ຕາມຄໍາເຊີນຂອງ ພະນະທ່ານ ວະລາດີເມຍ ປູຕິນ ປະທານາທິບໍດີແຫ່ງ ສະຫະພັນຣັດເຊຍ “ພະນະທ່ານ ທອງລຸນ ສີສຸລິດ, ປະທານປະເທດແຫ່ງ ສາທາລະນະລັດປະຊາທິປະໄຕປະຊາຊົນລາວ ນໍາພາຄະນະຜູ້ແທນຂັ້ນສູງຂອງ ສປປລາວ ຢ້ຽມຢາມ ສະຫະພັນຣັດເຊຍ ຢ່າງເປັນທາງການ, ວັນທີ 30 ກໍລະກົດ – 01 ສິງຫາ 2025 ເພື່ອສືບຕໍ່ຮັດແໜ້ນສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ລາວ ແລະ ຣັດເຊຍ.”

ການເລີ່ມຕົ້ນການເຈລະຈາລະຫວ່າງຣັດເຊຍ-ລາວ, ທ່ານ ປູຕິນ:

ທ່ານປະທານປະເທດທີ່ເຄົາລົບ! ໝູ່ເພື່ອນທີ່ຮັກແພງ!

ຂໍອະນຸຍາດໃຫ້ຂ້າພະເຈົ້າຕ້ອນຮັບທ່ານດ້ວຍຄວາມອົບອຸ່ນໃນການຢ້ຽມຢາມຢ່າງເປັນທາງການຕໍ່ຣັດເຊຍ, ທ່ານຮູ້ຈັກປະເທດຂອງພວກເຮົາເປັນຢ່າງດີ ແລະ ພວກເຮົາກໍ່ຮູ້ຈັກທ່ານເປັນຢ່າງດີເຊັ່ນກັນ, ຖືວ່າທ່ານເປັນເພື່ອນສະໜິດຂອງຣັດເຊຍ.

ທ່ານໄດ້ໄປຢ້ຽມຢາມຣັດເຊຍເລື້ອຍໆ ແລະ ຍິ່ງໄປກວ່ານັ້ນ, ດັ່ງທີ່ຮູ້ກັນດີ ທ່ານໄດ້ຈົບການສຶກສາຈາກສະຖາບັນການສຶກສາ Herzen Petersburg ເຊິ່ງປີກາຍນີ້, ທ່ານໄດ້ເຂົ້າຮ່ວມໃນງານເດີນຂະບວນສະເຫຼີມສະຫຼອງໄຊຊະນະ ແລະ ໃນປີນີ້ເພື່ອສະເຫຼີມສະຫຼອງຄົບຮອບ 80 ປີ ກອງທັບລາວໄດ້ເດີນຂະບວນຜ່ານຈະຕຸລັດແດງ. ພວກເຮົາຂອບໃຈທ່ານຫຼາຍໆສໍາລັບການໃຫ້ຄວາມສຳຄັນຕໍ່ເຫດການເຫຼົ່ານີ້!

ໃນປີນີ້ພວກເຮົາຈະສະເຫຼີມສະຫຼອງຄົບຮອບ 65 ປີຂອງການສ້າງຕັ້ງການພົວພັນທາງການທູດລະຫວ່າງສອງປະເທດຂອງພວກເຮົາ ແລະ ເປັນທີ່ຮູ້ກັນດີວ່າສະຫະພາບໂຊວຽດໄດ້ໃຫ້ການສະໜັບສະໜູນໃນການຕໍ່ສູ້ເພື່ອເອກະລາດຂອງປະຊາຊົນລາວ, ຊ່ວຍໃນການພັດທະນາເສດຖະກິດ, ກອງທັບ ແລະ ທັງໝົດນີ້ເປັນພື້ນຖານປະຫວັດສາດທີ່ດີຫຼາຍສໍາລັບການພັດທະນາສາຍພົວພັນໃນປັດຈຸບັນ.

