ປະທານາທິບໍດີໂດນາລ ທຣຳ ແຫ່ງສະຫະລັດ ປະກາດເມື່ອວັນພຸດທີ່ຜ່ານມາ (ຕາມເວລາທ້ອງຖິ່ນ) ກະກຽເກັບພາສີນຳເຂົ້າສິນຄ້າຈາກອິນເດຍໃນອັດຕາ 25% ເລີ່ມຕັ້ງແຕ່ວັນທີ່ 1 ສິງຫານີ້ ພ້ອມຂູ່ວ່າຈະມີບົດລົງໂທດເພີ່ມເຕີມຕາມມາ ໂດຍຍັງບໍ່ລະບຸລາຍລະອຽດວ່າ “ໂທດ” ດັ່ງກ່າວຈະມີລັກສະນະແບບໃດ.

ທຣຳກ່າວວ່າ ເຖິງວ່າອິນເດຍຈະເປັນມິດຂອງສະຫະລັດ ແຕ່ທີ່ຜ່ານມາກັບມີອຸປະສັກທາງການຄ້າທີ່ສູງເກີນຮັບໄດ້ ທັງໃນດ້ານອັດຕາພາສີທີ່ຈັດຢູ່ໃນກຸ່ມສູງທີ່ສຸດໃນໂລກ ແລະ ກົດເກນ ທີ່ຍຸ່ງຍາກຊັບຊ້ອນເກີນຈຳເປັນ ຊຶ່ງກາຍເປັນອຸປະສັກສຳຄັນຕໍ່ການທຳທຸລະກິດລະຫວ່າງສອງປະເທດ ໂດຍເຂົາລະບຸວ່າ “ອິນເດຍມີອຸປະສັກທາງການຄ້າທີ່ເຂັ້ມງວດແລະໜ້າລຳຄານທີ່ສຸດໃນໂລກ”.

ໃນໂພສເທິງ  Truth Social ທຣຳສະແດງຄວາມບໍ່ພໍໃຈທີ່ອິນເດຍຍັງຄົງຊື້ອາວຸດ ແລະ ພະລັງງານຈາກຣັດເຊຍ ຊຶ່ງເປັນປະເດັນລະອຽດອ່ອນກາງສົງຄາມໃນຢູເຄຣນ

ໂດຍລາວລະບຸວ່າ “ອິນເດຍຍັງຄົງຊື້ອາວຸດແລະພະລັງງານຈາກຣັດເຊຍຫຼາຍ ໃນຂະນະທີ່ທຸກຄົນຕ້ອງການໃຫ້ຣັດເຊຍຢຸດການສັງຫານໃນຢູເຄຣນ ທັງໝົດນີ້ບໍ່ແມ່ນສິ່ງທີ່ດີເລີຍ!”

ທຣຳເນັ້ນຢ້ຳວ່າ ນະໂຍບາຍເກັບພາສີນຳເຂົ້າຮອບໃໝ່ຈາກອິນເດຍ ມີທັງເປົ້າໝາຍທາງເສດຖະກິດແລະການເມືອງ ໂດຍໜຶ່ງໃນແຮງຜັກດັນສຳຄັນແມ່ນການຫຼຸດຂາດດຸນການຄ້າຂອງສະຫະລັດກັບຕ່າງປະເທດ ໂດຍສະເພາະກັບອິນເດຍ ຊຶ່ງລາວລະບຸວ່າມີ “ການຂາດດຸນການຄ້າຢ່າງມະຫາສານ”.

ອັດຕາພາສີ 25% ທີ່ປະກາດໃນຄັ້ງນີ້ ເຖິງແມ່ນຈະຕ່ຳກວ່າອັດຕາ 26% ທີ່ເຄີຍປະກາດໃນວັນປົດແອກ “Liberation Day” ຂອງສະຫະລັດ ແຕ່ກໍ່ຍັງຢູ່ໃນລະດັບສູງເມື່ອທຽບກັບປະເທດອື່ນໆ ທຣຳເອງກໍ່ເຄີຍບອກວ່າຢູ່ລະຫວ່າງພິຈາລະນາເກັບໃນອັດຕາລະຫວ່າງ 20-25% ກ່ອນຈະຕັດສິນໃຈຄົງຕົວທີ່ 25%.

