ຂປລ. ໃນສະໜາມຊ້ອມຮົບຮ່ວມ ລາວ-ຣັດເຊຍ “ລາໂຣສ-2025” ພາຍໃຕ້ຄໍາຂວັນ: “ຄຽງບ່າ ຄຽງໄຫລ່ ຕໍ່ສູ້ເພືື່ອສັນຕິພາບ ແລະ ຄວາມໝັ້ນຄົງ” ມີສຽງປືນດັງກ້ອງສະໜາມ, ຂີ້ຝຸ່ນຄຸ້ມກະຈາຍໄປທົ່ວບໍລິເວນສະໜາມຫັດແອບ ເຊິ່ງເປັນການຍົກລະດັບຍຸດທະວິທີ, ແລກປ່ຽນຄວາມຮູ້ ຄວາມສາ ມາດ ສ້າງສາຍສຳພັນທີດີ ລະຫວ່າງສອງຊາດ ລາວ-ຣັດເຊຍ. ສໍາລັບ ພະນັກງານ-ນັກຮົບ ແມ່ນເປັນໂອກາດຄັ້ງສໍາຄັນໃນການຝຶກຊ້ອມ ເຊິ່ງໄດ້ສອນໃຫ້ຮູ້ຈັກກັບເຕັກນິກການຕໍ່ສູ້ ແລະ ຍຸດທະວິທີ ທີ່ທັນສະໄໝ, ການໃຊ້ຊີວິດຢູ່ໃນສະໜາມຝຶກທີ່ເຕັມໄປດ້ວຍສິ່ງທ້າທາຍ, ຄວາມຍາກລຳບາກ, ຄວາມກົດດັນ ທີ່ໄດ້ສ້າງຄວາມແຂງແກ່ນ ແລະ ຄວາມອົດທົນ ນັ້ນ, ແມ່ນການຮຽນຮູ້ທີ່ມາຈາກປະສົບການຕົວຈິງ ເຊິ່ງເປັນບົດຮຽນອັນລໍ້າຄ່າຫລາຍກວ່າທຸກບົດຮຽນໃນຫ້ອງຮຽນ.

ສະຫາຍ ພັນເອກ ພັນສອນ ຄໍາຜິວ ຮອງຫົວໜ້າກົມອົບຮົມ ກົມໃຫຍ່ເສນາທິການກອງທັບປະຊາຊົນລາວ, ຫົວໜ້າຄະນະຊີ້ນໍາອະນຸກຳມະການເນື້ອໃນການຊ້ອມຮົບຮ່ວມ ລາວ-ຮັດເຊຍ “ລາ ໂຣສ-2025” ໄດ້ໃຫ້ສໍາພາດຕໍ່ສື່ມວນຊົນ ກອງທັບປະຊາຊົນລາວ ໃນວັນທີ 17 ກັນຍາ 2025 ນີ້ວ່າ: ການຊ້ອມຮົບຮ່ວມ ລາວ-ຣັດເຊຍ “ລາໂຣສ-2025” ເພື່ອຮັດແໜ້ນ ແລະ ເສີມຂະຫຍາຍການພົວພັນຮ່ວມມືຍຸດທະສາດ ລະຫວ່າງສອງຊາດ ລາວ-ຣັດເຊຍ, ບົນພື້ນຖານຄວາມສະເໝີພາບ ແລະ ການຮ່ວມມືແບບຕ່າງຝ່າຍຕ່າງມີຜົນປະໂຫຍດ ແນໃສ່ການກຽມພ້ອມສູ້ຮົບໃນລະດັບສູງ ໃຫ້ແກ່ກອງທັບປະຊາຊົນລາວ ແລະ ກໍາລັງປະກອບອາວຸດ ແຫ່ງ ສ ຣັດເຊຍ ສາມາດຕອບໂຕ້ກັບສິ່ງທ້າທາຍ ແລະ ໄພຂົ່ມຂູ່ຮູບແບບໃໝ່ຕໍ່ຄວາມໝັ້ນຄົງ, ຄົ້ນຄວ້າຕີລາຄາສະພາບການຕໍ່ກົນອຸບາຍ, ລ່ຽມລາຍສູ້ຮົບຂອງກຸ່ມຄົນບໍ່ດີ ແລະ ອິດທິກໍາລັງປໍລະປັກ ເພື່ອກຽມພ້ອມຕີຕອບຕ້ານສັດຕູໃນຮູບແບບຍຸດທະວິທີແບບ ໃໝ່ສົມທົບກັບການນໍາໃຊ້ເຕັກໂນໂລຊີ ທີ່ທັນສະໄໝມີປະສິດທິພາບສູງ, ເປັນການຍົກລະດັບການຊີ້ນໍາ, ບັນຊາ ລະຫວ່າງ 2 ກອງທັບ ໃຫ້ມີຄວາມເປັນເອກະພາບ, ມີປະສິດທິພາບໃນການປະຕິບັດໜ້າທີ່ວິຊາສະເພາະ, ໜ້າທີ່ພິເສດໃນຮູບແບບກໍາລັງປະສົມຮ່ວມຂັ້ນຍຸດທະວິທີ, ຍົກລະດັບການນໍາໃຊ້ໂດຣນ ພາຫະນະເບົາເຄື່ອນທີ່ໄວດໍາເນີນການສູ້ຮົບປະສານເຫລົ່າໃນຕົວເມືອງ ແລະ ເຂດພູຜາປ່າດົງໄດ້ຢ່າງມີປະສິດທິພາບສູງ.