ສາຍພົວພັນດ້ານການຄ້າ-ເສດຖະກິດກໍາລັງພັດທະນາຂອງພວກເຮົາມີການເຕີບໃຫຍ່ຫຼາຍກວ່າ 60%-66% ໃນປີກາຍນີ້. ແລະ ໃນປີນີ້ຕັ້ງແຕ່ເດືອນມັງກອນເຖິງພຶດສະພາ ແມ່ນເຕີບໃຫຍ່ເກືອບ 20 ເປີເຊັນ.

ໃນຣັດເຊຍ, ຊາວໜຸ່ມລາວ ທັງຊາຍ ແລະ ຍິງ, ໄດ້ຮັບທຶນການສຶກສາມາໂດຍຕະຫຼອດ ແລະ ພວກເຮົາພ້ອມທີ່ຈະສືບຕໍ່ວຽກງານນີ້ ແລະ ເພີ່ມໂຄຕາ.

ພວກເຮົາຮ່ວມມືກັນໃນເວທີສາກົນ, ການຮ່ວມມືແມ່ນດໍາເນີນໄປໃນກອບຂອງອົງການສະຫະປະຊາຊາດ, ໃນກອບປະຕິບັດຂອງ SCO ແລະ ພວກເຮົາຮູ້ເຖິງຄວາມສົນໃຈຂອງທ່ານໃນການປະຕິບັດວຽກງານຮ່ວມກັບ BRICS.

ທ່ານມີໂຄງການທີ່ໃຫຍ່ຫຼາຍ ແລະ ຫຍຸ້ງຍາກ, ຂ້າພະເຈົ້າຮູ້ໄດ້ວ່າມີການພົບປະຫຼາຍຄັ້ງແລ້ວ, ຂ້າພະເຈົ້າຫວັງວ່າ ໃນເດືອນກັນຍາ ນາຍົກລັດຖະມົນຕີຂອງທ່ານ ຈະມາເດີນມາວະລາດີວອສຕັອກ ເພື່ອຢ້ຽມຢາມ ແລະ ເຂົ້າຮ່ວມໃນການປະຊຸມສດຖະກິດຕາເວັນອອກ.

ທ່ານປະທານປະເທດທີ່ເຄົາລົບ, ພວກເຮົາດີໃຈຫຼາຍທີ່ໄດ້ພົບທ່ານ. ຍິນດີຕ້ອນຮັບສູ່ຣັດເຊຍ!

ການເລີ່ມຕົ້ນການເຈລະຈາລະຫວ່າງລາວ-ຣັດເຊຍ, ທ່ານ ທອງລຸນ ສີສຸລິດ:

ຂ້າພະເຈົ້າຮູ້ສຶກເປັນກຽດຢ່າງຍິ່ງ ທີ່ໄດ້ມີໂອກາດຢ້ຽມຢາມຣັດເຊຍຢ່າງເປັນທາງການ ຕາມຄຳເຊີນຂອງທ່ານປະທານາທິບໍດີ ວະລາດິເມຍ ປູຕິນ. ຂ້າພະເຈົ້າຂໍສະແດງຄວາມຂອບໃຈຈາກໃຈຈິງ ສໍາລັບການຕ້ອນຮັບທີ່ອົບອຸ່ນ, ສົມກຽດ ແລະ ດ້ວຍມິດຕະພາບທີ່ດີແກ່ຂ້າພະເຈົ້າ ແລະ ຄະນະຂອງຂ້າພະເຈົ້າ.

ປີ 2025 ເປັນປີທີ່ສໍາຄັນຫຼາຍສໍາລັບຣັດເຊຍ, ເນື່ອງໃນໂອກາດສະເຫຼີມສະຫຼອງຄົບຮອບ 80 ປີຂອງໄຊຊະນະໃນມະຫາສົງຄາມແຫ່ງຄວາມຮັກຊາດ ແລະ ເປັນທີ່ໜ້າເສຍດາຍຢ່າງຍິ່ງທີ່ຂ້າພະເຈົ້າບໍ່ມີໂອກາດເຂົ້າຮ່ວມໃນພິທີສະເຫຼີມສະຫຼອງຄົບຮອບ 80 ປີຂອງໄຊຊະນະ ເນື່ອງຈາກການຕິດເຊື້ອໂຄວິດ.

