ສະຫະລັດອາເມລິກາກຽມໃຊ້ມາດຕະການໃໝ່ ໃຫ້ນັກທ່ອງທ່ຽວ ແລະ ນັກທຸລະກິດຈາກບາງປະເທດວາງເງິນຄ້ຳປະກັນສູງສຸດເຖິງ 15,000 ໂດລາເມື່ອຂໍວີຊາ 

ລັດຖະບານສະຫະລັດອາເມລິກາປະກາດກຽມບັງຄັບໃຊ້ມາດຕະການໃໝ່ ໃຫ້ນັກທ່ອງທ່ຽວ ແລະ ນັກທຸລະກິດຈາກບາງປະເທດຕ້ອງວາງເງິນຄ້ຳປະກັນ (Visa Bond) ສູງສຸດເຖິງ 15,000 ໂດລາສະຫະລັດ  ເມື່ອຂໍວີຊາເຂົ້າສະຫະລັດ ພາຍໃຕ້ໂຄງການນຳໜ້າ ທີ່ຈະເລີ່ມໃນວັນທີ 20 ສິງຫາ 2025 ມີໄລຍະເວລາໃຊ້ປະມານ 1 ປີ ແນໃສ່ຫຼຸດຜ່ອນບັນຫາຜູ້ເດີນທາງເກີນກຳນົດວີຊາ

ຕາມປະກາດໃນ Federal Register ເຈົ້າໜ້າທີ່ກົງສຸນສະຫະລັດ ຈະມີສິດພິຈາລະນາໃນການກຳນົດເງິນຄ້ຳປະກັນສຳລັບຜູ້ເດີນທາງຈາກປະເທດທີ່ມີອັດຕະການຢູ່ເກີນວີຊາສູງ ຫຼື ຈາກປະເທດທີ່ສະຫະລັດເຫັນວ່າມີຂໍ້ມູນການກວດສອບປະຫວັດບໍ່ພຽງພໍ ໂດຍມີຕົວເລືອກວົງເງິນຄ້ຳປະກັນຢູ່ທີ່ 5,000 ໂດລາ, 10,000 ໂດລາ ຫຼື 15,000 ໂດລາ

ແຕ່ໂດຍທົ່ວໄປຈະຄາດຫວັງໃຫ້ໃຊ້ຂັ້ນຕ່ຳ 10,000 ໂດລາ ໂດຍເງິນຄ້ຳປະກັນຈະຖືກຄືນໃຫ້ຜູ້ເດີນທາງຫາກອອກຈາກສະຫະລັດຕາມເງື່ອນໄຂຂອງວີຊາ

ນະໂຍບາຍນີ້ສອດຄ່ອງກັບແນວທາງຂອງປະທານາທິບໍດີໂດນັລ ທຣຳ ທີ່ເນັ້ນປາບປາມຄົນເຂົ້າເມືອງຜິດກົດໝາຍ ແລະ ເພີ່ມມາດຕະການກວດສອບຄວາມໝັ້ນຄົງ ກ່ອນໜ້ານີ້ ທຣຳໄດ້ອອກຄຳສັ່ງ Travel Ban ໃນເດືອນມິຖຸນາ 2025 ແບນການເດີນທາງເຕັມຮູບແບບ ຫຼື ບາງສ່ວນຕໍ່ພົນລະເມືອງ 19 ປະເທດ ດ້ວຍເຫດຜົນດ້ານຄວາມໝັ້ນຄົງແຫ່ງຊາດ

ຫຼາຍປະເທດທີ່ຢູ່ໃນລາຍຊື່ ເຊັ່ນ:  ສາທາລະນະລັດ ຊາດ, ເອຣິເທຣຍ, ເຮຕີ, ມຽນມາ ແລະ ເຢເມນ ລ້ວນມີອັດຕະການຢູ່ເກີນວີຊາສູງ ລວມທັງປະເທດໃນອາຟຣິກາຫຼາຍແຫ່ງ ເຊັ່ນ: ບູຣຸນດີ, ຈິບູຕີ ແລະ ໂຕໂກ ຕາມຂໍ້ມູນຈາກກກົມພາສີອາກອນແລະ ປ້ອງກັນຊາຍແດນສະຫະລັດອາເມລິກາ ປີງົບປະມານ 2023

ສະມາຄົມການທ່ອງທ່ຽວສະຫະລັດ ປະເມີນວ່າມາດຕະການນີ້ຈະກະທົບຜູ້ຂໍວີຊາປະມານ 2,000 ຄົນຕໍ່ປີ ຈາກບໍ່ຫຼາຍປະເທດທີ່ມີປະລິມານນັກທ່ອງທ່ຽວໄປສະຫະລັດຄ່ອນຂ້າງຕ່ຳຢູ່ແລ້ວ ແຕ່ຍັງເຕືອນວ່າມາດຕະການດັ່ງກ່າວອາດຍິ່ງເຮັດໃຫ້ການເດີນທາງເຂົ້າສະຫະລັດຫຼຸດລົງ

ຈາກສະຖິຕິພົບວ່າຕັ້ງແຕ່ມີນະໂຍບາຍເຂັ້ມງວດດ້ານຄົນເຂົ້າເມືອງ ການເດີນທາງຈາກແຄນາດາ ແລະ ເມັກຊິໂກເຂົ້າສະຫະລັດ ຫຼຸດລົງ 20% ເມື່ອທຽບປີຕໍ່ປີ ແລະ ຄ່າໂດຍສານເຄື່ອງບິນຂ້າມມະຫາສະໝຸດແອັດແລນຕິກຫຼຸດລົງສູ່ລະດັບຕ່ຳສຸດຕັ້ງແຕ່ກ່ອນໂຄວິດ-19

ນອກຈາກນີ້ ກົດໝາຍງົບປະມານທີ່ສະພາຄອງເກຣດສະຫະລັດຜ່ານເມື່ອເດືອນກໍລະກົດ ຍັງເພີ່ມຄ່າທຳນຽມ “Visa Integrity Fee” ມູນຄ່າ 250 ໂດລາສະຫະລັດ ສຳລັບຜູ້ໄດ້ຮັບອະນຸມັດວີຊາຊົ່ວຄາວທຸກຄົນ ເລີ່ມມີຜົນ 1 ຕຸລາ 2025 ຊຶ່ງຄ່າທຳນຽມນີ້ອາດຄືນໄດ້ຫາກຜູ້ເດີນທາງປະຕິບັດຕາມເງື່ອນໄຂວີຊາ

ສະມາຄົມການທ່ອງທ່ຽວສະຫະລັດ ລະບຸວ່າຫາກບັງຄັບໃຊ້ຈິງ ສະຫະລັດຈະເປັນໜຶ່ງໃນປະເທດທີ່ມີຄ່າທຳນຽມວີຊາສູງທີ່ສຸດໃນໂລກ ຊຶ່ງອາດເປັນປັດໄຈທີ່ເຮັດໃຫ້ການທ່ອງທ່ຽວໃຫ້ຕົກຕ່ຳລົງ

ສະແດງຄຳຄິດເຫັນ