ແຮງງານຕ່າງປະເທດໃນເກົາຫຼີໃຕ້ກຳລັງປະເຊີນກັບຄວາມສ່ຽງເສຍຊີວິດຈາກອຸບັດຕິເຫດໃນການເຮັດວຽກສູງກວ່າຄົນເກົາຫຼີໃຕ້ ໂດຍໃນຊ່ວງເຄິ່ງປີທຳອິດຂອງປີນີ້ ມີແຮງງານເສຍຊີວິດແລ້ວ 75 ຄົນ

ຄວາມເຫລື່ອມລ້ຳຂອງຕົວເລກດັ່ງກ່າວຊວນໃຫ້ຕົກໃຈ ແຮງງານຕ່າງປະເທດມີສັດສ່ວນພຽງແຕ່ 3.4% ຂອງແຮງງານທັ້ງຫມົດໃນເກົາຫຼີໃຕ້ ຫຼື ປະມານ 1 ລ້ານຄົນ ຈາກແຮງງານທັ້ງຫມົດ 29 ລ້ານຄົນ

ແຕ່ຄິດເປັນສັດສ່ວນການເສຍຊີວິດຈາກອຸບັດຕິເຫດແຮງງານເຖິງ 10-15% ຂອງແຕ່ລະປີ ຊຶ່ງໝາຍຄວາມວ່າແຮງງານຕ່າງປະເທດມີຄວາມສ່ຽງເສຍຊີວິດຈາກການເຮັດວຽກສູງກວ່າຄົນເກົາຫຼີໃຕ້ປະມານ 3-4 ເທົ່າ

ຂໍ້ມູນນີ້ມາຈາກ Korea Workers’ Compensation and Welfare Service ຊຶ່ງເກັບສະຖິຕິຄຳຮ້ອງກ່ຽວກັບການບາດເຈັບ ແລະ ການເຈັບປ່ວຍຈາກການເຮັດວຽກ

ໂດຍລະຫວ່າງເດືອນມັງກອນເຖິງມິຖຸນາທີ່ຜ່ານມາ ມີແຮງງານຕ່າງປະເທດເຂົ້າຍື່ນຄຳຮ້ອງ 5,173 ກໍລະນີ ເພີ່ມຂຶ້ນ 4.5% ຈາກຊ່ວງດຽວກັນຂອງປີ 2024 (4,950 ກໍລະນີ)

ໃນຈຳນວນນີ້ສ່ວນໃຫຍ່ແມ່ນອຸບັດຕິເຫດຈາກການເຮັດວຽກ 4,415 ກໍລະນີ ແລະທີ່ເຫຼືອ 758 ກໍລະນີແມ່ນໂລກຈາກການເຮັດວຽກ

ໃນຊ່ວງເວລາດຽວກັນ ມີການອະນຸມັດເງິນຊົດເຊີຍໃຫ້ແກ່ຄອບຄົວຜູ້ເສຍຊີວິດ 59 ຈາກ 75 ຄົນ ໂດຍເກືອບທັງໝົດແມ່ນກໍລະນີອຸບັດຕິເຫດ (ອະນຸມັດ 51 ຄຳຮ້ອງຈາກ 53 ຄຳຮ້ອງ) ສ່ວນກໍລະນີໂລກຈາກການເຮັດວຽກໄດ້ຮັບອະນຸມັດນ້ອຍກວ່າຫຼາຍ (ອະນຸມັດ 8 ຄຳຮ້ອງຈາກ 22 ຄຳຮ້ອງ)

ແນວໂນ້ມການຍື່ນຄຳຮ້ອງຂອງແຮງງານຕ່າງປະເທດເພີ່ມຂຶ້ນຕໍ່ເນື່ອງທຸກປີ ຈາກ 8,062 ກໍລະນີໃນປີ 2020 ເພີ່ມເປັນກວ່າ 10,000 ກໍລະນີໃນປີ 2024

ຜູ້ຊ່ຽວຊານດ້ານແຮງງານລະບຸວ່ານີ້ບໍ່ແມ່ນເລື່ອງບັງເອີນ ເພາະແຮງງານຕ່າງປະເທດຈຳນວນຫຼາຍກະຈຸກໂຕຢູ່ໃນພາກສ່ວນທີ່ມີຄວາມສ່ຽງສູງ ເຊັ່ນ: ກໍ່ສ້າງ ອຸດສາຫະກຳການຜະລິດ ແລະ ກະສິກຳ ອີກທັງຍັງຕ້ອງປະເຊີນອຸປະສັກດ້ານພາສາ ການເລືອກປະຕິບັດ ແລະ ສັນຍາຈ້າງງານທີ່ບໍ່ໝັ້ນຄົງ ເຮັດໃຫ້ຍາກທີ່ຈະຮຽກຮ້ອງສະພາບແວດລ້ອມການເຮັດວຽກທີ່ປອດໄພກວ່າ

ປັດຈຸບັນລະບົບໃບອະນຸຍາດຈ້າງງານ (Employment Permit System) ຍັງຈຳກັດການປ່ຽນສະຖານທີ່ເຮັດວຽກຂອງແຮງງານຕ່າງປະເທດ ແມ້ໃນກໍລະນີທີ່ສະພາບການເຮັດວຽກບໍ່ປອດໄພ

ຢ່າງໃດກໍ່ຕາມ ກະຊວງການຈ້າງງານ ແລະ ແຮງງານເກົາຫຼີໃຕ້ຫາກໍ່ປະກາດວ່າຈະຜ່ອນຄາຍຂໍ້ຈຳກັດນີ້ ເພື່ອເປີດທາງໃຫ້ແຮງງານສາມາດຍ້າຍໄປເຮັດວຽກໃນບ່ອນທີ່ປອດໄພກວ່າໄດ້ງ່າຍຂຶ້ນ

ອີ ຢົງອູ ນັກວິໄຈອາວຸໂສແຫ່ງສູນວິໄຈແລະຝຶກອົບຮົມການຍ້າຍຖິ່ນ IOM ກ່າວຢ້ຳວ່າ ແຮງງານຕ່າງປະເທດກຳລັງປະເຊີນ “ການຜະສົມຜະສານຂອງອຸປະສັກດ້ານພາສາ ການເລືອກປະຕິບັດ ແລະ ສະຖານະການຈ້າງງານທີ່ບໍ່ໝັ້ນຄົງ”

ຊຶ່ງເຮັດໃຫ້ພວກເຂົາສ່ຽງກວ່າຄົນເຮັດວຽກທົ່ວໄປ ພ້ອມຮຽກຮ້ອງໃຫ້ລັດຖະບານແກ້ໄຂ “ຈຸດບອດ” ເຊັ່ນ: ການຄຸ້ມຄອງຄວາມປອດໄພແຮງງານທີ່ບໍ່ມີເອກະສານດ້ວຍ

ສະແດງຄຳຄິດເຫັນ