ໃນຂະນະທີ່ທຳນຽບຂາວຍັງບໍ່ອອກມາໃຫ້ຄວາມເຫັນໃດໆ ກ່ຽວກັບ “ບົດລົງໂທດເພີ່ມເຕີມ” ທີ່ທຣຳກ່າວເຖິງ

ກະຊວງການຄ້າ ແລະ ອຸດສາຫະກຳຂອງອິນເດຍລະບຸວ່າ ລັດຖະບານກຳລັງສຶກສາຜົນກະທົບຈາກປະກາດຂອງສະຫະລັດຢ່າງໃກ້ຊິດ ພ້ອມຢ້ຳວ່າ “ອິນເດຍແລະສະຫະລັດມີການເຈລະຈາເພື່ອເຮັດຂໍ້ຕົກລົງການຄ້າທີ່ເປັນທຳ ສົມດຸນ ແລະ ເປັນປະໂຫຍດຮ່ວມກັນມາຕະຫຼອດຫຼາຍເດືອນທີ່ຜ່ານມາ ແລະພວກເຮົາຍັງຄົງຍຶດໝັ້ນໃນເປົ້າໝາຍດັ່ງກ່າວ”.

ໃນມຸມມອງຂອງນັກເສດຖະສາດ ເຖິງແມ່ນທຣຳຈະຢືນຢັນການເກັບພາສີນີ້ເປັນມາດຕະການຫຼຸດການຂາດດຸນການຄ້າ ແຕ່ກໍ່ມີຂໍ້ກັງຂາກ່ຽວກັບຜົນທີ່ແທ້ຈິງຕໍ່ເສດຖະກິດສະຫະລັດ.

ຫຼາຍຝ່າຍເຕືອນວ່າ ການນຳເຂົ້າສິນຄ້າລາຄາຖືກຈາກປະເທດທີ່ມີຕົ້ນທຶນແຮງງານຕ່ຳ ຊ່ວຍໃຫ້ຜູ້ບໍລິໂພກຊາວອາເມລິກາສາມາດຊື້ສິນຄ້າລາຄາຖືກໄດ້ ເຊັ່ນ: ເສື້ອຜ້າ ຂອງຫຼິ້ນ ຫຼື ສານເຄມີ ຂະນະທີ່ໃນປະເທດຍັງບໍ່ມີຄວາມພ້ອມໃນພາກການຜະລິດບາງປະເພດ ໂດຍສະເພາະງານທີ່ມີທັກສະຕ່ຳຫຼືສ່ຽງອັນຕະລາຍ ຊຶ່ງແຮງງານອາເມລິກາບໍ່ພ້ອມຫຼືບໍ່ເຕັມໃຈຈະເຮັດ.

ທັງນີ້ ນີ້ບໍ່ແມ່ນຄັ້ງທຳອິດທີ່ທຣຳປະກາດໃຊ້ອຳນາດຝ່າຍບໍລິຫານໃນການເກັບພາສີໂດຍບໍ່ຜ່ານຄວາມເຫັນຊອບຈາກລັດສະພາ ໂດຍກ່ອນໜ້ານີ້ລາວເຄີຍໃຊ້ເຫດຜົນດ້ານຄວາມໝັ້ນຄົງແຫ່ງຊາດໃນການປະກາດວ່າ “ການຂາດດຸນການຄ້າເປັນໄພສຸກເສີນຕໍ່ປະເທດ” ເພື່ອເປີດທາງໃຫ້ສາມາດດຳເນີນນະໂຍບາຍພາສີຝ່າຍດຽວໄດ້.

ການປະກາດບົດລົງໂທດອິນເດຍເພີ່ມເຕີມຄັ້ງນີ້ ຍັງສອດຄ່ອງກັບທ່າທີລ່າສຸດຂອງທຣຳທີ່ຍົກລະດັບການກົດດັນປະເທດທີ່ຍັງຄົງຄ້າຂາຍກັບຣັດເຊຍ ໂດຍສະເພາະພະລັງງານ.

ເມື່ອຊ່ວງຕົ້ນເດືອນກໍລະກົດທີ່ຜ່ານມາ ລາວຂູ່ຈະເກັບພາສີເພີ່ມເຕີມ 100% ກັບປະເທດທີ່ຍັງຊື້ນ້ຳມັນແລະກ໊າຊຈາກຣັດເຊຍ ຫາກບໍ່ມີຄວາມຄືບໜ້າໃນຂໍ້ຕົກລົງຢຸດຍິງໃນຢູເຄຣນ.

ຫາກມາດຕະການເຫຼົ່ານີ້ເກີດຂຶ້ນແທ້ ປະເທດຄູ່ຄ້າສຳຄັນຂອງສະຫະລັດ ເຊັ່ນ: ຈີນ ອິນເດຍ ແລະ ບຣາຊິລ ຊຶ່ງຍັງພຶ່ງພາພະລັງງານຈາກຣັດເຊຍ ອາດໄດ້ຮັບຜົນກະທົບຢ່າງໜັກ ທັງໃນແງ່ເສດຖະກິດພາຍໃນປະເທດແລະຄວາມສຳພັນທາງການຄ້າໃນລະດັບໂລກ.

ສະແດງຄຳຄິດເຫັນ