃຫ້ພືດພັນ ໂດຍສະເພາະໄຮ່ຂ້າວໂພດ ເສຍຫາຍເປັນວົງກວ້າງ

ສູນກາງອຸຕຸນິຍົມວິທະຍາກາງຂອງຈີນ ເຕືອນເພີ່ມເຕີມວ່າ ພາກເໜືອຂອງຈີນຈະຍັງປະເຊີນໜ້າຝົນຕົກໜັກຕໍ່ເນື່ອງອີກຢ່າງໜ້ອຍ 3 ວັນ ເຮັດໃຫ້ຄວາມສ່ຽງຂອງນ້ຳຖ້ວມ ແລະ ດິນເຈື່ອນຍັງຄົງຢູ່ໃນລະດັບສູງ

ນັກວິທະຍາສາດດ້ານພະຍາກອນອາກາດເຕືອນວ່າ ສິ່ງທີ່ເກີດຂຶ້ນໃນຊ່ວງສອງສາມປີຫຼັງ ເຊັ່ນການທີ່ພື້ນທີ່ແຫ້ງແລ້ງຢ່າງພາກເໜືອຂອງຈີນມີຝົນຕົກໜັກ ແລະ ຖີ່ຂຶ້ນ ສະທ້ອນເຖິງຜົນກະທົບຂອງພາວະໂລກຮ້ອນຢ່າງຊັດເຈນ ເມື່ອອຸນນະພູມສະເລ່ຍຂອງໂລກສູງຂຶ້ນ ວັດຈັກນ້ຳກໍປ່ຽນແປງໄປ ເຮັດໃຫ້ບາງພື້ນທີ່ເຈົ້າກັບຝົນຕົກໜັກຜິດປົກກະຕິ ຂະນະທີ່ພື້ນທີ່ອື່ນອາດເຜົ້າປະເຊີນໜ້າກັບໄພແລ້ງຮຸນແຮງ

ອຸທົກໄພໃນຈີນຄັ້ງນີ້ ຈຶ່ງເປັນຫຼາຍກວ່າໄພທຳມະຊາດ  ແຕ່ເປັນຄຳເຕືອນທີ່ດັງຂຶ້ນເລື້ອຍໆ ວ່າເຮົາກຳລັງເຂົ້າສູ່ຍຸກທີ່ການປີ່ຽນແປງສະພາບພູມິອາກາດສົ່ງຜົນກະທົບແບບກະທັນຫັນ ແລະ ບໍ່ມີສະຖານທີ່ໃດໃນໂລກທີ່ປອດໄພຈາກໄພທຳມະຊາດຕໍ່ໄປ

ສະແດງຄຳຄິດເຫັນ