ເກີດເຫດການລະທຶກ ສາວຈີນທີ່ກຳລັງດື່ມຊານົມໄຂ່ມຸກແລ້ວເຜີດູດໄຂ່ມຸກໄຫລເຂົ້າໄປໃນຫລອດລົມ ຈົນອຸດກັ້ນທາງເດີນຫາຍໃຈ ໂຊກດີພົນລະເມືອງດີເຂົ້າຊ່ວຍຊີວິດທັນໃນຊ່ວງ 4 ນາທີລະທຶກ

ໂລກໂຊຊຽວ ມີການແຊຣ໌ຄລິບວິນາທີຊີວິດຂອງສາວຊາວຈີນຜູ້ນັ້ນ ທີ່ເກືອບຈະເອາຊີວິດບໍ່ລອດ ນາທີຊີວິດ ຫຼັງໄຂ່ມຸກໃນຊານົມເຄື່ອງດື່ມຍອດນິຍົມ ຫລຸດເຂົ້າໄປຕິດໃນຫລອດລົມ ເຮັດໃຫ້ຜູ້ກ່ຽວຫາຍໃຈບໍ່ອອກ ມີອາການມືງໍ ໃບໜ້າເລີ່ມຂຽວ ແລະ ເກືອບໝົດສະຕິ ໂຊກດີທີ່ໃນຈັງຫວະນັ້ນ ມີພົນລະເມືອງດີເຫັນເຫດການ ແລະ ເລັ່ງເຂົ້າມາໃຫ້ການຊ່ວຍເຫຼືອ ໂດຍຜັດກັນເຮັດ ທ່າຮັມລິກ (Heimlich manoeuvre) ເພື່ອພະຍາຍາມດັນສິ່ງອຸດກັ້ນອອກມາ ຢ່າງໃດກໍ່ຕາມ ເນື່ອງຈາກຜູ້ປະສົບເຫດມີຮູບຮ່າງສູງ ແລະ ອາການເຂົ້າຂັ້ນວິກິດຈົນບໍ່ສາມາດຢືນໄດ້ ເຮັດໃຫ້ການເຮັດຮັມລິກແບບມາຕະຖານເປັນໄປຢ່າງຍາກລຳບາກ

ໂຊກດີທີ່ຫລັງຈາກຄວາມພະຍາຍາມຕໍ່ເນື່ອງເກືອບ 4 ນາທີ ເດັກສາວຜູ້ນັ້ນກໍ່ສາມາດຂັບສິ່ງອຸດກັ້ນອອກມາໄດ້ທັນເວລາ ແລະ ພົ້ນຈາກພາວະອັນຕະລາຍຢ່າງທ່ວງທັນ ຫວິດຜ່ານນາທີຊີວິດມາໄດ້

ເຫດການນີ້ສະທ້ອນເຖິງຄວາມສຳຄັນຂອງການຮູ້ຈັກ ແລະ ໃຊ້ທ່າຮັມລິກຢ່າງຖືກວິທີ ເພາະການຊ່ວຍເຫຼືອທີ່ໄວວາໃນ “4 ນາທີທອງ” ມີສ່ວນສຳຄັນຕໍ່ການຊ່ວຍຊີວິດ ຂະນະດຽວກັນກໍເຜີຍໃຫ້ເຫັນຂໍ້ຈຳກັດ ເຊັ່ນ:  ເຫດການແຕກຕື່ນ ແລະ ການເຮັດທ່າຊ່ວຍເຫລືອຜິດວິທີ ທີ່ອາດເຮັດໃຫ້ປະສິດທິພາບຫລຸດລົງ

ແພດຜູ້ຊ່ຽວຊານຊີ້ວ່າ ທ່າຮັມລິກ (Heimlich manoeuvre) ເໝາະສຳລັບຜູ້ປ່ວຍທີ່ຍັງຮູ້ສຶກຕົວ ແລະ ມີການອຸດກັ້ນທາງເດີນຫາຍໃຈຢ່າງສົມບູນ ແຕ່ຫາກຜູ້ປ່ວຍເລີ່ມໝົດສະຕິຫຼືບໍ່ຕອບສະໜອງ ການເຮັດ CPR ອາດໄດ້ຜົນຫຼາຍກວ່າ ເນື່ອງຈາກແຮງດັນຈາກການກົດໜ້າອົກສາມາດຊ່ວຍຂັບສິ່ງແປກປອມອອກຈາກຫລອດລົມໄດ້.

ຂໍໃຫ້ທຸກທ່ານຮັບປະທານອາຫານຢ່າງລະມັດລະວັງເພື່ອປ້ອງກັນບໍ່ໃຫ້ເກິດເຫດການຄ້າຍເຫດການດັ່ງກ່າວເປັນສິ່ງປອດໄພຕໍ່ຊີວິດຂອງທ່ານເອງ

ທີ່ມາ : Newsflare

ສະແດງຄຳຄິດເຫັນ