ຫຼາຍຄົນອາດຄິດວ່າການຖູແຂ້ວກ່ອນນອນເປັນພຽງກິດຈະວັດປະຈຳວັນເພື່ອຮັກສາສຸຂະພາບຊ່ອງປາກ ແລະ ປ້ອງກັນແຂ້ວແມງ

ແຕ່ຜົນການສຶກສາໃໝ່ຈາກປະເທດຍີ່ປຸ່ນກັບຊີ້ວ່າ ພຶດຕິກຳນ້ອຍໆ ນີ້ອາດມີຄວາມສຳຄັນຕໍ່ສຸຂະພາບຫົວໃຈຫຼາຍກວ່າທີ່ຫຼາຍຄົນຄາດຄິດ.

ການຄົ້ນຄວ້າທີ່ຖືກພິມເຜີຍແພ່ໃນວາລະສານ Scientific Reports ປີ 2023 ໂດຍທີມຄົ້ນຄວ້າຈາກໂຮງໝໍມະຫາວິທະຍາໄລໂອຊາກາ ພົບວ່າຜູ້ທີ່ບໍ່ຖູແຂ້ວກ່ອນນອນມີຄວາມສ່ຽງຕໍ່ການເກີດໂລກຫົວໃຈ ແລະ ຫຼອດເລືອດສູງກວ່າຜູ້ທີ່ຖູແຂ້ວກ່ອນເຂົ້ານອນຢ່າງຊັດເຈນ.

ການຄົ້ນຄວ້າດັ່ງກ່າວໄດ້ຕິດຕາມຂໍ້ມູນຈາກຜູ້ໃຫຍ່ກວ່າ 1,600 ຄົນ ທີ່ເຂົ້າຮັບການຮັກສາໃນໂຮງໝໍລະຫວ່າງປີ 2013 ຫາ 2016.

ຜູ້ເຂົ້າຮ່ວມຖືກສອບຖາມພຶດຕິກຳການຖູແຂ້ວ ແລະ ຖືກແບ່ງອອກເປັນ 4 ກຸ່ມ ໄດ້ແກ່:

1. ຜູ້ທີ່ຖູແຂ້ວທັງເຊົ້າ ແລະ ກ່ອນນອນ,
2. ຜູ້ທີ່ຖູແຂ້ວສະເພາະກ່ອນນອນ,
3. ຜູ້ທີ່ຖູແຂ້ວສະເພາະຕອນເຊົ້າ,
4. ຜູ້ທີ່ບໍ່ຖູແຂ້ວເລີຍ.

ເມື່ອນຳຂໍ້ມູນມາວິເຄາະປຽບທຽບ ຜົນໄດ້ພົບວ່າກຸ່ມທີ່ຖູແຂ້ວກ່ອນນອນ ຫຼື ຖູທັງເຊົ້າ ແລະ ແລງມີອັດຕາລອດຊີວິດ ແລະ ສຸຂະພາບຫົວໃຈທີ່ດີກວ່າກຸ່ມທີ່ບໍ່ຖູແຂ້ວເລີຍ ຫຼື ຖູພຽງຕອນເຊົ້າຢ່າງມີຄວາມສຳຄັນ.

ໜຶ່ງໃນຄຳອະທິບາຍທີ່ນັກວິໄຈສະເໜີແມ່ນ ລະຫວ່າງທີ່ພວກເຮົານອນຫລັບ ການຜະລິດນ້ຳລາຍຈະຫຼຸດລົງ ເຮັດໃຫ້ສະພາບໃນຊ່ອງປາກເອື້ອຕໍ່ການຈະເລີນເຕີບໂຕຂອງເຊື້ອແບັກທີເຣຍ.

ຖ້າຫາກບໍ່ໄດ້ຖູແຂ້ວກ່ອນນອນ ແບັກທີເຣຍເຫຼົ່ານີ້ສາມາດສະສົມ ແລະ ກໍ່ໃຫ້ເກີດການອັກເສບໃນຊ່ອງປາກ ແລະ ອາດແຜ່ເຂົ້າສູ່ລະບົບໄຫຼວຽນເລືອດ ສົ່ງຜົນໃຫ້ເກີດການອັກເສບເຮື້ອຮັງໃນຫຼອດເລືອດ ແລະ ເພີ່ມຄວາມສ່ຽງຂອງໂລກຫົວໃຈໃນທີ່ສຸດ.