ຂ້າພະເຈົ້າມີຄວາມຕັ້ງໃຈຈະເດີນທາງມາຣັດເຊຍເພື່ອສະເຫຼີມສະຫຼອງວັນໄຊຊະນະ, ແຕ່ຫຼັງຈາກການກວດໂຄວິດ ຂ້າພະເຈົ້າມີຜົນບວກ. ດັ່ງນັ້ນຂ້າພະເຈົ້າໄດ້ມອບໝາຍໃຫ້ລັດຖະມົນຕີການຕ່າງປະເທດເຂົ້າຮ່ວມ. ຂ້າພະເຈົ້າມີໂອກາດເຂົ້າຮ່ວມເລື້ອຍໆ ແລະ ຂ້າພະເຈົ້າໄດ້ເບິ່ງການຖ່າຍທອດສົດຂອງການເດີນຂະບວນຢູ່ຈະຕຸລັດແດງ.

ການຢ້ຽມຢາມຄັ້ງນີ້ຂອງຂ້າພະເຈົ້າເປັນສິ່ງຢັ້ງຢືນທີ່ສຳຄັນວ່າພວກເຮົາກໍາລັງສະເຫຼີມສະຫຼອງຄົບຮອບ 65 ປີຂອງການສ້າງຕັ້ງການພົວພັນທາງການທູດລະຫວ່າງສອງປະເທດຂອງພວກເຮົາ.

ຮູ້ສຶກດີໃຈຫຼາຍ ທີ່ຂ້າພະເຈົ້າມີໂອກາດພົບກັບທ່ານຫຼາຍຄັ້ງ ລວມທັງຢູ່ Kazan, ດັ່ງນັ້ນໃນການຢ້ຽມຢາມຄັ້ງນີ້ພວກເຮົາມີໂອກາດສືບຕໍ່ການສົນທະນາກ່ຽວກັບຂໍ້ຕົກລົງທີ່ບັນລຸໄດ້ແລ້ວ, ດັ່ງນັ້ນພວກເຮົາສືບຕໍ່ເຮັດວຽກຕໍ່ໄປ.

ໃນໂອກາດນີ້ – ຄົບຮອບ 65 ປີຂອງການສ້າງຕັ້ງສາຍພົວພັນທາງການທູດລະຫວ່າງສອງປະເທດຂອງພວກເຮົາ – ລັດຖະບານລາວ ແລະ ປະຊາຊົນລາວຢາກມອບຊ້າງຄູ່ໜຶ່ງ ໃຫ້ທ່ານ ກໍ່ຄືຣັດເຊຍ.

ຊ້າງເຫຼົ່ານີ້, ຈະອາໄສຢູ່ໃນສວນສັດຢູ່ເຊນປີເຕີເບີກ. ຂ້າພະເຈົ້າເຄີຍຮຽນຢູ່ທີ່ນັ້ນ ແຕ່ຕອນນີ້ບໍ່ມີຊ້າງ, ຖ້າທ່ານເຫັນດີ ພວກເຮົາສືບຕໍ່ຫົວຂໍ້ນີ້ ວ່າຈະຂົນສົ່ງຊ້າງມາທີ່ນີ້ແນວໃດ.

ຊ້າງເປັນສັນຍາລັກຂອງປະເທດພວກເຮົາມາແຕ່ບູຮານ, “ອານາຈັກລາວລ້ານຊ້າງ” ສັນຍາລັກຂອງສັນຕິພາບ ແລະ ຄວາມຈະເລີນຮຸ່ງເຮືອງ.

ທີ່ມາ: ສຸຣິອຸດົງ

ສະແດງຄຳຄິດເຫັນ