ປະທານາທິບໍດີ ສີ ຈິ້ນຜິງ ຂອງຈີນ ກ່າວກັບປະທານາທິບໍດີ ລູອິສ ອິນາຊິໂອ ລູລາ ດາ ຊິລວາ ຂອງບຣາຊີລ ໃນວັນທີ 12 ສິງຫາ 2025 ວ່າທັງສອງປະເທດສາມາດເປັນແບບຢ່າງຂອງ “ການພຶ່ງຕົນເອງ” ໃຫ້ແກ່ກຸ່ມປະເທດກໍາລັງພັດທະນາ ຫຼື Global South ໃນຄວາມທ້າທາຍດ້ານການຄ້າ ແລະ ພູມິລັດຖະສາດທີ່ເພີ່ມສູງຂຶ້ນ

ທັງຈີນ ແລະ ບຣາຊີລ ຕ່າງກໍພະຍາຍາມນຳສະເໜີຕົນເອງໃນຊ່ວງບໍ່ເທົ່າໃດເດືອນທີ່ຜ່ານມາ ໃນຖານະຜູ້ປົກປ້ອງລະບົບການຄ້າແບບພະຫຸພາຄີຢ່າງແຂງຂັນ

ຊຶ່ງຕົງກັນຂ້າມຢ່າງສິ້ນເຊິງກັບທ່າທີຂອງປະທານາທິບໍດີໂດນັລດ໌ ທຣຳ ແຫ່ງສະຫະລັດ ທີ່ເດີນໜ້າກົດດັນດ້ວຍມາດຕະການເກັບພາສີອາກອນ.

ການໂທລະສັບປຶກສາຫາລືຂອງ ທ່ານ ສີ ຈິ້ນຜິງ ກັບ ທ່ານ ລູລາ ເກີດຂຶ້ນພຽງບໍ່ເທົ່າໃດຊົ່ວໂມງຫລັງຈາກທຣຳປະກາດເລື່ອນເກັບພາສີອາກອນຕໍ່ຈີນອອກໄປອີກ 90 ວັນ ແລະ ຫລັງຈາກທີ່ ທ່ານ ລູລາ ຫາກໍສົ່ງສັນຍານເມື່ອອາທິດກ່ອນວ່າ ລາວມີແຜນຈະປຶກສາຫາລືກັບຜູ້ນຳອິນເດຍ ແລະ ຈີນ ເພື່ອພິຈາລະນາການຕອບໂຕ້ສະຫະລັດຢ່າງສອດປະສານກັນ.

ສຳນັກຂ່າວຊິນຫົວລາຍງານວ່າ ສີ ຈິ້ນຜິງ ຍ້ຳວ່າຄວາມສຳພັນລະຫວ່າງຈີນ ແລະ ບຣາຊີລຢູ່ໃນລະດັບສູງສຸດເປັນປະຫວັດການ

ພ້ອມລະບຸວ່າຈີນຈະ “ເຮັດວຽກຮ່ວມກັບບຣາຊີລເພື່ອເປັນແບບຢ່າງແຫ່ງຄວາມເປັນເອກະພາບ ແລະ ການພຶ່ງຕົນເອງໃນໝູ່ປະເທດສຳຄັນຂອງ Global South ແລະ ຮ່ວມກັນສ້າງໂລກທີ່ຍຸຕິທຳຍິ່ງຂຶ້ນ ແລະ ໂລກທີ່ຍືນຍົງຫຼາຍຂຶ້ນ”

ລາວຍັງກ່າວເພີ່ມເຕີມວ່າ ທຸກປະເທດຄວນຮ່ວມມືກັນ ແລະ ຕໍ່ຕ້ານລັດທິເບິ່ງແຕ່ຕົນຝ່າຍດຽວ ແລະ ການກີດກັ້ນທາງການຄ້າຢ່າງຫນັກແໜ້ນ ຊຶ່ງຖືເປັນຄຳເວົ້າທີ່ພາດພິງເຖິງນະໂຍບາຍເກັບພາສີຂອງສະຫະລັດຢ່າງຊັດເຈນ.

ທາງດ້ານທຳນຽບປະທານາທິບໍດີບຣາຊີລຖະແຫຼງວ່າການສົນທະນາທາງໂທລະສັບຄັ້ງນີ້ໃຊ້ເວລາປະມານ 1 ຊົ່ວໂມງ ໂດຍທັງສອງຜູ້ນຳໄດ້ຫາລືໃນປະເດັນຕ່າງໆ

ລວມທັງສົງຄາມໃນຢູເຄຣນ ແລະ ການຮັບມືກັບການປ່ຽນແປງສະພາບພູມິອາກາດ.

ໃນຖະແຫຼງການຍັງລະບຸວ່າ ທັງສອງເຫັນດີເຖິງບົດບາດຂອງ G20 ແລະ ກຸ່ມ BRICS ໃນການປົກປ້ອງລະບົບພະຫຸພາກີ ແລະ ໄດ້ຕົກລົງຂະຫຍາຍຄວາມຮ່ວມມືໃນຫຼາຍສາຂາ ເຊັ່ນ: ສາທາລະນະສຸກ, ນ້ຳມັນ ແລະ ແກັສ, ເສດຖະກິດດິຈິຕອລ ແລະ ດາວທຽມ.

ສະແດງຄຳຄິດເຫັນ