ແນວຄວາມຄິດນີ້ຍັງສອດຄ່ອງກັບການຄົ້ນຄວ້າກ່ອນໜ້ານີ້ທີ່ເຊື່ອມໂຍງໂລກເຫງືອກອັກເສບ ແລະ ໂລກປະລິທັນເຂົ້າກັບພາວະຫຼອດເລືອດແຂງ ແລະ ໂລກຫົວໃຈ ໂດຍມີການພົບວ່າການຕິດເຊື້ອຈາກຊ່ອງປາກສາມາດສົ່ງຜົນກະທົບຕໍ່ລະບົບຫົວໃຈ ແລະ ຫຼອດເລືອດໄດ້ແທ້.

ເຖິງແມ່ນວ່າການສຶກສານີ້ຈະມີຂໍ້ຈຳກັດ ເນື່ອງຈາກກຸ່ມຕົວຢ່າງທັງຫມົດເປັນຄົນເຈັບທີ່ເຂົ້າຮັບການຮັກສາໃນໂຮງໝໍ ຈຶ່ງອາດຍັງບໍ່ສະທ້ອນພາບລວມຂອງປະຊາກອນທົ່ວໄປທັງໝົດ

ແຕ່ຜົນທີ່ໄດ້ກໍເປັນສັນຍານເຕືອນຊັດເຈນວ່າ ການປ່ອຍປະລະເລີຍການຖູແຂ້ວກ່ອນນອນອາດສົ່ງຜົນເສຍຕໍ່ສຸຂະພາບຫົວໃຈຫຼາຍກວ່າທີ່ຄິດ.

ການດູແລສຸຂະພາບຊ່ອງປາກຈຶ່ງບໍ່ແມ່ນພຽງແຕ່ເລື່ອງຂອງຮອຍຍິ້ມ ຫຼື ກິ່ນປາກເທົ່ານັ້ນ ແຕ່ຍັງອາດກ່ຽວຂ້ອງກັບການປ້ອງກັນໂລກຫົວໃຈ ແລະ ຫຼອດເລືອດໃນໄລຍະຍາວດ້ວຍ.

ຜູ້ຊ່ຽວຊານດ້ານທັນຕະກຳ ແລະ ແພດໂລກຫົວໃຈຈຶ່ງແນະນຳກົງກັນວ່າ ການຖູແຂ້ວຢ່າງໜ້ອຍມື້ລະສອງຄັ້ງ ໂດຍສະເພາະກ່ອນເຂົ້ານອນ ເປັນສິ່ງສຳຄັນທີ່ຄວນເຮັດຢ່າງສະຫມ່ຳສະເໝີ ຄວບຄູ່ກັບການໃຊ້ໄຫມຂັດຟັນ ແລະ ກວດສຸຂະພາບຊ່ອງປາກກັບທັນຕະແພດເປັນປະຈຳທຸກ 6 ເດືອນ ເພື່ອຊ່ວຍຫຼຸດຄວາມສ່ຽງຂອງໂລກເຫງືອກ ໂລກຫົວໃຈ ແລະ ໂລກຫຼອດເລືອດໃນອະນາຄົດ.

ຫາກເຈົ້າເຄີຍລະເລີຍເພາະຄວາມເມື່ອຍ ຫຼື ຢາກນອນເກີນໄປ ການຄົ້ນຄວ້ານີ້ອາດເປັນເຫດຜົນສຳຄັນໃຫ້ກັບມາໃສ່ໃຈກັບກິດຈະວັດນ້ອຍໆ ທີ່ຊ່ວຍປົກປ້ອງຫົວໃຈ ແລະ ສຸຂະພາບໂດຍລວມຂອງເຈົ້າໄດ້.

ສະແດງຄຳຄິດເຫັນ