ກະຊວງປ້ອງກັນປະເທດເກົາຫຼີໃຕ້ເປີດເຜີຍລາຍງານໃນວັນທີ 10 ສິງຫາ 2025 ວ່າກອງທັບຂອງເກົາຫຼີໃຕ້ໄດ້ຫຼຸດກຳລັງຄົນລົງເຖິງ 20% ໃນໄລຍະ 6 ປີທີ່ຜ່ານມາ ເຫຼືອພຽງແຕ່ 450,000 ຄົນ.

ສາເຫດຫຼັກມາຈາກຈຳນວນປະຊາກອນຊາຍໄວເກນທະຫານທີ່ຫຼຸດລົງຢ່າງໄວວາ, ຊຶ່ງອາດສົ່ງຜົນໃຫ້ເກີດບັນຫາຂາດແຄນນາຍທະຫານ ແລະ ຍາກຕໍ່ການປະຕິບັດງານໃນອະນາຄົດ ຖ້າຫາກແນວໂນ້ມນີ້ຍັງສືບຕໍ່ດຳເນີນຕໍ່ໄປ.

ລາຍງານນີ້ຖືກສົ່ງເຖິງ ຊູ ມີແອ ສະມາຊິກພັກປະຊາທິປະໄຕ ຊຶ່ງເປັນຜູ້ເຜີຍແຜ່ຕໍ່ສາທາລະນະ ໂດຍຂໍ້ມູນລະບຸວ່າ ກຳລັງຄົນກອງທັບເກົາຫຼີໃຕ້ຫຼຸດລົງຢ່າງຕໍ່ເນື່ອງຕັ້ງແຕ່ຕົ້ນທົດສະວັດ 2000 ຊຶ່ງຂະນະນັ້ນມີກຳລັງຄົນປະມານ 690,000 ຄົນ ຈົນມາຮອດຊ່ວງປາຍທົດສະວັດ 2010 ຈຳນວນຫຼຸດລົງຢ່າງໄວວາ ເຫຼືອປະມານ 563,000 ຄົນໃນປີ 2019

ສຳລັບເກົາຫຼີເໜືອ ກະຊວງປ້ອງກັນປະເທດເກົາຫຼີໃຕ້ປະເມີນເມື່ອປີ 2022 ວ່າມີກຳລັງຄົນປະຈຳການປະມານ 1.2 ລ້ານຄົນ ຂະນະທີ່ເກົາຫຼີໃຕ້ໃນຊ່ວງປີ 2019-2025 ຈຳນວນຜູ້ຊາຍອາຍຸ 20 ປີ ຊຶ່ງເປັນຊ່ວງອາຍຸທີ່ສ່ວນໃຫຍ່ເຂົ້າຮັບການເກນທະຫານຫຼັງຜ່ານການກວດຮ່າງກາຍ ຫຼຸດລົງເຖິງ 30% ເຫຼືອພຽງ 230,000 ຄົນ

ໄລຍະເວລາເຂົ້າເປັນທະຫານປັດຈຸບັນຢູ່ທີ່ 18 ເດືອນ ສັ້ນລົງຈາກເດີມທີ່ເຄີຍສູງເຖິງ 36 ເດືອນໃນປີ 1953 ຫຼັງສົງຄາມເກົາຫຼີສິ້ນສຸດດ້ວຍການລົງນາມສະງົບສຶກ

ການຫຼຸດໄລຍະເວລາເຂົ້າເປັນທະຫານນີ້ ອ້າງວ່າເກີດຈາກຄວາມສາມາດດ້ານການປ້ອງກັນປະເທດທີ່ພັດທະນາຢ່າງຕໍ່ເນື່ອງ ອັນເປັນຜົນມາຈາກພັນທະມິດທາງທະຫານກັບສະຫະລັດ ແລະ ການເຕີບໂຕຂອງອຸດສາຫະກຳອາວຸດພາຍໃນປະເທດທີ່ກາຍເປັນຜູ້ສົ່ງອອກສຳຄັນ

ປັດຈຸບັນກອງທັບເກົາຫຼີໃຕ້ຍັງຂາດກຳລັງຄົນປະມານ 50,000 ຄົນຈາກລະດັບທີ່ພຽງພໍຕໍ່ການຮັກສາຄວາມພ້ອມທາງທະຫານ ໂດຍປະມານ 21,000 ຄົນໃນຈຳນວນນີ້ຢູ່ໃນຕຳແໜ່ງນາຍທະຫານຊັ້ນກາງ

ໃນເຊິງໂຄງສ້າງປະຊາກອນ ເກົາຫຼີໃຕ້ປະເຊີນພາວະສັງຄົມສູງອາຍຸໄວທີ່ສຸດແຫ່ງໜຶ່ງຂອງໂລກ ແລະ ມີອັດຕາການເກີດຕ່ຳທີ່ສຸດໃນໂລກຢູ່ທີ່ 0.75 ໃນປີ 2024

ຊຶ່ງຫມາຍເຖິງຈຳນວນເດັກນ້ອຍເກີດໃຫມ່ ທີ່ຜູ້ຍິງຄົນໜຶ່ງຄາດວ່າຈະໃຫ້ກຳເນີດຕະຫຼອດຊ່ວງໄວຈະເລີນພັນ ປະຊາກອນເກົາຫຼີໃຕ້ຊຶ່ງເຄີຍສູງສຸດທີ່ 51.8 ລ້ານຄົນ

ໃນປີ 2020 ຄາດວ່າຈະຫຼຸດລົງເຫຼືອພຽງ 36.2 ລ້ານຄົນພາຍໃນປີ 2072 ຕາມການຄາດການຂອງລັດຖະບານ

ສະແດງຄຳຄິດເຫັນ