ຍີ່ປຸ່ນຜັກດັນການພັດທະນາ “ແຜງໂຊລາເຊວເພີໂຣບສະໄກທ໌” (Pliable Perovskite Panels) ທີ່ມີຄວາມບາງ ແລະ ຍືດຫຍຸ່ນໄດ້ດີ ຕັ້ງເປົ້າເປັນອຸປະກອນຜະລິດພະລັງງານແສງອາທິດທີ່ຕິດຕັ້ງໄດ້ໃນຫຼາກຫຼາຍພື້ນທີ່ ເພື່ອເພີ່ມປະສິດທິພາບການຜະລິດ ຜັກດັນໄປສູ່ການບັນລຸເປົ້າຫມາຍດ້ານພະລັງງານໝຸນວຽນ

ການຜະລິດແຜງໂຊລາເຊວແບບບາງ

ແຜງໂຊລາເຊວທີ່ມີຄວາມບາງ ແລະ ຍືດຫຍຸ່ນໄດ້ເປັນພິເສດນີ້ ສ້າງຂຶ້ນໂດຍການພິມ ຫຼື ທາສີສ່ວນຜະສົມຕ່າງໆ ເຊັ່ນ: ໄອໂອດີນ ແລະ ຕະກັ່ວ ລົງເທິງໜ້າພື້ນ ເຊັ່ນ: ຟິມ ຫຼື ແຜ່ນແກ້ວ ເຮັດໃຫ້ຜະລິດຕະພັນຂັ້ນສຸດທ້າຍອາດມີຄວາມໜາພຽງໜຶ່ງມິນລີແມັດ ແລະ ມີນ້ຳໜັກພຽງໜຶ່ງໃນສິບຂອງເຊວແສງອາທິດຊິລິຄອນທົ່ວໄປ

ຂໍ້ດີຂອງໂຊລາເຊວແບບບາງ

ຂໍ້ດີຂອງແຜງໂຊລາເຊວແບບນີ້ ຄື ມີຄວາມຍືດຫຍຸ່ນສູງ ສາມາດຕິດຕັ້ງເທິງໜ້າພື້ນທີ່ບໍ່ມີຄວາມພຽງ ແລະ ໂຄ້ງງໍ່ໄດ້ ຊຶ່ງເປັນຄຸນສົມບັດສໍາຄັນສໍາລັບການນໍາໃຊ້ໃນຍີ່ປຸ່ນ ເນື່ອງຈາກພື້ນທີ່ 70% ຂອງປະເທດເປັນພູຜາ ທີ່ອາດຈະບໍ່ເໝາະກັບການຕິດຕັ້ງແຜງໂຊລາເຊວແບບແຂງ

ອຸປະສັກຂອງການພັດທະນາໂຊລາເຊວແບບບາງ

ແນວໃດກໍ່ຕາມ ການຜັກດັນການພັດທະນາແຜງໂຊລາເຊວປະເພດນີ້ ຍັງຕ້ອງພົບກັບອຸປະສັກບາງປະການ ເພາະແຜງໂຊລາເຊວເພີໂຣບສະໄກທ໌ມີສານຕະກັ່ວທີ່ເປັນພິດ ແລະ ໃນຂະນະນີ້ຍັງຜະລິດພະລັງງານໄດ້ນ້ອຍກວ່າ ແລະ ມີອາຍຸການໃຊ້ງານສັ້ນ ໂດຍໃຊ້ງານໄດ້ພຽງ 10 ປີ ໃນຂະນະທີ່ແຜງໂຊລາເຊວຊິລິຄອນແບບທີ່ໃຊ້ກັນທົ່ວໄປ ໃຊ້ງານໄດ້ນານເຖິງ 30 ປີ

ແຕ່ດ້ວຍເປົ້າຫມາຍການປ່ອຍອາຍພິດເຮືອນແກ້ວສຸດທິເປັນສູນພາຍໃນປີ 2050 ເຮັດໃຫ້ຍີ່ປຸ່ນມອງວ່າ ແຜງໂຊລາເຊວໃນລັກສະນະນີ້ເປັນໜຶ່ງໃນ “ທາງເລືອກທີ່ດີທີ່ສຸດໃນການບັນລຸເປົ້າຫມາຍການຫຼຸດຄາບອນ ແລະ ຄວາມສາມາດໃນການແຂ່ງຂັນທາງອຸດສາຫະກຳ” ຕາມຂໍ້ມູນຈາກລັດຖະມົນຕີວ່າການກະຊວງອຸດສາຫະກຳຍີ່ປຸ່ນ

ການຜັກດັນໃນປັດຈຸບັນ

ໂດຍປັດຈຸບັນລັດຖະບານກຳລັງສະເໜີມາດຕະການຈູງໃຈເພື່ອໃຫ້ຂະແໜງອຸດສາຫະກຳເຂົ້າມາມີສ່ວນຮ່ວມ ຊຶ່ງລວມເຖິງເງິນອຸດຫນຸນມູນຄ່າ 157,000 ລ້ານເຢ ໃຫ້ແກ່ບໍລິສັດ Sekisui Chemical ຜູ້ຜະລິດພລາສຕິກ ເພື່ອຈັດຕັ້ງໂຮງງານຜະລິດແຜງໂຊລາເຊວເພີໂຣບສະໄກທ໌ໃຫ້ພຽງພໍຕໍ່ການຜະລິດໄຟຟ້າ 100 ເມກາວັດໃນປີ 2027 ຄອບຄຸມການໃຊ້ໄຟຟ້າ 30,000 ຄົວເຮືອນ

ແລະ ພາຍໃນປີ 2040 ຍີ່ປຸ່ນຍັງຕັ້ງເປົ້າຕິດຕັ້ງແຜງໂຊລາເຊວໃນລັກສະນະດັ່ງກ່າວ ໃຫ້ພຽງພໍຕໍ່ການຜະລິດໄຟຟ້າ 20 ກິກາວັດ ຊຶ່ງທຽບເທົ່າກັບການເພີ່ມເຄື່ອງປະຕິກອນນີວເຄຼຍປະມານ 20 ເຄື່ອງ ຊຶ່ງຈະຊ່ວຍໃຫ້ຍີ່ປຸ່ນບັນລຸເປົ້າຫມາຍໃນການມີພະລັງງານໝຸນວຽນຄອບຄຸມຄວາມຕ້ອງການໃຊ້ໄຟຟ້າສູງສຸດ 50% ພາຍໃນປີ 2040

ສະແດງຄຳຄິດເຫັນ