ຜູ້ນຳສາສະໜາພຸດ ແລະ ພະສົງໃນກໍາປູເຈຍ 2,569 ອົງ ຮ່ວມເດີນຂະບວນຢູ່ນະຄອນພະນົມເປັນ ເພື່ອຮຽກຮ້ອງສັນຕິພາບ-ໃຫ້ຢຸດຍິງຖາວອນ ແລະ ຂໍໃຫ້ໄທປ່ອຍຕົວທະຫານກໍາປູເຈຍທີ່ຖືກຄວບຄຸມຕົວທັງ 18 ນາຍ

ວັນທີ 10 ສິງຫາ 2025 ພະສົງ 2,569 ອົງ ເຊິ່ງນຳໂດຍຜູ້ນຳທາງສາສະໜາຫຼາຍອົງ ລວມທັງພະສັງຄະລາດຝ່າຍຄະນະສົງທັມມະຍຸດ ແລະ ພະສັງຄະລາດຝ່າຍຄະນະສົງມະຫານິກາຍ

ລວມຕົວເດີນຂະບວນຈາກວັດພະນົມຢູ່ນະຄອນພະນົມເປັນ ໄປຫາວິມານເອກະລາດ ຢູ່ກາງນະຄອນຫຼວງຂອງກໍາປູເຈຍ ເປັນລະຍະທາງ 3 ກິໂລແມັດ ໂດຍລະຫວ່າງການເດີນຂະບວນ ມີປະຊາຊົນກໍາປູເຈຍຢືນຕ້ອນຮັບຕາມເສັ້ນທາງ

ໃນບາງໄລຍະ ຄະນະສົງກຸ່ມນີ້ ໄດ້ອອກຖະແຫຼງການສະໜັບສະໜຸນລັດຖະບານກໍາປູເຈຍຢ່າງເຕັມທີ່ ແລະ ຮຽກຮ້ອງໃຫ້ປະເທດໄທເຄົາລົບຂໍ້ຕົກລົງຢຸດຍິງຖາວອນລະຫວ່າງສອງປະເທດ ພ້ອມທັງຂໍໃຫ້ປ່ອຍຕົວທະຫານກໍາປູເຈຍທີ່ຖືກຄວບຄຸມຕົວ 18 ນາຍ ແລະ ໄດ້ເນັ້ນເຖິງຈຸດຢືນຂອງກໍາປູເຈຍໃນການສະໜັບສະໜຸນສັນຕິພາບ ສະຖຽນລະພາບ ແລະ ຄວາມໝັ້ນຄົງ ເຊິ່ງເປັນຮາກຖານຂອງການພັດທະນາ

ຄະນະສົງຍັງໄດ້ເຄື່ອນຂະບວນໄປຫາສະຖານເອກອັກຄະລາຊະທູດສະຫະລັດອາເມລິກາ ພ້ອມທັງອ່ານຖະແຫຼງການເປັນພາສາອັງກິດ ເພື່ອສະແດງຄວາມຂອບໃຈໂດນັລ ທຣຳ ປະທານາທິບໍດີສະຫະລັດອາເມລິກາ ໃນການລິເລີ່ມຂໍ້ຕົກລົງຢຸດຍິງ

ຖະແຫຼງການຍັງລະບຸວ່າການແຊກແຊງໃນຄັ້ງນີ້ ມີສ່ວນຊ່ວຍຜ່ອນຄາຍສະຖານະການຕຶງຄຽດ ແລະ ອຳນວຍຄວາມສະດວກໃນການເຈລະຈາຢຸດຍິງ

ໂດຍຫວັງວ່າຄວາມສຳເລັດເບື້ອງຕົ້ນໃນການເຈລະຈາທີ່ມາເລເຊຍ ຈະປູທາງໄປສູ່ທາງອອກທີ່ຍືນຍົງໃນການແກ້ໄຂຂໍ້ຂັດແຍ້ງ ເຂດແດນທີ່ມີມາຢ່າງດົນນານລະຫວ່າງໄທແລະກຳປູເຈຍ

ພ້ອມທັງສະແດງຈຸດຢືນສະໜັບສະໜຸນຜູ້ນຳກຳປູເຈຍໃນການສະເໜີຊື່ຜູ້ນຳສະຫະລັດອາເມລິກາຊິງລາງວັນໂນເບວສາຂາສັນຕິພາບດ້ວຍ ໃນຖານະທີ່ມີບົດບາດສົ່ງເສີມສັນຕິພາບໂລກ

ສະແດງຄຳຄິດເຫັນ