ຂປລ. ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ອົງການກອຍກາ (KOICA) ປະຈຳລາວ ໄດ້ນຳເອົາເຄື່ອງເອໂກ ມອບໃຫ້ໂຮງໝໍແຂວງຫລວງພະບາງ ໃນວັນທີ 18 ກັນຍາ 2025 ທີ່ແຂວງຫລວງພະບາງ ຕາງໜ້າມອບໂດຍທ່ານ ນາງ ແຊຢອງຮີ ຮອງຫົວໜ້າຫ້ອງການ ອົງການກອຍກາ ປະຈຳລາວ ແລະ ຕາງໜ້າໂດຍທ່ານ ພູວະນາ ອານຸລັກຄຳ ຜູ້ອຳນວຍການໂຮງໝໍແຂວງ ພ້ອມດ້ວຍພະນັກງານແພດ ແລະອາສາສະໝັກປະເທດເກົາຫລີ ປະຈຳໂຮງໝໍແຂວງຫລວງພະບາງ ເຂົ້າຮ່ວມ.

ທ່ານ ພູວະນາ ອານຸລັກຄຳ ໄດ້ກ່າວສະແດງຄວາມຂອບໃຈເປັນຢ່າງສູງ ຕໍ່ອົງການກອຍກາ ທີ່ໄດ້ໃຫ້ການຊ່ວຍເຫລືອໂຮງໝໍແຂວງຫລວງພະບາງ ຕະຫລອດ 10 ກວ່າປີຜ່ານມາ ເປັນໂຄງການຮ່ວມມືທີ່ດີ ແລະ ມີປະໂຫຍດຫລາຍ ໃຫ້ແກ່ການພັດທະນາ ການບໍລິການສຸຂະພາບພາຍໃນໂຮງໝໍ, ນັບແຕ່ປີ 2008 ຈົນເຖິງປັດຈຸບັນ ໂຮງໝໍແຂວງຫລວງພະບາງ ໄດ້ຮັບອາສາສະໝັກ ກອຍກາ ຈຳນວນ 8 ຄົນ ໃນນີ້ ເຕັກນິກລັງສີ 05 ຄົນ, ສາທາລະນະສຸກສາດ 01 ຄົນ, ພະຍາບານ 02 ຄົນ ເຮັດໜ້າທີ່ວິຊາສະເພາະ ຮ່ວມກັບພະນັກງານວິຊາການພາຍໃນໜ່ວຍໄດ້ເປັນຢ່າງດີ.

ພ້ອມນີ້, ອົງການ ກອຍກາ ຍັງໄດ້ໃຫ້ການຊ່ວຍເຫລືອ ອຸປະກອນຕ່າງໆ ແກ່ໂຮງໝໍຫລາຍຢ່າງເປັນຕົ້ນ ຄອມພິວເຕີ, ລະບົບ HIS, PACS, CTG. ໃນແຕ່ລະປີ ຢູ່ໂຮງໝໍແຂວງຫລວງພະບາງ ມີຜູ້ມາໃຊ້ບໍລິການເຮັດເອໂກທົ່ວໄປ ໂດຍສະເລ່ຍ ປະມານ 4.400 ຕໍ່ເທື່ອຄົນ ສະເພາະໃນ 6 ເດືອນຕົ້ນປີ 2025 ມີ 2.432 ເທື່ອຄົນ ໂດຍບໍ່ລວມການເອໂກ ແມ່ຍິງຖືພາ ແລະ ເອໂກຫົວໃຈ. ສຳລັບການຊ່ວຍເຫລືອເຄື່ອງເອໂກ ຈາກອົງການກອຍກາ ໃນຄັ້ງນີ້ ເປັນການຊ່ວຍເຫລືອການບໍລິການແທນເຄື່ອງເກົ່າທີ່ມີການເປ່ເພ ເຮັດໃຫ້ການບໍລິການພາຍໃນໂຮງໝໍມີປະສິດທິພາບສູງຂຶ້ນ.

ໂອກາດນີ້, ທ່ານ ນາງ ແຊຢອງຮີ ໄດ້ກ່າວວ່າ: ເຄື່ອງເອໂກ (Echo) ທີ່ໃຫ້ການຊ່ວຍເຫລືອ ແກ່ໂຮງໝໍແຂວງຫລວງພະບາງຄັ້ງນີ້ ຈະສາມາດເພີ່ມຄວາມສາມາດ ໃນການບົ່ງມະຕິພະຍາດຂອງແພດ-ໝໍ ໃຫ້ມີຄວາມຊັດເຈນ ໂດຍສະເພາະອການກວດທ້ອງຂອງແມ່ຍິງຖືພາ ແລະ ອື່ນໆ ພ້ອມທັງໄດ້ຮຽກຮ້ອງໃຫ້ຄະນະອຳນວຍການ ແລະອພະນັກງານແພດ-ໝໍ ພ້ອມກັນນຳໃຊ້ເຄື່ອງເອໂກ (Echo) ທີ່ໄດ້ຮັບໃຫ້ເກີດຜົນຜະໂຫຍດສູງ ທັງນຳໃຊ້ໃຫ້ໄດ້ຍາວນານ.
ຂ່າວ: ອາພຸດເດດ ບຸບຜາ, ພາບ: ທະນູສີນ ອິດທິພົນ

ສະແດງຄຳຄິດເຫັນ