ສປປ ລາວ ເປັນເຈົ້າພາບ ກອງປະຊຸມກວດກາແຮງງານອາຊຽນ ຄັ້ງທີ 13 (The 13th ASEAN Labour Inspection Conference)

ພາຍໃຕ້ຫົວຂໍ້ “ສ້າງຄວາມເຂັ້ມແຂງໃຫ້ວຽກງານຄວາມປອດໄພ ແລະ ສຸຂະພາບແຮງງານ ແລະ ການກວດກາແຮງງານໃນຂະແໜງກະສິກຳ”

ໃນລະຫວ່າງວັນທີ 29-30 ກໍລະກົດ 2025 ກະຊວງແຮງງານ ແລະ ສະຫວັດດີການສັງຄົມ ຂອງ ສປປ ລາວ ໃນຖານະປະທານຄະນະກໍາມະການກວດກາແຮງງານອາຊຽນ ໄດ້ຈັດກອງປະຊຸມກວດກາແຮງງານອາຊຽນ ຄັ້ງທີ 13 (The 13th ASEAN Labour Inspection Conference ) ໂດຍຜ່ານລະບົບວິດີໂອຄອນເຟີເຣນສ໌.

ໂດຍການເຂົ້າຮວ່ມກ່າວເປີດ ຂອງ ທ່ານ ບຸນຍອດ ຈັນທະວອນ ຫົວໜ້າຫ້ອງການກະຊວງ ຮສສ.

ກອງປະຊຸມດັ່ງກ່າວ, ເປັນປະທານຂອງ ທ່ານ ອຸດອນ ມະນີບຸນ ຮອງຫົວໜ້າກົມຄຸ້ມຄອງແຮງງານ, ກະຊວງແຮງງານ ແລະ ສະຫວັດດີການສັງຄົມ ແລະ ມີແຂກຜູ້ແທນຈາກປະເທດສະມາຊິກອາຊຽນ, ສໍານັກງານກອງເລຂາອາຊຽນ, ປະເທດຄູ່ຮ່ວມງານອາຊຽນ ( ສປ ຈີນ, ສ.ເກົາຫຼີ, ແລະ ຍີປຸ່ນ ), ອົງການຜູ້ຕາງໜ້າຜູ້ອອກແຮງງານ ແລະ ຜູ້ໃຊ້ແຮງງານອາຊຽນ, ອົງການແຮງງານສາກົນ ແລະ ອົງການສາກົນເພື່ອການເຄື່ອນຍ້າຍແຮງງານເຂົ້າຮ່ວມ.

ກອງປະຊຸມຄັ້ງນີ້ມີຈຸດປະສົງ ເພື່ອຍົກສູງຄວາມສໍາຄັນໃນການປົກປ້ອງສິດຜົນປະໂຫຍດຂອງຜູ້ອອກແຮງງານ ໂດຍສະເພາະຜູ້ອອກແຮງງານໃນຂະແໜງກະສິກຳທີ່ຕິດພັນກັບຕ່ອງໂສ້ການຜະລິດເພື່ອສົ່ງອອກ ແລະ ຍົກລະດັບມາດຕະຖານການກວດກາແຮງງານໃນຂະແໜງກະສິກຳຂອງພາກພື້ນໃນອາຊຽນໃຫ້ມີປະສິດທິພາບ.

ພ້ອມກັນນັ້ນຍັງເປັນການປຶກສາຫາລືກ່ຽວກັບຄວາມທ້າທາຍທີ່ຜູ້ອອກແຮງງານໃນຂະແໜງກະສິກຳຕ້ອງໄດ້ພົບ, ໂດຍສະເພາະຄວາມສ່ຽງໃນການເຮັດວຽກ, ລັກສະນະການຈ້າງງານໃນຮູບແບບທີ່ບໍ່ເປັນທາງການ ຫຼື ການຈ້າງງານນອກລະບົບ, ການຖືກຈໍາກັດໃນການເຂົ້າເຖິງລະບົບປະກັນສັງຄົມ ແລະ ອື່ນໆ.

ໃນໂອກາດນີ້ ທ່ານປະທານໄດ້ເນັ້ນວ່າ ເຈົ້າໜ້າທີ່ກວດກາແຮງງານແມ່ນຜູ້ທີ່ມີບົດບາດສຳຄັນໃນການປົກປ້ອງສິດ ແລະ ຜົນປະໂຫຍດຂອງຜູ້ອອກແຮງງານ ແລະ ການສ້າງເງື່ອນໄຂການເຮັດວຽກທີ່ປອດໄພ.

ຜູ້ແທນກອງປະຊຸມໄດ້ແລກປ່ຽນປະສົບການ ແລະ ບົດຮຽນທີ່ດີໃນການວາງນະໂຍບາຍ, ແຜນຍຸດທະສາດ, ກົນໄກການຈັດຕັ້ງປະຕິບັດ ແລະ ການຕິດຕາມກວດກາ ຜູ້ອອກແຮງງານໃນຂະແໜງກະສິກຳທີ່ຕິດພັນກັບຕ່ອງໂສ້ການຜະລິດ ເພື່ອຮັບປະກັນດ້ານຄວາມປອດໄພ ແລະ ສຸຂະພາບຂອງຜູ້ອອກແຮງງານ, ພ້ອມກັນນັ້ນ ຜູ້ແທນຍັງໄດ້ແລກປ່ຽນກົນໄກໃນການເກັບກຳ ແລະ ວິເຄາະຂໍ້ມູນດ້ານຄວາມສ່ຽງ, ການໄດ້ຮັບບາດເຈັບ ຫຼື ເປັນພະຍາດທີ່ເກີດຈາກການເຮັດວຽກໃນຂະແໜງກະສິກໍາ ແລະ ແລກປ່ຽນບົດຮຽນໃນການນຳໃຊ້ເຕັກໂນໂລຊີເຂົ້າໃນວຽກງານກວດການແຮງງານ ແລະ ວຽກງານດ້ານຄວາມປອດໄພດ້ານແຮງງານໃນຂະແໜງການດັ່ງກ່າວ.

ໃນຕອນທ້າຍກອງປະຊຸມຍັງໄດ້ຜ່ານ ແລະ ຮັບຮອງເອົາບົດສະຫຼຸບສັງລວມຜົນກອງປະຊຸມ ພ້ອມຄຳແນະນຳທີ່ດີໃຫ້ແກ່ບັນດາປະເທດສະມາຊິກອາຊຽນ ສືຶບຕໍ່ຈັດຕັ້ງປະຕິບັດຕາມເງື່ອນໄຂ ແລະ ຄວາມສາມາດຂອງຕົນ.

ກອງປະຊຸມກວດກາແຮງງານອາຊຽນຄັ້ງທີ່ 14 ແມ່ນມີກໍານົດຈັດໃນທ້າຍເດືອນ ຕຸລາ 2025 ຢູ່ເມືອງເປນັ່ງ ພາຍໃຕ້ການເປັນເຈົ້າພາບຂອງປະເທດມາເລເຊຍ.

ການຈັດກອງປະຊຸມໃນຄັ້ງນີ້ແມ່ນຈະສະແດງໃຫ້ເຫັນເຖີງຄວາມເອົາໃຈໃສ່ຂອງບັນດາປະເທດສະມາຊິກອາຊຽນ ໃນການສົ່ງເສີມການຄຸ້ມຄອງສະພາບຄວາມເປັນຢູ່ຂອງຜູ້ອອກແຮງງານໃນພາກພື້ນ.

ທີ່ມາ: ຂ່າວສານຮສສ

ສະແດງຄຳຄິດເຫັນ