ໃນລະຫວ່າງວັນທີ່ 6-13 ສິງຫາທີ່ຜ່ານມາ ຈີນປະສົບຄວາມສຳເລັດໃນການທົດສອບຄັ້ງສຳຄັນຂອງຍານຫລານເຢ່ (Lanyue)

ຍານລົງຈອດເທິງດວງຈັນພ້ອມມະນຸດຄວບຄຸມລຳໃໝ່ ຊຶ່ງຖືເປັນກ້າວສຳຄັນຢ່າງຍິ່ງໃນໂຄງການສຳຫຼວດອະວະກາດຂອງປະເທດຈີນ.

ການທົດສອບນີ້ມີເປົ້າຫມາຍເພື່ອຢືນຢັນຄວາມພ້ອມຂອງຍານ ສຳຫຼັບພາລະກິດສົ່ງນັກບິນອະວະກາດຈີນໄປຍຽບພື້ນຜິວດວງຈັນໃຫ້ສຳເລັດພາຍໃນປີ2030.

ມາທຳຄວາມຮູ້ຈັກຍານ “Lanyue”

ຍານຫລານເຢ່ (Lanyue) ຊຶ່ງມີຄວາມໝາຍວ່າ “ໂອບກອດດວງຈັນ” ເປັນຍານລົງຈອດ ແລະ ຂຶ້ນຈາກພື້ນຜິວດວງຈັນພ້ອມມະນຸດຄວບຄຸມລຳທຳອິດຂອງຈີນ

ໄດ້ຮັບການອອກແບບໃຫ້ມີ 4 ຂາ ສາມາດບັນທຸກນັກບິນອະວະກາດໄດ້ 2 ຄົນ ພ້ອມດ້ວຍອຸປະກອນທາງວິທະຍາສາດ ລະບົບຊ່ວຍຊີວິດ ແລະ ສະບຽງທີ່ຈຳເປັນສຳຫຼັບການປະຕິບັດພາລະກິດເທິງດວງຈັນເປັນເວລາຫຼາຍມື້.

ການທົດສອບຍານ “Lanyue”

ການທົດສອບດັ່ງກ່າວຈັດຂຶ້ນ ຢູ່ ສະຖານທີ່ທົດສອບພາກພື້ນດິນໃນຫວຍໄຫລ ມົນທົນເຫີເປີຍ ທາງຕອນເຫນືອຂອງຈີນ ພາຍໃຕ້ການທົດສອບໂດຍຫົວໜ່ວຍງານລັດວິສາຫະກິດ ໄຊນ່າ ແອໂຣສເປັດ ໄຊແອັນສ໌ ແລະ ເທັກໂນໂລຢີ ຈຳກັດ (CASC)

ໄດ້ຈຳລອງສະພາບແວດລ້ອມເທິງດວງຈັນຢ່າງສົມຈິງ ທັງການສ້າງພື້ນຜິວທີ່ເປັນຫີນ ຫຼຸມອຸກກາບາດ ແລະ ການເຄືອບຜິວເພື່ອເຮັດໃຫ້ຄ້າຍກັບດິນເທິງດວງຈັນ ເຮັດໃຫ້ການທົດສອບມີຄວາມແມ່ນຍຳ ແລະ ໜ້າເຊື່ອຖື.

ວັດຖຸປະສົງຂອງການທົດສອບ

ການທົດສອບຊຶ່ງເສັດສິ້ນເມື່ອວັນທີ່ 6 ສິງຫາທີ່ຜ່ານມາ ມີວັດຖຸປະສົງເພື່ອປະເມີນປະສິດທິພາບຂອງລະບົບສຳຄັນຕ່າງໆ ຂອງຍານ Lanyue

ຜົນການທົດສອບຢືນຢັນວ່າລະບົບຂັບເຄື່ອນສຳຫຼັບການລົງຈອດ ແລະ ບິນຂຶ້ນ, ລະບົບນຳທາງ ແລະ ການຄວບຄຸມ (GNC) ລວມເຖິງຄວາມເຂົ້າກັນໄດ້ຂອງສ່ວນປະກອບເຊິງກົນຈັກຕ່າງໆ ສາມາດເຮັດວຽກໄດ້ຢ່າງຖືກຕ້ອງ ແລະ ເປັນໄປຕາມທີ່ຄາດຄະເນໄວ້.

