ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ຂໍຖືເປັນກຽດແຈ້ງມາຍັງບັນດາທ່ານ ຜູ້ນໍາໃຊ້ລົດ ໃຊ້ຖະຫນົນ ໃນທົ່ວນະຄອນຫຼວງວຽງຈັນ ຮັບຊາບວ່າ ໃນລະຫວ່າງວັນທີ 05-07 ກັນຍາ 2025 ຈະໄດ້ມີການຈັດງານ ເທດສະການຄ້າລາວ ຢູ່ທີ່ຫໍປະຊຸມແຫ່ງຊາດ ເຊິ່ງເປັນການຈັດງານລະດັບຊາດປະຈໍາປີ ທີ່ເຕົ້າໂຮມທຸກພາກສ່ວນໃນ ຂະແໜງການຄ້າຄໍາ ແລະ ປິ່ນອ້ອມ ເພື່ອຊຸກຍູ້ສົ່ງເສີມໃຫ້ຂະແຫນງການອຸດສາຫະກໍາຄໍາລາວ ເຕີບໃຫຍ່ຂະຫຍາຍຕົວ.

ສະນັ້ນ, ເພື່ອອໍານວຍຄວາມສະດວກໃຫ້ແກ່ການສັນຈອນ ແລະ ຮັບປະກັນຄວາມປອດໄພໃນການຈັດງານ ເທດສະການດັ່ງກ່າວ ຈຶ່ງຂໍຮຽກຮ້ອງມາຍັງ ຜູ້ນໍາໃຊ້ລົດໃຊ້ຖະໜົນ ໃນທົ່ວນະຄອນຫຼວງວຽງຈັນ ຖ້າບໍ່ຈໍາເປັນແມ່ນ ໃຫ້ຫຼີກລ້ຽງການສັນຈອນ ຢູ່ຖະໜົນໄກສອນພົມວິຫານ ເລີ່ມແຕ່ ປະຕູໄຊ ຫາ ຫໍປະຊຸມແຫ່ງຊາດ ໃນຊ່ວງໄລຍະວັນ ຈັດງານເທດສະການດັ່ງກ່າວ ຫຼື ສາມາດນໍາໃຊ້ເສັ້ນທາງເວັ້ນດັ່ງນີ້:

1. ຜູ້ນໍາໃຊ້ລົດໃຊ້ຖະຫນົນ ຢູ່ເຂດເມືອງສີສັດຕະນາກ ແລະ ເມືອງໄຊເສດຖາ ທີ່ມີຈຸດປະສົງໄປດົງໂດກ ຫຼື ສະຖານທີ່ ທີ່ຈໍາເປັນຕ້ອງໃຊ້ເສັ້ນທາງໄກສອນພົມວິຫານ ແມ່ນສາມາດໄປນໍາໃຊ້ເສັ້ນທາງຫົວຂົວ ໄປຫາ ຕະຫຼາດໜອງໜ່ຽງ ອອກໃສ່ເສັ້ນທາງຄູ່ຂະໜານກັບຖະໜົນໄກສອນພົມວິຫານ ອອກໃສ່ ຖະຫນົນ 450 ປີ ແລະ ອອກໃສ່ດົງໂດກ.

2. ຜູ້ນໍາໃຊ້ລົດໃຊ້ຖະໜົນ ຢູ່ເຂດເມືອງຈັນທະບູລີ ແລະ ເມືອງສີໂຄດຕະບອງ ແມ່ນສາມາດໄປນໍາໃຊ້ ຖະໜົນ 13 ເໜືອ, ຖະໜົນໂພນຕ້ອງ ແລະ ຖະໜົນເຈົ້າອານຸວົງ (ເສັ້ນທາງຫ້ວຍຫົງ) ອອກໃສ່ຕານມີໄຊ ຫາ ດົງໂດກ.

ສະແດງຄຳຄິດເຫັນ