ກອງພັນປ້ອງກັນເຄື່ອນທີ່ ປກສ ແຂວງອຸດົມໄຊ ຈັດວາງກໍາລັງອອກເຄື່ອນໄຫວປ້ອງກັນກອງປະຊຸມໃຫຍ່ອົງຄະນະພັກແຂວງ ຄັ້ງທີ X

ເພື່ອເຮັດໃຫ້ການກະກຽມດໍາເນີນກອງປະຊຸມໃຫ່ຍອົງຄະນະພັກແຂວງ ຄັ້ງທີ 10 ໃຫ້ສາມາດຮັບປະກັນຄວາມສະຫງົບ ແລະ ເປັນລະບຽບຮຽບຮ້ອຍດີ ໃນວັນທີ 06 ສິງຫາ 2025 ນີ້

ຄະນະພັກຄະນະບັນຊາກອງພັນປ້ອງກັນເຄື່ອນທີ່ກອງບັນຊາການ ປກສ ແຂວງອຸດົມໄຊໄດ້ກະກຽມຄວາມພ້ອມໃນທຸກດ້ານເພື່ອລົງເຄື່ອນໄຫວປະຕິບັດໜ້າທີ່ວິຊາສະເພາະໂດຍແຕ່ງຕັ້ງຄະນະຮັບຜິດຊອບນໍາພາຊີ້ນໍາ ແລະ ບັນຈຸກຳລັງລົງກວດກາລາດຕະເວນຢູ່ບັນດາຈຸດຂອບເຂດຄວາມຮັບຜິດຊອບຂອງຕົນເພື່ອແນໃສ່ປົກປັກຮັກສາຄວາມສະຫງົບ-ຄວາມເປັນລະບຽບຮຽບຮ້ອຍໃຫ້ແກ່ການດຳເນີນກອງປະຊຸມໃຫຍ່ຄັ້ງນີ້ໃຫ້ບັນລຸຕາມຈຸດປະສົງ ແລະ ລະດັບຄາດໝາຍ,

ພັທ ສົມພົງ ມວງສົມບັດ ຫົວໜ້າກອງພັນປ້ອງກັນເຄື່ອນທີ່ ປກສ ແຂວງອຸດົມໄຊໄດ້ໃຫ້ຮູ້ວ່າ:

ຄະນະພັກ-ຄະນະບັນຊາກອງພັນໄດ້ເອົາໃຈໃສ່ໃນການເຕົ້າໂຮມສຶກສາອົບຮົມການເມືອງນຳພາແນວຄິດໃຫ້ແກ່ພະນັກງານ-ນັກຮົບໃນຄວາມຮັບຜິດຊອບໃຫ້ພ້ອມກັນຍົກສູງຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໝາຍໃຫ້ມີຜົນສຳເລັດດີ,

ຄຽງຄູ່ກັນນີ້ໄດ້ແຕ່ງຕັ້ງຄະນະຮັບຜິດຊອບ ແລະ ຈັດວາງກຳລັງວິຊາສະເພາະລົງເຄື່ອນໄຫວປ້ອງກັນສະພາບຮອບດ້ານຢູ່ຈຸດຕ່າງໆຢ່າງລະອຽດໂດຍສະເພາະແມ່ນການປ້ອງກັນສະຖານທີ່ພັກເຊົາຂອງການນໍາ,ສະຖານທີ່ກອງປະຊຸມ,ການປ້ອງກັນຄຸມແຫ່ການນໍາ,ສະຖານທີ່ທ່ອງທ່ຽວ ແລະ ໄດ້ຈັດວາງຈຸປະຈຳການແກ້ໄຂສະພາບສຸກເສີນຕະຫຼອດໄລຍະ 24 ຊົ່ວໂມງຢູ່ຈຸດສຳນັກກອງພັນ,ເຮັດໜ້າທີ່ປ້ອງກັນເວນຍາມຢູ່ບັນດາສໍານັກງານ-ອົງການຂອງພັກ-ລັດ ແລະ ບັນດາພື້ນທີ່ຕ່າງໆ ເວົ້າລວມເວົ້າສະເພາະແມ່ນການປ້ອງກັນຄວາມສະຫງົບ-ຄວາມເປັນລະບຽບຮຽບຮ້ອຍໃຫ້ແກ່ການດໍາເນີນກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງໃຫ້ຮັບປະກັນຄວາມສະຫງົບປອດໄພໂດຍພື້ນຖານ.

ທີ່ມາ: ຂ່າວ ປກສ ແຂວງອຸດົມໄຊ

ສະແດງຄຳຄິດເຫັນ