ຂປລ. ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ (ຄບຕ) ເອົາໃຈໃສ່ເພີ່ມທະວີ ໃນການຈັດຕັ້ງປະຕິບັດວຽກງານສຳຄັນ ເພື່ອຕ້ອນຮັບກອງປະຊຸມໃຫຍ່ ຜູ້ແທນອົງຄະນະພັກ ນະຄອນ ຫລວງວຽງຈັນ ຄັ້ງທີ VIII ທີ່ຈະໄຂຂຶ້ນໃນທ້າຍເດືອນກັນຍານີ້.

ມາຮອດປັດຈຸບັນ, ການກຽມຄວາມພ້ອມຕ່າງໆ ແມ່ນສຳເລັດ 100% ເປັນຕົ້ນ ວຽກງານອານະໄມຮັກສາຄວາມສະອາດບັນດາເສັ້ນທາງໃນຕົວເມືອງ, ວຽກງານບົວລະບັດຮັກສາ ສວນສາທາລະ, ສວນຍ່ອມຕາມເສັ້ນທາງສາທາລະນະ ໃນຕົວເມືອງ, ປະດັບປະດາ ຕິດຕັ້ງທຸງຕາມຈຸດສໍາຄັນຕ່າງໆ ໃນຕົວເມືອງ 7 ຈຸດ ຄື: ສວນເຈົ້າຟ້າງຸ່ມ, ສວນປະຕູໄຊ, ຫໍຄຳ, ຫໍປະຊຸມແຫ່ງຊາດ, ໄຟແດງດົງໂດກ, ສວນດອນໜູນ ແລະ ວົງວຽນ 450 ປີ.

ທ່ານ ປັນຍາ ມະນີວົງ ຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ໄດ້ໃຫ້ສຳພາດຕໍ່ສື່ມວນຊົນໃນວັນທີ 17 ກັນຍາ 2025 ນີ້ວ່າ: ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ໄດ້ປະສານສົມທົບກັບອົງການປົກຄອງເມືອງ, ພາກສ່ວນກ່ຽວຂ້ອງຂຶ້ນແຜນ ແລະ ດໍາເນີນການສ້າງຂະບວນການອອກແຮງງານ ອະນາໄມເສັ້ນທາງທີ່ນອນໃນແຕ່ລະເມືອງ, ສ້າງຂະບວນການປະ ດັບປະດາທຸງຊາດ-ທຸງພັກ ໃສ່ເສົາໄຟແຄມທາງ ຈໍານວນ 2 ເສັ້ນທາງ (ເສັ້ນທາງ 23 ສິງຫາ ແລະ ເສັ້ນທາງ ໄກສອນ ພົມວິຫານ ແຕ່ສວນປະຕູໄຊ-ໄຟແດງດົງໂດກ), ຕິດຕັ້ງປ້າຍຄຳຂວັນກອງປະຊຸມໃສ່ ເສົາໄຟແຄມຖະໜົນລ້ານຊ້າງ, ຂຶ້ນປ້າຍຄຳຂວັນກອງປະຊຸມໃສ່ຈໍ LED ເກືອບ 10 ຈຸດໃນຕົວເມືອງ.

ພ້ອມນີ້, ກໍໄດ້ກໍານົດຮູບແບບການປະດັບທຸງ ຕາມເສົາໄຟແຄມທາງ, ກາງທາງ ແລະ ກຳນົດຮູບແບບຂະໜາດທຸງຊາດ, ທຸງພັກ ຕິດຕາມສໍານັກງານ, ອົງການ, ເຮືອນຊານ ລວມທັງໄດ້ຈັດສັນເສັ້ນທາງໃຫ້ບັນດາເມືອງ ປະດັບປະດາ ເພື່ອຄວາມເປັນເອກະພາບ.

ພ້ອມນີ້, ຍັງໄດ້ເພີ່ມທະວີວຽກງານອະນາໄມ ເສັ້ນທາງສາຍຫລັກ ໂດຍສະເພາະແມ່ນເພີ່ມຮອບວຽນໃນການອະນາໄມ ເສັ້ນທາງໃຫ້ມີຄວາມສະອາດ, ປະສານສົມທົບຕິດຕາມຢ່າງໃກ້ຊິດ ໃນການເກັບ ມຽນຂີ້ເຫຍື້ອ ແນໃສ່ບໍ່ໃຫ້ມີຂີ້ເຫຍື້ອຊະຊາຍ ຮັກສາໄດ້ຄວາມເປັນລະບຽບຮຽບຮ້ອຍ.

ຂ່າວ-ພາບ: ກິດຕາ

ສະແດງຄຳຄິດເຫັນ