ທ່ານ ລິຊາດ ມາລສ໌ ຮອງນາຍົກລັດຖະມົນຕີ ແລະ ລັດຖະມົນຕີກະຊວງປ້ອງກັນປະເທດຂອງອົດສະຕາລີ ເປີດເຜີຍວ່າ ອົດສະຕາລີຈະອັບເກຣດກອງທັບເຮືອຂອງຕົນເອງ

ໂດຍການສັ່ງຊື້ເຮືອຟຣິເກັດ 11 ລຳ ທີ່ຜະລິດໂດຍບໍລິສັດ ມິຊູບິຊິ ເຮັບວີ ອິນດັສຕຣີ ຂອງຍີ່ປຸ່ນ ໂດຍ ທ່ານ ລິຊາດ ມາລສ໌ ບອກວ່າ ນີ້ແມ່ນຂໍ້ຕົກລົງດ້ານຄວາມໝັ້ນຄົງທີ່ມີມູນຄ່າກວ່າ 10,000 ລ້ານໂດລາອົດສະຕາລີ, ນັບວ່າເປັນຂໍ້ຕົກລົງດ້ານຄວາມໝັ້ນຄົງທີ່ໃຫຍ່ທີ່ສຸດເທົ່າທີ່ອົດສະຕາລີເຄີຍຕົກລົງຮ່ວມກັບຍີ່ປຸ່ນ.

ອົດສະຕາລີສັ່ງຊື້ເຮືອຟຣິເກັດລຸ້ນ “ໂມກາມິ” ຊຶ່ງສາມາດເອົາຊະນະເຮືອຟຣິເກັດ “ເມໂກ ເອ-200” ຂອງເຢຍລະມັນໃນການແຂ່ງຂັນເຮັດຂໍ້ຕົກລົງໄດ້ ໂດຍມາລສ໌ ບອກວ່າ ການຕັດສິນໃຈສັ່ງຊື້ເຮືອຮົບຈາກຍີ່ປຸ່ນ ເປັນການຕັດສິນໃຈທີ່ພິຈາລະນາໂດຍເບິ່ງວ່າເຮືອລຸ້ນໃດຈະເໝາະສົມ ແລະ ເປັນປະໂຫຍດຕໍ່ອົດສະຕາລີຫຼາຍທີ່ສຸດ

ໂດຍເຮືອຟຣິເກັດລຸ້ນໂມກາມິ ຈະຖືກນຳມາໃຊ້ແທນທີ່ເຮືອລຸ້ນແອນແຊັກ ທີ່ເລີ່ມຈະໝົດອາຍຸການໃຊ້ງານ ແລະ ຄາດວ່າຈະເລີ່ມເຂົ້າມາແທນທີ່ພາຍໃນປີ 2030.

ເຮືອຟຣິເກັດລຸ້ນໂມກາມິມີຄວາມສາມາດແລ່ນໂດຍຫຼີກການກວດສອບຂອງເຣດາໄດ້ ມີຊ່ອງຍິງຂີປະນາວຸດແນວດິ່ງ 32 ຊ່ອງ

ຊຶ່ງສາມາດຍິງຂີປະນາວຸດລະຍະໄກໄດ້ ລວມເຖິງຂີປະນາວຸດໂທມາຮອວກ໌ ຊຶ່ງຈະຊ່ວຍໃຫ້ກອງທັບເຮືອຂອງອົດສະຕາລີມີຄວາມແຂງແກ່ນຂຶ້ນ ໂດຍເຮືອຟຣິເກັດ 3 ລຳທຳອິດທີ່ອົດສະຕາລີສັ່ງຊື້ຈະຜະລິດໃນຍີ່ປຸ່ນ ແລະ ທີ່ເຫຼືອຈະຜະລິດໃນອົດສະຕາລີ.

ທາງດ້ານ ທ່ານ ເກນ ນາກາທານິ ລັດຖະມົນຕີກະຊວງປ້ອງກັນປະເທດຍີ່ປຸ່ນ ຖະແຫຼງວ່າ ຍີ່ປຸ່ນຍິນດີທີ່ອົດສະຕາລີຕັດສິນໃຈລົງນາມສັນຍາຊື້ເຮືອຟຣິເກັດທີ່ຜະລິດໂດຍບໍລິສັດມິດສູບິຊິ ເຮັບວີ ອິນດິສທຣີສ໌ ຂອງຍີ່ປຸ່ນ

ຍັງບອກວ່າ ການຕັດສິນໃຈຂອງອົດສະຕາລີຄັ້ງນີ້ ແມ່ນບົດພິສູດຢ່າງຊັດເຈນເຖິງຄວາມໄວ້ວາງໃຈໃນເທັກໂນໂລຊີຂັ້ນສູງຂອງຍີ່ປຸ່ນ ແລະ ການເຮັດວຽກທີ່ເຂົ້າກັນໄດ້ລະຫວ່າງກອງກຳລັງປ້ອງກັນຕົນເອງຍີ່ປຸ່ນ ກັບກອງທັບອົດສະຕາລີ.

ສະແດງຄຳຄິດເຫັນ