ຖືວ່າເປັນຄັ້ງທຳອິດທີ່ຈີນໄດ້ທົດລອງການລົງຈອດ ແລະ ຂຶ້ນບິນຂອງຍານອະວະກາດສຳຫຼັບມະນຸດທີ່ຈະເດີນທາງໄປນອກໂລກ.

ຄວາມປອດໄພຄືສິ່ງສຳຄັນສູງສຸດ

ຫວງ ເຈິ້ນ ຈາກຫົວໜ່ວຍງານລັດວິສາຫະກິດ ໄຊນ່າ ແອໂຣສເປັດ ໄຊແອັນສ໌ ແລະ ເທັກໂນໂລຢີ ຈຳກັດ (CASC) ຍ້ຳວ່າຄວາມປອດໄພຂອງນັກບິນອະວະກາດເປັນສິ່ງທີ່ທີມໃຫ້ຄວາມສຳຄັນສູງສຸດສະເໝີ.

ຕົວຢ່າງເຊັ່ນ ຍານ Lanyue ຖືກອອກແບບໃຫ້ມີເຄື່ອງຍົນຫຼາຍເຄື່ອງທີ່ເຮັດວຽກແບບຊ້ຳຊ້ອນເພື່ອສຳຮອງຊຶ່ງກັນ ແລະ ກັນ ຊຶ່ງຫມາຍຄວາມວ່າຫາກມີເຄື່ອງຍົນໃດເຄື່ອງຍົນໜຶ່ງຂັດຂ້ອງ ເຄື່ອງຍົນທີ່ເຫຼືອກໍ່ຍັງສາມາດນຳນັກບິນອະວະກາດກັບສູ່ວົງໂຄຈອນດວງຈັນໄດ້ຢ່າງປອດໄພ ເພື່ອເດີນທາງກັບສູ່ໂລກໄດ້.

ເປົ້າຫມາຍໃນອະນາຄົດ ແລະ ສະຖານີວິໄຈເທິງດວງຈັນ

ຄວາມສຳເລັດຄັ້ງນີ້ບໍ່ພຽງແຕ່ເຮັດໃຫ້ຈີນເຂົ້າໃກ້ເປົ້າຫມາຍການສົ່ງມະນຸດໄປດວງຈັນໃນປີ2030 ເທົ່ານັ້ນ

ແຕ່ຍັງເປັນສ່ວນໜຶ່ງຂອງແຜນການທີ່ໃຫຍ່ກວ່າ ນັ້ນຄືການຈັດຕັ້ງສະຖານີວິໄຈດວງຈັນນານາຊາດ (International Lunar Research Station) ພາຍໃນປີ 2035 ໂດຍເປັນໂຄງການທີ່ຮ່ວມມືກັບລັດເຊຍ ແລະ ພັນທະມິດອື່ນໆ ໃນອະນາຄົດ.

ການທົດສອບຍານ “Lanyue” ທີ່ປະສົບຄວາມສຳເລັດຢ່າງສົມບູນນັບເປັນຫມຸດຫມາຍສຳຄັນທາງປະຫວັດສາດຂອງໂຄງການອະວະກາດຈີນ ແລະ ຍັງເປັນການຢືນຢັນເຖິງຄວາມພ້ອມ ແລະ ຄວາມມຸ້ງໝັ້ນຂອງຈີນໃນການບັນລຸເປົ້າຫມາຍອັນຍິ່ງໃຫຍ່

ນັ້ນຄືການສົ່ງມະນຸດໄປຍຽບດວງຈັນໃຫ້ສຳເລັດພາຍໃນປີ 2030 ແລະ ປູທາງໄປສູ່ການຈັດຕັ້ງສະຖານີວິໄຈນານາຊາດເທິງດວງຈັນໃນອະນາຄົດ.

ສະແດງຄຳຄິດເຫັນ