ສະຫາຍ ພັນເອກ ພັນສອນ ຄໍາຜິວ ໄດ້ກ່າວອີກວ່າ: ລາວ-ຣັດເຊຍ ເຖິງວ່າຈະມາຈາກວັດທະ ນະທຳ, ພາສາປາກເວົ້າແຕກຕ່າງກັນ, ແຕ່ການຮ່ວມມື ລະຫວ່າງ ກອງທັບປະຊາຊົນລາວ ແລະ ກອງ ທັບ ສ ຣັດເຊຍ ນັບມື້ຈະເລີນງອກງາມຍິ່ງໆຂຶ້ນ.
ສະຫາຍ ຮ້ອຍເອກ ວັນ ສີບຸນເຮືອງ ຈາກກອງພັນ 743 ກອງພັນໃຫຍ່ 11 ກອງທັບປະຊາຊົນລາວ ໃຫ້ຮູ້ວ່າ: ພາຍຫລັງທີ່ໄດ້ຮັບຄຳສັ່ງຈາກຄະນະພັກ-ຄະນະບັນຊາ ໃຫ້ເຂົ້າຮ່ວມການຊ້ອມຮົບຮ່ວມ ລາວ-ຣັດເຊຍ “ລາໂຣສ-2025” ຕົນເອງໄດ້ປະຕິບັດຕາມຄໍາສັ່ງຢ່າງເຂັ້ມງວດ, ການເຂົ້າຮ່ວມຊ້ອມຮົບໃນຄັ້ງນີ້ ສຸດທີ່ມີຄວາມໝາຍຄວາມສໍາຄັນ ເຊິ່ງເປັນໂອກາດທີ່ດີ ທີ່ໄດ້ຖອດຖອນບົດຮຽນຈາກເພື່ອນຣັດເຊຍ ເປັນຕົ້ນ ການນໍາໃຊ້ອາວຸດຍຸດໂທປະກອນທີ່ທັນສະໄໝ, ພ້ອມທັງໃຫ້ຄໍາໝັ້ນສັນຍາວ່າ: ຈະທຸ່ມເທເຫື່ອແຮງ ຍາດແຍ່ງເອົາບົດຮຽນຈາກເພື່ອນຣັດເຊຍ ໃຫ້ໄດ້ຫລາຍທີ່ສຸດ ເພື່ອນໍາໄປໝູນໃຊ້ຢູ່ໃນກົມກອງຂອງຕົນໃຫ້ເກີດປະໂຫຍດສູງສຸດ.

ສະຫາຍ ສິບເອກ ເອເລັກເຊ່ ມາຣຕືໜົບ ພົນທະຫານ ກອງທັບ ແຫ່ງ ສ ຣັດເຊຍ ໄດ້ກ່າວວ່າ: ມີຄວາມຮູ້ສຶກດີໃຈຫລາຍທີ່ໄດ້ເຂົ້າຮ່ວມການຊ້ອມຮົບຮ່ວມ ລາວ-ຣັດເຊຍ ເພາະວ່າໄດ້ແລກປ່ຽນບົດ ຮຽນນໍາເຊິ່ງກັນ ແລະ ກັນ ເຖິງວ່າອາກາດຈະຮ້ອນ

ອົບເອົ້າແຕ່ທຸກຄົນມີຄວາມຕັ້ງໃຈໃນການຝຶກຊ້ອມ, ການຊ້ອມຮົບຮ່ວມ ລາວ-ຣັດເຊຍ ເປັນເຫດການທີ່ສຳຄັນ ບໍ່ພຽງແຕ່ເປັນການຍົກລະດັບຄວາມສາ ມາດທາງທະຫານເທົ່ານັ້ນ ແຕ່ຍັງເປັນການສ້າງສາຍສຳພັນ, ຄວາມເຂົ້າໃຈ ແລະ ມິດຕະພາບທີ່ດີຕໍ່ກັນຢ່າງແທ້ຈິງ.

ຂ່າວ: ບຸນຊ້ອຍ ວິໄລພອນ

ສະແດງຄຳຄິດເຫັນ