ຈະເກີດຫຍັງຂຶ້ນຖ້າມີຫຸ່ນຍົນທີ່ມີມົດລູກ ທີ່ສາມາດຖືພາ ແລະ ເກີດລູກແທນມະນຸດໄດ້ສຳເລັດ.

ນະວັດຕະກຳນີ້ຈະຊ່ວຍແກ້ໄຂບັນຫາການມີລູກຍາກໄດ້ຫຼາຍປານໃດ.

ນີ້ແມ່ນຫຸ່ນຍົນຮິວແມນນອຍດ໌ທີ່ພັດທະນາໂດຍປະເທດຈີນຄັ້ງທຳອິດຂອງໂລກ ທີ່ມີມົດລູກປອມ ສາມາດຖືພາເດັກນ້ອຍໄດ້ນານເຖິງ 10 ເດືອນ ແລະ ເກີດລູກແທນມະນຸດໄດ້.

ໂຄງການນີ້ນຳໂດຍ ດຣ. ຈາງ ຊີເຟິງ ຈາກມະຫາວິທະຍາໄລເທັກໂນໂລຊີນານຢາງ ມີຈຸດປະສົງເພື່ອຊ່ວຍເຫຼືອຄູ່ສົມລົດທີ່ມີບຸດຕາຍາກ ແລະ ແກ້ໄຂບັນຫາອັດຕາການເກີດທີ່ລົດລົງ.

ດຣ. ຈາງ ຊີເຟິງ ກ່າວວ່າ ຫຸ່ນຍົນຕົວນີ້ບໍ່ແມ່ນພຽງແຕ່ຫຸ່ນຍົນຝາກຕົວອ່ອນ ແຕ່ສາມາດຊ່ວຍເຫຼືອມະນຸດທີ່ບໍ່ສາມາດຖືພາໄດ້ຢ່າງຄົບວົງຈອນ.

ໂດຍຫຸ່ນຍົນຮິວແມນນອຍດ໌ນີ້ຈະມີຂະໜາດເທົ່າຄົນແທ້ ທີ່ຕິດຕັ້ງມົດລູກປອມໄວ້ໃນຊ່ອງທ້ອງ ເຊິ່ງສາມາດຈຳລອງກະບວນການທັງໝົດ ເລີ້ມຕັ້ງແຕ່ການປະສົມພັນຈົນເຖິງການໃຫ້ກຳເນີດເດັກນ້ອຍອອກມາ.

ນະວັດຕະກຳຫຼັກຢູ່ທີ່ເທັກໂນໂລຊີມົດລູກປອມ ເຊິ່ງເດັກນ້ອຍໃນຄັນຈະຈະເລີນເຕີບໂຕໃນນ້ຳຄ່ຳປອມ ແລະ ໄດ້ຮັບສານອາຫານຜ່ານສາຍຢາງ ຄ້າຍຄືການຕັ້ງຄັນຕາມທຳມະຊາດ.

ນ້ຳຄ່ຳປອມ ເປັນຫນຶ່ງໃນສ່ວນສຳຄັນທີ່ສຸດຂອງມົດລູກປອມທີ່ໄດ້ຮັບການອອກແບບມາ ເຕັມໄປດ້ວຍສານອາຫານ ແລະ ປະສົບຜົນສຳເລັດໃນການທົດລອງກັບສັດ ເຊັ່ນ: ການລ້ຽງລູກແກະທີ່ເກີດກ່ອນກຳໜົດໃນປີ 2017.

ດຣ.ຈາງ ອ້າງວ່າເທັກໂນໂລຊີນີ້ມີຄວາມກ້າວໜ້າໃນຫ້ອງປະຕິບັດການແລ້ວ ຂະນະນີ້ ກຳລັງພັດທະນາການເຮັດວຽກຂອງຫຸ່ນຍົນຮິວແມນນອຍດ໌ໃຫ້ສາມາດມີປະຕິສຳພັນກັບມະນຸດໄດ້ດ້ວຍ.

ຄາດວ່າ ຫຸ່ນຍົນຖືພາ ຕົ້ນແບບຈະເປີດຕົວຢ່າງເປັນທາງການພາຍໃນ 1 ປີ.

ຜູ້ພັດທະນາຫວັງວ່າ ມັນຈະເປັນຄວາມຫວັງສຳລັບແມ່ທີ່ມີລູກຍາກ ຫຼື ບໍ່ສາມາດຖືພາຕາມທຳມະຊາດ.

ສະແດງຄຳຄິດເຫັນ