ວັນທີ 30 ກໍລະກົດ 2025 ນີ້ ທີ່ຫ້ອງວ່າການນະຄອນ ຫຼວງພະບາງ ທ່ານ ສະເຫວີຍ ສີລາວັນ ຮັກສາການປະທານອົງການປົກຄອງ ນະຄອນ ຫຼວງພະບາງ ໄດ້ຖະແຫລງຂ່າວຕໍ່ສື່ມວນຊົນ ກ່ຽວກັບ ການຈັດບຸນຫໍ່ເຂົ້າປະດັບດິນ ຫຼື ບຸນຊ່ວງເຮືອເດືອນເກົ້າ ທີ່ຍຶ່ງນ້ຳຄານ ນະຄອນ ຫຼວງພະບາງ.

ເຊິ່ງເປັນປາງບຸນໃຫຍ່ ຂອງຊາວຫຼວງພະບາງ ທີ່ນອນຢູ່ໃນຮີດສິບສອງຂອງລາວ ແລະ ສືບທອດກັນມາ ຫຼາຍເຊັ່ນຄົນ. ໃນແຕ່ລະປີສາມາດດຶງດູດເອົານັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ເຂົ້າ ມາທ່ຽວຊົມຫຼວງພະບາງ, ເປັນການເສີມຂະຫຍາຍຂະແໜງການ ດ້ານວັດທະນະທຳ-ຮີດຄອງປະເພນີ ທີເປັນເອກະລັກຂອງຊາວຫຼວງພະບາງ ໃຫ້ຄົງຄຸນຄ່າ, ທັງເປັນການ ກະຕຸ້ນທາງ ດ້ານເສດຖະກິດ ສ້າງລາຍຮັບໃຫ້ປະຊາຊົນພາຍໃນນະຄອນ ໃຫ້ມີຄວາມເຂັ້ມແຂງ.

ບຸນຫໍ່ເຂົ້າປະດັບດິນ ປີນີ້ ຈະໄດ້ຈັດຂື້ນໃນມື້ແຮມ 14 ຄໍ່າເດືອນ 9 ກົງກັບ ວັນເສົາ ວັນທີ 23 ສີງຫາ ໂດຍຈະຈັດຂື້ນຢ່າງຍິ່ງໃຫຍ່ ເຕັມຮູບແບບ, ເນັ້ນວັດທະນະທຳ ແລະປະເພນີອັນດີງາມຂອງຊາວຫຼວງພະບາງ,

ໃນນັ້ນ ຈະໄດ້ເປີດກວ້າງໃຫ້ ເຮືອຊ່ວງປະເພນີ, ລວມທັງສີພາຍ ຢູ່ພາຍໃນປະເທດ ແລະຕ່າງປະເທດ ເຂົ້າຮ່ວມແຂ່ງຂັນ, ຄາດຄະເນຈະມີເຮືອເຂົ້າຮ່ວມປະມານ 26 ລໍາ ແລະປັດຈຸບັນ ທາງຄະນະຮັບຜິດຊອບງານບຸນ ນະຄອນ ຫຼວງພະບາງ ກໍໄດ້ເລີ່ມກະກຽມ ອະນາໄມຮັກສາຄວາມສະອາດ, ປະດັບປະດາຕົວເມືອງ-ສະຖານທີ່ທ່ອງທ່ຽວ, ປັກທຸງຊາດ-ທຸງທິວ, ກວດກາຈັດສັນຄວາມ ເປັນລະບຽບຮຽບຮ້ອຍຕາມທ້ອງຖະໜົນ, ແຄມນ້ຳຄານ ສະຖານທີ່ຊ່ວງເຮືອ ແລະຄຸ້ມຄອງການຂາຍເຄື່ອງ ຊະຊາຍຢູ່ຕາມແຄມທາງ, ປຸກລະດົມໃຫ້ທຸກພາກສ່ວນ ປະກອບສ່ວນວຽກງານ ຮັກສາຄວາມສະຫງົບ-ປອດໄພໃນທຸກສະຖານທີ່.

ສຳລັບລາຍການເຄື່ອນໄຫວບຸນ ໄດ້ກຳນົດເອົາແຕ່ວັນທີ 14-24 ສິງຫາ 2025,

• ເລີ່ມວັນທີ 14 ສິງຫາ ແມ່ນງານຕະຫຼາດນັດ ວາງສະແດງສິນຄ້າ ຢູ່ເດີ່ນທາດຫຼວງ,
• ວັນທີ 17 ສິງຫາ ງານບຸນຊ່ວງເຮືອທີ່ຍື່ງຄານ ບ້ານຫາດຮ່ຽນ,
• ວັນທີ 21 ສິງຫາ 2025. ງານບຸນຊ່ວງເຮືອທີ່ຍື່ງດົງ ບ້ານສັງຄະໂລກ,
• ວັນທີ 22 ສິງຫາ ຕອນເຊົ້າ ແມ່ນໂລະລາດ ຫຼື ລົງຕະຫຼາດນັດແບບມວນຊົນ ຢູ່ເສັ້ນທາງໃຈກາງນະຄອນ ,
• ວັນທີ 23 ສິງຫາ ຕອນເຊົ້າ ມີການໃສ່ບາດຢູ່ບັນດາວັດ ຕາມອັດຖະຍາໄສ ເພື່ອຄວາມເປັນສິລິມຸງຄຸນ ແລະ ຈາກນັ້ນ ເວລາ 9.00ໂມງ ກໍຈະໄດ້ມີພິທີເປີດການແຂ່ງຂັນຊ່ວງເຮືອປະເພນີທີ່ຍື່ງນ້ຳຄານ ຈົນຮອດຮອບຊິງຊະນະເລີດ ແລະມອບລາງວັນເປັນອັນວ່າຈົບລາຍການບຸນ.

ໂອກາດດັ່ງກ່າວນີ້ ທ່ານ ຮັກສາການ ປະທານອົງການ ປົກຄອງເມືອງ ໄດ້ເຊີນຊວນປະຊາຊົນບັນດາເຜົ່າ, ນັກທ່ອງທ່ຽວ ທັງພາຍໃນ ແລະຕ່າງປະເທດ ເຂົ້າມາທ່ຽວຊົມຫຼວງພະບາງ ເມືອງມໍລະດົກໂລກ ສຳພັດກັບວັດທະນະທຳ-ຮີດຄອງປະເພນີອັນດີງາມ ຂອງຊາວຫຼວງພະບາງ ທີ່ສືບທອດກັນມາແຕ່ບູຮານນະການ, ທັງປະກອບສ່ວນຊຸກຍູ້ ຕໍ່ງານໃນ ຄັ້ງນີ້, ເຮັດໃຫ້ງານບຸນມີບັນຍາກາດຄຶກຄື້ນ ແລະມ່ວນຊື່ນຫຼາຍຂື້ນ.

ທີ່ມາ: LuangPrabang News

ສະແດງຄຳຄິດເຫັນ